13
1 Ngoo gi byu da" dang: yo' moug: lagyoo: yi da" dang- aja" ja: se' tid nghoid loug we' jheddab nheigloem: abo rigi baid myheung' da" mang" thui: yo' myeing tei" to" da" shab sheing: yo' dadu nyid.
2 Ngoo gi lapi: se' pe: ziyo' no, da" dang: kang dangain" ziri se' myab, thang da" phajhi" aja" ja: yo' joeb, byeung" lho: wigi boem, ri yo" doin: shu" pyam sho' da" loem" jeing" emyed boo nghoid loug we' jheddab da" nheigloem: abo rigi: ngoo ci" we' anghoid.
3 Ngoo yo" da" nga" ziyoo jonu" dangain" ri ngoo cang, gam byid: pyam lho: wigi ngoo nya: gungdu: ri: we' myi: moo: yo" nghe pyamsho' da" xoin" yo" to' pyam ri nghoid loug we' jheddab nheigloem: abo rigi: nga" shid re" ce" akyu" we' aboo.
4 Jheddab da" nheigloem: gi nheigloem: sheung: nyid- nheig khyeug nyid- no" zo zi aboo- phau: khuang nghoid boin" khyoo: aboo.
5 Jheddab nheigloem: gi se' phoug" se' myang:- nya: akyu" ashoo:- nheig yoo: ung: jhen: khyoo: aboo- jheddab da" nheigloem: gi sube' da" yooboo ri axoem" too.
6 Jheddab da" nheigloem: gi adeung amain" ziyo' akhyeing" ashoeb da" khyoo: moo: agoug loo: za: hau: deingmain" khyoo: moo: gau yi nyid.
7 Jheddab da" nheigloem: gi khanham we' asoem" kham khyoo: ajo,- khanham we' loem" jeing" nyid- khanham we' nheig byu nyid- khanham we' kham zeung: nyid.
8 Jheddab nheigloem: gi apyaid atoo: moo: dajo, jo- gye" no, da" mungdang: joem, gi daso, moo: bei: lo" byug wa dang: aja: ja: se' tid khyoo: nghoid rigi no: lo" byug wa lasi laleug khyoo: we' lid: lo" byug wa zi nghoid.
9 Khasu" wim ga: ri ngoonu" da" lasi laleug jeju" jhungshug joem yo' Venyi: vang byid: lho: lapi: dang: khyo" kho" kyo" da" mungdang: joem gi ajoeb byeung" nghoid da.
10 Nghoid loug we' hau: joeb, byeung" zi ju" ri" lang" gi ajoeb abyeung" zigi bei: lo" byug wa zi nghoid.
11 Ngoo zooshang: nghoid shi" ayo, moo: gi ngoo zooshang: myeing" kaid nyid. Zoonu" myid boo- zoonu" ti" myid soin: thu' nyid. Akhid" ngoo sayen" bue" loo lang" zooshang: aved, ri ngoo to" pyam.
12 Akhid" ngoo myang nyid zigi bangteing moo yoeb, yoeb, za: date: myang nyid. Thang: phyang" ngoonu" gi myo, moo: gyo' gyo' nyang: shau" myang goo" wa. Akhid" ngoo se' khyoo: gi ajoeb abyeung" za: danghoid- Hau: uri: gi Mangsoo ngoo ri se' yhang: ti" ngoo we' joeb, byeung" sho' se' wim bye:.
13 Akhid" koem gi loem" jeing" da" khyoo- nheig byu joyoo yo' jheddab nheigloem: ein: zi soem" ja: jo, nghoid loug we' hau: gu: moo: je" gyi: thang zigi jheddab nheigloem: nghoid.