44
1 Yoseb gi nya: yhoem: mo da" yoovoin yu dei zoo: phoo ri ?Houg: bang: da" thung: dangain" moo nyangnu" yo" voin wa myhoo' zoo: shug kaid byid: lho: nyang: yug nya: ngei ri we' thung: nhoid moo doem kaid byid: kaid we'.
2 Nga" da" ngei goem rigi nge thang su: da" thung: nhoid moo nya: gug phoug" ngei yo' dage" kaid byid: kaid we? ga: amyeing" byid: kaid. Nyang: tid khyo" nyang: yhe: koid bye:.
3 Nab soin: no' re nya: mang: tang: yiri nyangnu" da" loo zei: joem yo' dage" nhang: kaid bye:.
4 Nyangnu" gi voomoo" moo gyi" sho' avi: shi" moo Yoseb gi nya: yhoem: mo dei zoo: phoo ri ?Mho: tang: yi thang: khyoo: myab cang we'. Nya: bang: ri yhe: myhi: lang" ?Nanu" gi ge khyo" koid ri age khyo" ciwim doem koid la"
5 Nga" yhoem: seing: da" ngei goem ri cikoid khoug" go". Hau: zigi nyang: kyeing" ci: lho: nyang: kaid shug nyid da" boid phyed nyid da" goem nghoid. Nanu" gye" gyi: da" yooboo ri shoid boem abye: go"? ein: yhe: tid we'? ga: nhang: kaid.
6 Dei zoo: phoo houg: bang: ri yhe: myhi: lang" hau: dang: ri doem yhe: tid.
7 Nyangnu" gi nyang: ri ?Nang hid su" re" tid zigi aseing: nang- ngoonu" ri cisu" jho: lha". Ngoonu" gi houg: te" moo" azei:- jham' yo" tang:.
8 Ngoonu" da" thung: moo bo lo da" ngei rilang" Khanan mung" mo nanu" jhang doem ci: tau" re" zigi nang nyang: we' si' gu nghoid bye:. Re" aseing: da" yhoem: mo ngei ri nghoid loug- sheing: ri nghoid loug- ngoonu" cikoid se' khoug" wa lha".
9 Yhoem: seing: we"- ngoonu" dayug yug moo hau: zi yu to" zi myang nghoid rigi hau: yug gi said pyam shoug" wa nghoid lho: ngoonu" deing da" bang: gi nanu" da" join koid wa bye:? ga: wigi lhoem: tid.
10 Nyang: gi ?Gi bye:- nghoid loug goem yu too" su: ri za: nga" join koid lho: gootu: rigi nhang: kaid wa? ga: tid.
11 Houg: yoomo nyangnu" gi nyang: nya: thung: joem ri myab myab khyo' lho: dangain" bang: thung: ri pei: boem ago".
12 Yoseb da" dei zoo: phoo gi goo" lhoo: za: gyi: thang yug jang" mo nge thang yug jhang ju" sho' sho: pei: lo" ri Benyamin da" thung: moo goem ri shau" myang.
13 Nya: mang: bang: gi koug wigi nyangnu" da" byi: ri lang: ceig pyam- loo zei: yoovoin tho' lho: voomoo" khyoo: doem tau" yhe: boem.
14 Yuda yo' nya: mang: nhung" yi Yoseb nyid nyid da" yhoem: khyoo: ju" lang" nya: shidkhoin" moo goeb pid.
15 Houg: lang" Yoseb gi ?Nanu" cikoid go". Ngoo gi boid phyed lho: nanu" ri se' lo ziri nanu" asi' goo" la"? ga: lhoem: tid.
16 ?Aseing: we" ngoonu" nang ri khasu" yo" tid loo: wa la"? ga: Yuda phug tid. ?Khasu" we' ayo" ngeig loo:. Ngoonu" nya: gung ri khasu" koid lho: se' yo" tid sho' loo wa la". Mangsoo gi ngoonu" da" yooboo ri ayo" nghoeb byid: loo. Goem ri shoug" soeb myang su: za: we' anghoid- akhid" ngoonu" dangain" bang: gi nanu" da" join yi nghoid boem bye:? ga: tid.
17 Yoseb gi ?Hougsu" anghoid. Ngoo hougsu" khanham we' koid wa anghoid. Nga" goem yu too" su: ri za: nga" join dakoid nhang: wa. Deing gu dangain" gi nanu" nya: phoo jhang myen myenjham" jham" datau" loo" ge? ga: doem tid.
