1 Mangnhung" yi we"- nanu" mougsoug" khyo" lhid" wigi myid: kaid da" gyeungshang: Venyi: da" jeju" jhungshug yo' sen: wigi hau: da" deingmain" khyoo: nanu" ri tid kyoo" wa nghoid. 2 Nanu" gi tungbau byumyu" yi danghoid nyid boem shi" ayo, moo: khyoo: aja" ja: moo: khyoo: vhang: vhang: loo" bang: nghoid boem wigi kangso abo da" soolhoo: joem ri noku lid: lo boem bye: ziri: nanu" nyang: si' gu nghoid. 3 Mangsoo ri nghoid loug we' Mangso Venyi: wigi: khyoo: shidvhu" she: zi shau" kham: yu nghoid rigi" Aseing Yesu ri mau: goin' baja",, ga: avoem" tid. Gyeungshang: da" Venyi: wigi khyoo: shidvhu" she: ziri: ashau" kham: yu su: gi Aseing Yesu gi Aseing nghoid ga: hang" we' ayo" yhen: yu nyid wa khyoo- ngoo nanu" ri si' nhang: nau. 4 Akhid" Venyi: jeju" jhung shug aja" ja: boo nghoid loug we' hau" jeju" jhungshug joem ri Venyi: dayug wigi: kyeing byid: nyid zi nghoid. 5 Dei zhoo' dei jhug wa moo" aja" ja: boo nghoid loug we' yo" zhoo" yo" jhoug, da" Aseing gi dayug za: date: nghoid. 6 Moo" zoo" jid: zoo" zei: loo" wa da" yoemso myoo" sho' ja: boo nghoid loug we' dangain" ziri: pang" thoug voinvu, nyid da- gooki" lid da" moo" zo" shid re" yoemso kaid byid: nyid su gi Mangsoo dayug za: danghoid. 7 Dangain" bang: shid mo akyu" boo baja" ga: byu yug khang" mo" nheigloem: ung: khoug: moo gyeungshang: da" Venyi: loung" jo, bye: ziri khyoo: aja: ja: khyo" toin" shid nyid. 8 Khasu" wim gari byu dayug rigi hau: Venyi: gi phajhi" mungdang: kho" kyoo" wa yoem: byid: nyid. Gootu: dayug ri hau: Venyi: gi lasi laleug da" mungdang: se' kho" kyo" da" yoem: vhoo" kaid byid nyid. 9 Hau: lho: wigi gootu: dayug rigi hau: Venyi: wigi: loem" jeing" da" nheigloem: kaid byid: nyid. Gootu: dayug ri hau: Venyi: gi noo phyoo yo" byang" ge da" yoem: vhoo" kaid byid: nyid. 10 Hau: Venyi: wigi dayug rigi: mau" pho" alhoo: again yo" koid shug wa da" yoem: vhoo"- gootu: dayug rigi: lapi: wa da" akhang" gootu: dayug rigi Venyi: mo yo" yu da" yoem: vhoo" yo' Venyi: khyo" anghoid da" jhung" shug joem ri se' yu" phoid: kho' se' da" yoemso- Gootu: dayug rigi myeing" aja" ja: se' kaid da" yoemso yo' gootu: dayug rigi: tid da" dang: khoin" mo dang: kang: joem ri se' phoid: kyo" da" yoem: vhoo" byid: to". 11 Nghoid loug we' hau: jeju" yoem: vhoo" joem gi hau: Venyi: dayug wigi: za: bui" nhang: nyid yoomo nyang: myid vho: ziyo' dakhyoo" ti" dayug yo' dayug ri gooki" lid da" jhungshug gootu: tu: ngab sho' gam, byid: to" boem bye:.

12 Khristu gi akung: ako' myoo" sho' dab da" dayug kyeung" da" gungdu: yo' du nyid. Hau: gungdu: mo akung: ako' joem gi myoo" sho' daboo nghoid loug we' gungdu: gi dayug kyeung" nghoid. 13 Houg: yo' dakhyoo" ti" nyhang" dangain" mo, gi Yuda yi nghoid loug- Yuda byumyu" yi anghoid loug we' join' yi nghoid loug join' anghoid mo, nghoid loug we' Venyi: dayug mo za: babtisma ri zheung: kham yu lho: dagung dashoo" za: bue" lo boem bye: ziyo' dangain" bang: da" nheigloem: ung: khoug: moo: hau: Venyi: dayug riza: coem, kham: yu boem bye:.

