5
Neampacho
1 Kai i aju angam nai khrei nai awi,
kai ly kaimy i akho theung y kun bo.
Kai ly rimui hawi mura pakym achu bo;
kai ly khawi hang hawi khawi byn cha iy
kreip hang hawi kanu kanei nai ne.
Neampachy
Khrei naichi awi, cho u, nei u;
khrei nai hawimy pavui na pa-rei nei u.
Palyh i khulym
Neampachy
2 Kai ly i nem teu i py, kai i paleung ly i y.
Kai i amang mang y khrei nai keung my katheu takheih nai thai.
Neampacho
Kai i paleung jyn y khrei nai, kai i amprym buhu,
kamngo by y nai kai i khrei nai awi, kai ai kun ai nai pei ba.
Kai i lu ly kadam hawi py,
kai i sam ly kadam tui hawi py suipa na bo.
Neampachy
3 Kai ly ateaungchi aleng yb veng bo;
huna nai y ati mana amchiu teang ai mo?
Kheuchi py pasi pajau veng bo;
ati mana nai y chai hai y teang ai mo?
4 Kai i khrei nai keung ly katheu ai amkhaw nai khala y,
kai ly paleung anghyn na bo.
5 Kai ly khrei nai keung i vui katheu paeaung ai nai ang thau nai khala y,
kai i kiura i mura asitui ly suipa bo;
kai i kiu pajeungchira i mura asitui ly
katheu sengtleng tleaung y leaung bo.
6 Kai ly kaimy naimy khrei nai keung ai
katheu paeaung pi teu i py, ni ly by y vui bo.
Kai ly ni i raawi thai ai nai ngai parai na ly!
Ni ai hau i py niu y;
kapalau i py pathang y bo.
7 Mary amki nai tamcheaungchi ly kai ai niu nai khala y,
no pa-rei ang pakhau u; mary apai typ nai risachi py,
kai i apam nai ateaung sei u piupa bo.
8 Jerusalem mary i neampachychi awi, kai i khrei nai keung ai nangchi avum u lawh baly,
kai ly khrei phi nai paleung akawm naimy awm jo bo, nanai
amti pi ai nai leu adeu u ba.
Neampachychi
9 Neampachy leilachi theung y mo-cha hawi keh nai awi,
nang i khrei nai keung ly amichi hawi ati takhra mo?
Nang teng y kaichi leu adeu ai nai pa-rei,
nang i khrei nai keung ly mana tanrei lyh ai hawi na mo?
Neampachy
10 Kai i khrei nai keung ly mo-cha hawi iy atho py awm;
khumi leaung meaung kateaungreichi theung y, ni ka-tawm leaungrei awm khyh.
11 Ni i meimai ly kheupaja kamta ne iy, amchai dyh na;
ni i sam ly tui leng kamta ne iy,
O-a kamta panum na.
12 Ni i mei hmchi ly leaung pa-jen nai tavo micheaung sahawi y kanu hang ahiu iy
chym nai amprym buhu amai nyhrei kamta apu parai nai ne.
13 Ni i tangbengchi ly asi keungchi, mui katui keungchi hawi
kawi nanai akho kamta khen apu parai.
Ni i labeaungtengchi ly mura asituichi pajui nai
jeupawm pauchi hawi atawm.
14 Ni i kiuchi ly hawi parai; ni ly muku amia hawi thip nai
kiusabyhchi py amchiu.
Ni i tlang ly saphire lengseaung hawi palum nai
kasainu kamta adyh syp nai ne.
15 Ni i phaichi ly muku pachiu tawp nai
leungtau kangleung yhmmawmchi hawi atawm.
Ni ly asang parai nai saitleang keungchi prau nai
Lebanon mawichi kamta apu parai nai ne.
16 Ni i labeaungteng ly khri pa-rei khrei ai nai hawi iy,
ni i amhi amtlau naichi ly khri pa-rei hawi parai.
Jerusalem mary i neampachychi awi,
hini ly kai i khrei nai keung i kucha kahawi ne.