14
1 Hougsu" nghoid yoomo jheddab da" nheigloem: ri yo" yu sho' yoem: kaid nyid ge. Venyi: jeju" jhungshug joem ri vho: ngei nyid ge. Je" wigi: hau: mungdang: ri kho" kyoo" wa da" jeju" jhungshug ri vho: ngei nyid ge.
2 Gooki" lid da" dang: ri se' tid su: gi gooji yo' doem go" nyid zi anghoid. Mangsoo yo' doem go" nyid zi nghoid. Khasu" wim ga: ri nya: da" dang: ri hang" we' ase' gyoo: byid nyang: gi Venyi: yoem: vhoo" yo" sen: lho: dang: kang: no, da" deingmain" khyoo: ri tid nyid zi nghoid.
3 Nghoid loug we' Mangso da" mungdang: ri kho" kyo" nyid su: gi byu yi ri geingteing loo" nhang: da" dang:- yoem: byid: da" dang:- nheig teing ung: teing byid: da" dang: ri tid nyid.
4 Gooki" lid da" dang: aja: ja: ri tid nyid su: gi nya: gungdu: ri za: da te: yo" geingteing nhang:- nghoid loug we" Mangso da" mungdang: ri kho" kyo" nyid su: gi hau: da" phung: goin" ziri: yo" geingteing loo nhang: nyid.
5 Nanu" nyid moo: nyid bang: gi gooki" lid da" dang: tid wa ziri ngoo vho: ngei nyid- nghoid loug we' Mangso mungdang: ri yo" kho" kyoo" wa da" yoem: vhoo" yo' sen: da" jeju" ri je" yo" yu nhang: nau nyid. Khasu" wim ga: ri gooki" lid da" dang: ri se' tid su: gi nyang: tid da" dang: kang: ri phoid kyoo" su: nyid ri she'- hau: phung: ri dayo" geingteing nhang. Hougsu" anghoid rigi Mangso mungdang: kho" kyoo" su: gi gooki" lid da" dang: se' tid su: tho' moo: phoung" je, dab nyid.
6 Houg: yoomo mangnhung" yi we"- Akhid" ngoo nanu" jhang moo: ju" re" lho: gooki" lid: da" dang: aja: ja: tid nghoid loug we' Mangso jhang mo lapi: dang:- lasi laleug da" dang:- Venyi: wigi: fang byid: da" mungdang: jhau" byid: mhoo' byid: da" dang:- ngoo nanu" ri atid nghoid rigi nanu" shid re" ce: akyu" boo wa la" ce" akyu" we' aboo.
7 Khoolhang anghoid lang" gi teing yhang: te" kangso abo baid myheung ja: ri yu" shang. Hougsu" baid myheung da" thui: ri bang bang abaid myheung rigi kha: yug gi khasu" ga: gyo: kho' yu wa la"
8 Laboo" ri moid su: gi nya: thui: ri se' gyo: kho' wa khyo" gyeung: gyeung: za: amoid nghoid rigi kha: yug gi gyi too wa shid re" se' nyheung, soin' wa lha"
9 Houg: yo' dakhyoo" ti" gooki" lid da" dang: aja" ja: yo' nanu" tid nyid da" dang: gi gyeung: gyeung: sho' sho' anghoid rigi kha: yug khasu" ga: se' gyo: yu wa la" Nanu" da" dang: khoin" joem gi lid moo: bo dang: lo" byug wa zi nghoid.
10 He: mougmyid tho' moo: myeing" aja" ja: boo nghoid loug we' ce: ja: byumyu" yi da" myeing" nghoid loug we' dang: kang: abo zi gi ajo.
11 Nghoid loug we' ngoo ase' gyo: da" byumyu" myeing" kaid da" zigi nga" shid re tung' boug nghoid wigi ngoo we' hau: yug shid mo tung: boug za: bue" nyid wa nghoid.
12 Nanu" gi Venyi: jhungshug ri vho: ngei nyid boem yoomo hau" da phung: gyi: sheung: loo wa shid re" geingteing nhang: da" Venyi: jhungshug ri je" wigi: yo" ci: yhung: wa shid re" ziyoo jo, nu" dangain" tho' moo: je" wigi: cang sho: yu nyid ge.
13 Hougsu" nghoid yoomo gooki" lid da" dang: aja: ja: tid nyid su: gi nyang: nyang: tid nyid da" dang: kang: ri se' phoid: kyoo" jeju" yoem: vhoo" yo" yu wa shid re" nyang: akyu" mho' nyid baja.