14 Khasu" wim gari hau: gungdu: moo: akung: ako' daloem: za: anghoid- myoo" sho' bo nyid. 15 Khyid: gi ngoo lo, anghoid yoomo gungdu: yo' ci: asen: ga: wigi: tid nghoid rigi houg: su" tid yoomo nyang: gi gungdu: yo' ci" we' asen: khyo" anghoid. 16 Hau: lho: wigi nookhyab, gi" ngoo gi myojid" anghoid yoomo gungdu: yo' ci: asen, ga: tid nghoid ri houg: su" tid yoomo gungdu: yo' ci: asen: khyo" anghoid. 17 Dagung goin" myojid" za: nghoid rigi khakhyo" se' shoug" gyoo: wa. Dagung goin" nu khyab, za: te: nghoid rigi khakhyo" se' nam yu" wa lha" 18 Akhid" Mangsoo koem gi nyang: vho: ziyo' dakhyoo" ti" akung: ako' daloem: yo' daloem: ri nya: joyoo yo' joyoo moo: tab, too" byid: bye:. 19 Hau: lho: dangain" gi ako' daloem: za: te: nghoid rigi gungdu: daloem: za: ayo" bui". 20 Akhid" koem gi akung: ako' myoo" sho' boo nghoid loug we' gungdu: daloem: za: date: nghoid.

21 Houg: su" nghoid yoomo myojid" gi" lo, nang rigi: ngoo avhoo: loo, ga: wigi: age tid. Vhuloem we' khyid: re" eig yug ri ngoo aci: noo" loo, ein: wigi: age tid. 22 Hau: tho' moo: je" wigi gungdu: mo, yoem: neung: yhang: te" da" akung: ako' aboo loo: za: ngoonu" ayo" nyid boem nghoid da. 23 Gung doem: mo houg: yhi' gyeing akyu" abo yhang: te" da- akung: ako' joem ri je" wigi yhau: gyen: khyo" wigi yu" coung: nyid boem. Ngoonu" da" ayung" adu da" akung: ako' joem ri je" yung" sho' ngoonu" lhoo' yhung" byid: nyid boem bye:. 24 Yung" gu nghoid da" akung: ako' ri koem gi lhoo, yhung, byid: aca" loo. Myonhoo: abo da" akung: ako' rigi je" wigi: myonhoo: yoo" nhang: wa shid re" Mangsoo nyang: hau: ziri: lhoo, yhung' byid: to". 25 Hougsu" nghoid yoomo gungdu: mo da" akung: ako' joem gi nyang: cang" nyang: suid" kho' go" khyoo: aboo loo: za: houg: yhang: te" adu, go" da" akung: ako' joem gi dayug shid re" dayug- seing" kho" gung yau yug go" se' nyid boem. 26 Houg: yhang" te" da" akung: ako'" daloem: gi noo, phyoo" kyikhyeig gye" shau" nyid uri akung: ako' gootu: we' houg: yo' dage" bo no nyid bye:. Akung: ako' daloem: ri coung' nghei byid: zi shau" nghoid rigi gootu: akung: ako' joem dangain" we' hau: da" gau yi ngeibu: khyoo: ri bo shau" kham: yu nyid boem.

27 Akhid" nanu" dangain" bang: gi Khristu da" gungdu: joem nghoid boem wigi yug khang" moo" gi houg: mo akung: ako' joem nghoid. 28 Mangsoo gi hau: da" phung: moo daloem: ein: jang" moo: Lagyoo: yi eig loem: ein: joyoo moo gi Lapi: yi- soem" loem: joyoo moo: gi Sara yi hau: thang: ri alhoo: again toin" shid mo hau: thang: moo: byu gooji ri yo" pang" yo" thoug khyoo: se' toin" shid mo hau: thang: moo- noophyoo" joem ri se' byang" gi byid: da" yoem: boo bang- mung main: dang: se' tid da" sayen" yi yo' gooki" lid da" dang: aja: ja: se' tid mo, ri we' nya: joyoo moo: nyid nhang: bye:. 29 Nyangnu" dangain" bang: gi lagyoo: yi nghoid go" la" dangain" bang: lapi: nghoid go la" Nyangnu" dangain" bang: gi sara yi nghoid boem la" dangain" bang: gi alhoo: again yo" koid shug go" la" 30 Nyangnu" dangain" bang: gi noo phyoo" ri se' byang" ge da" jeju" yoo" bang: nghoid la" Nyangnu" dangain" bang: myeing aja: ja: se' kaid go" la" dangain" bang: gi tid nyid da" dang: kang: ri se' phoid: kyoo" bang: nghoid go" la" 31 Houg: su" nghoid yoomo nanu" gi je" gyi: da" jeju" jhungshug ri yo" kham: yu wa shid re" nheig nhei: vho: ngei nyid ge. Ngoo gi nanu" ri je" gyi: da" khyoo: zeing dakhaid ri toin" shid shi" wa.