10
Areng my atleu pi ai nai adeu nai
1 Nisa theu nai khala y kani nai hai ai nai, Areng teng y hnei u. Khupanymchi pato ly kani nai hai iy khumi neangneangchi i vui, li hlauchira y amti amjang thawn hai nai keung ly Areng ne.
2 Khumichi ly tameuh mynchi, mynchi, leung sarachi teng y deng u bo. Na i py nichi i nga nai leu ly ati sai py ny y nai, ka-chawi leuchi ne. Phyrei khumichi ly amangchi thui pachai u; na i py nichi ly nangchi ai teng y nai lam mang y naini ang pahawi reng. Nichi teng i nga nai awmnem naira py, atyhtyh teu. Hunai deaungkho y khumichi ly lam tamang nai beramchi kamta, aki aleaung u bo. Lu sa nai keung by y i, patang naira avum u nai ne.
3 Areng my, “Kai ly kaimy i khumichi ai peang nai samrangchi ai kado theu hai nai deaungkho y pajeng ai. Juda khumichi ly kai i khumichi ne nai deaungkho y, ati cheaungkhang sa thai nai Areng ly nichi ai kry ai. Nichi ly khri pa-rei atho awm nai, kai i tavai keaungngochi lawm u ai.
4 Kai i khumichi ai peang ai nai nichi theung i dengdairei samrangchi, lu sa naichi, tavailu areng napi nai khumichi amthawn ai.note 10:4 Nichi theung i... khumichi: ti y baly ana patheng nai keungchi, Juda pri i dengdairei amprei u naichi ne.
5 Juda khumichi ly lamchira i aneaung kapan theung y, paleung ka-echi ai chiu piupa nai tavaimichi kamta, eaung naira nga u ai. Areng ly nichi hawi vanrei awm nai deaungkho y, nichi ly paleung ka-e keaungngo atang nai risachi ai malawn py tiu nai pajau vui ai.
6 “Kai ly Juda khumichi ai atho awm hai iy,
Israela khumichi ai atleu ai.
Kai ly nichi ai pahen iy,
mychi i saleaung khuteng mang y pahawi teang ai.
Nichi ly kaimy mana khala py khai su vai y nai khumichi kamta lawm ai.
Kai ly nichi i Areng Tameuh ne iy, nichi i chiu sa nai pathang pi ai.
7 Israela khumichi ly tavaimi risachi kamta,
atho awm naimy kreip hang nei nai khumichi kamta amo theu u ai.
Nichi i katu chanauchi ly hini eaung naira pany u jo iy,
Areng i sa pi nai saho y amo theu u ai.
8 “Kai ly kaimy i khumichi ai
palau iy kachu ai.
Khumichi ai atleu iy
jangni i kamta khumichi peung hai ai.
9 Kai ly nichi ai khumi cheng cheaungkhangchi theung y ahei hai teu i py,
huni palo parai nai meingtymchira i nai, nichi ly kai ai pany u jo ai.
Nichi hawi mychi i cho chanauchi ly dei y naimy heng u i,
mymychi i pri y vawi u ai.
10 Kai ly nichi ai Aikupta pri hawi Asuria pri dengdairei
hawi ali teang iy, mychi i saleaung khutengra y meingtym tahyh pi ai.
Nichi ai Kilead pri hawi Lebanon prira y py, meingtym tahyh pi ai.
Naibaly khumichi awm naira meingtym akeaung y na pa-rei awm ai.
11 Nichi ly ka-jeira awm nai pangli y angpeang nai khala,
kai Areng ly tui sampyhchi anawn hai ai.
Naing tavo i thiu parai nai meingtymchi py, tui kang pawn ai.
Asuria pri i paleung len nai ai, kapanem pi vui ai.
Atho awm nai Aikupta pri py, sa thai naira jum vui ai.
12 Kai ly kaimy i khumichi ai atho awm hai ai.
Nichi ly kai ai chiu u iy kai i leu tangai u ai.”
Hini ly Areng i pei nai leu ne.