14 Khasu" wim ga: ri ngoo gi myeing" aja: ja: khyo" akyu" mho' nyid da" ayo, moo gyeing" nyang: nga" da" Venyi: gi akyu" mho' nyid nghoid loug we' nga" nheigloem: gi hau: jang" moo: aboo.
15 Houg: ri ngoo khasu" koid wa lha" Ngoo gi nga" Venyi: yo' akyu" mho' lho: wigi nga" emyed yo" we' akyu" mho' wa zi nghoid. Nga" Venyi: yo' ngoo jikhoin" khoin" wigi nga" emyed yo' we' jikhoin" khoin" nyid wa zi nghoid.
16 Nanu" gi Venyi: khyo" za: Mangsoo ri jeju" boin: da" dang: tid nghoid rigi akyu" mho' phung: moo bo nyid da" phung: byu dayug gi nanu" tid da" dang: ri ase' gyoo: yoomo nanu" da" jeju" boin: akyu" mho' da" dang: ri khasu" wigi: Amen, ga: yo" bo tid wa la"
17 Jeju" ri boin: coung" da" nanu" akyu" mho' dang: gi khayhi' gi nghoid loug we' byu gootu: shid re" geingteing" nhang: da" akyu" gi ci: yo" yu boem wa zi anghoid.
18 Nanu" hang" da" atho moo: we' gooki" lid da dang: aja" ja: ngoo se' tid yoomo Mangsoo ri ngoo coung" nghei nyid.
19 Nghoid loug we' noku akyu" mho' nyid uri gooki" lid da" dang: aja" ja: khyeing" moin" yo" tid wa tho' re" gi byu gooji yi ri jhau" byid: wa shid re" se' gyo: da" dang: khoin" wim: khoin" za: yo' ngoo je" wigi: tid nau nyid.
20 Mangnhung" yi we"- myid soin: yu" ca" da" khyoo: moo: zooshang ti" akoid nyid goo" akhyeing" ashoeb khyoo: moo gi zooshang: ti" bui" nyid ge. Myid soin: yu" khyoo: moo: gi nheig boo sayen" bue" nyid loo: ge.
21 Hau: jhoem: mungdang: moo: lhid" to" zigi Nga" da" byumyu" yi ri myeing" aja" ja: kaid mo, da" khoin" thui: yo' ngoo tid wa zi nghoid. Hougsu" nghoid lang" gi nga" da" byumyu" yi gi ngoo ri tam" gyo: goo" zi anghoid ga: tid.
22 Hougsu" nghoid yoomo gooki" lid da" dang: tid da" yoem: vhoo" gi aloem" jeing" bang: shid re" sagsi alhoo: nghoid nyid. Loem" jeing" bang: shid re" anghoid. Mangso mungdang: yo" kho" kyo" da" jeju" yoemso jhungshug koem gi loem" jeing" bang: shid re" sagsi alhoo: nghoid. Aloem" ajeung" bang: shid re" anghoid.
23 Hougsu" wigi hau: da" phung: goin" bang: zeung: foem: nyid boem: wigi dangain" bang: gi gooki" lid da" myeing" aja: ja: khyo" tid go" nyid boem ri ase' gyo: da" yu" maya" byu yi gi houg: su" anghoid lang" aloem" jeing" bang: ju" vang lo rigi nanu" dangain" koo" myeing" kaid nyid boem, ga: wigi: nyangnu" tid boem wa zi anghoid goo" la"
24 Nghoid loug we' byu yug khang" moo" gi Mangso mungdang: kho" kyo" nyid boem nghoid rigi aloem" jeing" bang- hougsu" anghoid lang" yu" maya" byu yi ju" vang lo boem nghoid rigi nyangnu" shoug" gyo: da" mungdang: yoomo nyangnu" gi yooboo yoo" bang: nghoid ziri goolhoo: nyang: se' gyo: boin: gyeung: lo" boem wa zi nghoid.
25 Nyangnu" shoug" gyo: da" mungdang: joem yoomo nyangnu" da" nheigloem: emyed khoug: moo: tarha" dang: kho' nyid zi shau" wigi nyangnu" zau" to" da" age, khyoo: gi bang thu loo wa nghoid wigi nyangnu" gi goeb pid lho: Mangsoo ri loemkhau: ziyo' Gyeing" nyang: Mangsoo gi ngoonu" yo' dage" he: khyi moo: nyid nyid nhung' ga: yhen: yu boem wa zi nghoid.