18 Yuda gi Yoseb jhang tain" yhe: lho: ?Aseing: we"- jeju" mo nang ri dang: yo" tid wa akhang" byid: we'. Nang gi khokham nyang: nghoid da- ngoo ri nheig ayoo: lhe".
19 Aseing: nang ngoonu" ri ?Nanu" nya: phoo nyid shi" la"- gootu: mang: nhung" nyid shi" la"? ga: myid:.
20 Ngoonu" gi ?Ngoonu" moo ngoonu" nya: phoo mang: zoo: yo' nyang: mang: thang: ri doem yo" da" nhung" nge thang su: dayug nyid shi". Hau: yug da" nya: mang: yug gi shid: bye:. Houg: lho: nya: tang: gi nya: myhi' dayug za: mo nghoid lho: nyang: za: date nyid lo:- nya: phoo we' nyang: ri atho' tid jheddab da:.
21 Aseing: nang nyang: ri shau" myang wa shid re" he: joyoo moo shu" ri" we' ga: nang ngoonu" ri tid.
22 Houg: lho: ngoonu" gi hau: yug yo' nya: phoo ayo" gang:- gang: lang" gi nya: phoo shid: loo" wa zi nghoid? ein: tid bye:.
23 Hau: thang: nang gi ?Nanu" da" nya: nhung" nge thang yug ri ashu" ri" nghoid rigi nanu" gi nga" shidkhoin" khyoo: doem ayo" vang ri" wa nghoid? ga: tid bye:.
24 ?Ngoonu" nya: phoo jhang ju" loo" lang" ngoonu" gi nang tid ziyo' dakhyoo" ti" lo" tid bye:.
25 Hau: thang: nyang: gi ngoonu" ri doem tau" yhe: lho: zoo: noem dajhi' doem yhe: qei wa shid re" tid bye:.
26 Ngoonu" gi ?Ngoonu" yo" yhi: wa zi anghoid. Ngoonu" nya: nhung" nge thang su: ri za: ashu" yhe: nghoid rigi hau: yug da" shidkhoin" khyoo: ngoonu" yo" vang yhi: wa anghoid. Nhung" nge thang su: bo ri za: ngoonu" dayo" yhi: wa nghoid? ein: phug tid bye:.
27 Ngoonu" nya: phoo gi ?Nanu" se' ziyo' dakhyoo" ti" nga" yhoem: seing: myhi' Rakhela gi yuggi zoo: eig yug khyeing" dayo".
28 Dayug su: gi anyid byug khari" loo. Nyang: rigi siyoo gougnyhoug joem wigi ngaid ceing zo: pyam yoomo khid" nyid" ju" sho' nyang: ri ngoo amyang khari" loo.
29 He: yug ri nanu" akhid" doem shu" yhe: byug nghoid rigi nyang: moo daja: ja: bue" lo rigi ngoo gi mang: bye: ziyo' dakhyoo" ti" nanu" wigi bui" nhang: da" kougshu: khyoo: gang mo ngoo ri said nyid boem wa bye: go"? ga: wigi tid.
30-31 Xo' lho: ?Aseing: we"? ga: Yuda xo' tid. ?Ngoo gi hau: yug abo zi za: nga" phoo jhang lo" nghoid rigi ngoo yo' dage" hau: yug abo lo zi lhoem: myang yo' nyang: gi shid: loo" wa bye:. Nya: kang: ri hau: yug da" kang: yo' dage" thoeb too" lho: nyang: gi gye" mang: bye: yoomo kougshu: khyoo: yo' ngoonu" nyang: ri said pyam khyo" bui" wa myang.
32 Hau: tho' agoo"- ngoo gi nga" phoo da" zoothang shid re" nga" da" kangso' yo' kookham: kham: too" bye:. Zoothang ri re" jhang adoem shu' tau" lo nghoid rigi nga" pyaid goin" moo nheig" khoin" dajha" zang" nyid baja" ein: we' tid khoo' bye:.
33 Houg: yoomo aseing: we"- nya: gungthid ngoo nyang: hid: moo join dajha" koid nyid loo: wa. Nyang: rigi nya: mang: bang: yo' dage" yhoem: khyoo: doem tau" loo" wa shid re" akhang" byid: we'.
34 Ngoo yo' dage" hau: abo lo rigi ngoo gi nga" phoo jhang khasu" koid se' yo" tau" loo" wa la". Nga" phoo moo bue" loo wa da" dain ci' ja: ngoo gi atho' oung: voem" myang? ga: wigi tid.