4
Neampacho
1 Kai i khrei nai awi, nang ly khri pa-rei mo-cha hawi na ly!
Meimai atleangra theung mang, nang i meichi ly khrei nai kangvang ko na bo.
Nang i samchi ly Kilead mawichi mang ampyh naimy
satla kathiu nai mi-i kanghuchi kamta ahyn dengdu na bo.
2 Nang i hochi ly mui vau ang vawi
tui pahiu pan nai beram kamta kaleung.
Ho harei py akheaung y leang rai;
hunichi bawibawi ly cheh ai nai by y na pa-rei, khen hawi parai.
3 Nang i labeaungtengchi ly ribbon kamsen hawi atawm iy,
leu katheu nai khala y khrei ai hawi parai nai ne.
Nang i tangbeng pahathyp nai ly meimai atleangra theung mang avang na.
4 Apu parai nai pahu leang awijawn nai nang i kaneaung ly
khupui sangrei bang hau nai
Davida i lengseaung yhm hawi atawm nai ne.
5 Nang i paleung kangthaichi py jeupawm reaung y teicha tlai nai
sisiu nyhrei hawi py, sikhicho kangphi hawi py atawm.
6 Khawn mang ali theu pryn iy
kaveng tama nai neng tym pa-rei,
mura mui hawi
lawban mawi salo y kai awm ai.
7 Kai i khrei nai awi, nang ai chehra by y;
khri pa-rei mo-cha hawi parai na ly!
8 Kai i aju angam nai anglo awi,
nang ly kai hawi vanrei Lebanon mawi i nai abang ba.
Kai hawi vanrei Lebanon i nai abang ba.
Khrangsichi, takai kheangchi awm nai Heramon mawi saleung,
Senira mawi saleung hawi, Amana mawi saleungchi dengdairei satlo kathiu ba.
9 Kai i aju angam nai khrei nai awi,
nang ly mei tlenrei ka-khen hawi, nang i awi nai pahu leng ly
kai i paleung pathym tlawn hai na bo.
10 Kai i aju angam nai khrei nai awi,
nang i khrei nai ly kai ai khri pa-rei amo theu hai bo.
Nang i khrei nai ly kreip hang tleaung y malawn py hawikeh;
nang i rimui ly mui katuichi tleaung y py mui hawikeh nai ne.
11 Kai i paleung pathym tlawn na pa-rei khrei nai awi, nang i labeaungteng ly khawi byn kamta leaung na bo;
nang i palai ly kai i vui y sikanu hawi khawi hang kamta ne.
Nang i ateaung alangchi ly Lebanon mawi i mui katui hawi amseaung nai ne.
12 Kai i aju angam nai khrei nai neampachy ly pany hai ai nai avo y nai akho,
lengseaung hawi tapang nai akho, khumi leaungrei my peang nai tuino tavochy ne.
13 Huni akho theung i dengkeaung keungchi ly
kaba bai theung i
keungchi kamta prau mang iy,
athai kahawi athai reng.
14 Huni akho theung y nardu keung hawi deang keung, nardu rimui keung,
saffron keung, kalamas keung, sinamon keung, rimui keung cheaungkhang,
khri pa-rei mui hawi parai nai kulataruchy keung katheangchi ly
aly ngai nai by y na pa-rei prau nai ne.
15 Huni akho ly tuikhochi, tavo micheaungchi,
Lebanon mawichi dengdairei leaung kathiu nai
tavochychira i tui nga nai ne.
Neampachy
16 Tosyh ali awi, aho jau;
tokalawi ali awi, kai i akho mang y aho ly
mui kahawichi hawimy amseaung ba.
Kai i khrei nai keung ly mymy i akho theung y kun iy,
hawi keh nai athaichi cho sy.