26 Houg: yoomo mangnhung" yi we"- ngoo tid nau khyoo: gi hidsu" nghoid. Nanu" noku wa ga: zeung: foem: to" uri dayug gi makhoin" shu" vhu" shi: baja" Gootu: dayug gi jhau" byid: khyoo- gootu: dayug gi Mangso jhang mo yoeb, myang dang hau: lho: gootu: dayug gi gooki" lid da" dang: yo' tid da" mungdang- hau: lho: dayug gi hau: mungdang: da" dang: kang: ri phoid: kyo" da" moo" ri voin vu, nyid ge. Nanu" zei: da" moo" dangain" gi hau: phung ri pang" thoug geingteing nhang: da" shid re zei: so' nyid ge.
27 Byu dayug yug gi gooki" lid da" dang: ri tid wa nghoid rigi myo: thang gi byu eig yug- hougsu" anghoid lang" gi soem" yug dayug thang: moo: dayug tid wigi dayug gi hau: da" dang: kang: ri phoid: kyoo" baja.
28 Nghoid loug we' dang: kang: ri phoid: kyoo" wa da" byu anyid nghoid rigi gooki" lid da" dang: aja: ja: tid nau nghoid ri hau: phung: moo nyang: gi sam" zoo: nyid lho: wigi nya: gungdu: yo' Mangsoo ri nheigloem: khoug: moo: za: tid nyid baja.
29 Mangso mungdang: kho" kyoo" wa shid re" yoeb, myang kham: yu da" byu eig yug dang: tid wigi gooji yi gi nyangnu" tid da" dang: ri myid soin: yu" nyid goo" baja.
30 Nghoid loug we' hau: phung, moo: bo zhoung: jo, da" byu dayug yug gi Mangso jhang mo mungdang: daja: ja: yo" yu nghoid rigi dang: tid nyid su: no: loo" baja.
31 Nanu" dayug yo' dayug gi jhau" shed yu ziyo' yoem: yu" yu wa khyo" nanu" dangain" bang: dayug thang: moo: dayug- Mangso mungdang: ri yo" kho" kyo" nyid boem ago".
32 He: da" Mangso mungdang: kho" kyo" da" jeju" jhungshug gi kho" kyoo" su: da" vhoeb khang" da" akhoug: moo: nghoid nyid ca.
33 Khasu" wim gari Mangsoo gi ngoonu" ri anhung' akhoid' khyoo: moo: anyid nhang: noug looza- ngeipyoo: myenjham" ziyo' ngeilho' khyoo: danyid nhang: nau.
34 Mangso da" byu phung: yi dangain" jang" moo cang nyid da" akyoo" again yi: dakhyoo" ti" myiyi: yi gi hau: zoebphoung: moo: sam" zoo: nyid nyid goo" baja" nyangnu" gi dang: tid wa da" akhang" ajo, Yuda yi da" tarha" moo: tid to" ziyo' dakhyoo" ti" nyangnu" gi shu" vhu" shi: mo, age, koid.
35 Nyangnu" gi khyoo: daja: ja: ri si' nau boem nghoid rigi yhoem: moo: nyangnu" da" yhoem: seing: phoo bang: jhang mo myid: yu goo" baja. Phoung zoebphoung: moo: myiyi: zoo: dayug yug dang: tid wa zigi asho' ashid: danghoid nyid.
36 Mangso da" mungdang: gi nanu" jhang mo thu' lo zi nghoid go" la" Hougsu" anghoid lang" nanu" jhang moo: kyeing" hau: mungdang: ju" lo zi nghoid go" la"
37 Byu dayug yug gi nyang: nya: da" gungdu: ri Mangso da" lagyoo: nghoid- hougsu" anghoid lang" gi Venyi: jhungshug yo" yu su: nghoid ga: shau" myid yu nghoid rigi Aseing da" amyeung" yo' he: mougsoug" ri ngoo lhid" kaid ziri: se' gyoo: baja.
38 Byu dayug yug gi he: khyoo: ri atam" gyo: nghoid rigi nyang: ri ci: we' asoin: byid: go"- nyang: tid dang: ri we' hang" atam" gyoo: byid: goo".
39 Hougsu" nghoid yoomo mangnhung" yi we"- nanu" gi Mangso mungdang: ri kho" kyoo" wa khyoo: moo: myid loem" lho: wigi vho: ngei nyid ge. Nghoid loug we' gooki" lid da" myeing" aja: ja: kaid su: ri we' atoem: pyam byid: goo".
40 Khyoo: khaid gu: khang" moo" ri yu" du yu" young" khyo" voin vu, yoem: kaid wa su: ca" nyid.