3
1 Kai ly ira tleaung y ka-i nai thym khala y vum tlei tleirei
kaimy i khrei nai keung ai amang amang bo.
Kai ly ni ai hau teu i py niu pajau y.
2 Kai ly ang thau iy mary theung y amki naimy
lamleng lamkuichira y
Kaimy i khrei nai keung ai hau nai ne.
Na i py niu y.
3 Mary pui tamcheaung typ naichi ly kai ai niu.
Kaimy nichi teng y, “Kai i khrei nai keung ai niu u a?” nanai deng.
4 Kai ly tamcheaung typ naichi teng i nai theu chum baly,
kaimy i khrei nai keung ai avum praw ryp bo.
Kai ly ni ai tleaung y pa-rei takawi cheng iy,
kaimy i amhm yhm, kai ai tapen nai takun theung y pahawi bo.
5 Jerusalem mary i neampachychi awi,
nangchi ly kaini i akhrei nai ai taphra y leang mang, nanai leu adeu u.
Angpreng rang nai sisiu sikhichi ai tau iy vaineng abeu u.
Pa-thom i khulym
Neampachy
6 Mura hawi kathan ka-pai sa nai keungchi i jo nai
mui katuichi patawi nai khala theu nai maikhyhchi kamta,
khutaha daichi ka-vym mang y jeu nai ly ati mo?
7 Khen u cham, khumichi ly samrang Solomon ai mymy i areng tamchang hawi angjeaung u nai ly
Israela pri i vawi patyp nai tavaimi risa leaung vui tariureichi py,
typ naimy abang u bo.
8 Hunichi bawibawi ly haisau hawi tavai atiu kawp naichi ne.
Nichi ly tavai atiura y kyhchaw nai risachi ne.
Nichi ly vum y paleung ka-echi my tiu pajau y ai nai
haisau pa u akyhkyh iy typ u bo.
9 Samrang Solomon ly Lebanonra i dengkeaung hawi sa nai
areng tamchang tleaung y atang iy ang jeu bo.
10 Areng tamchang ly tangka hawi mawm iy
salo y ly muku kalangchi hawi thun nai kanih hawi khiu bo.
Areng tamchang atehra kanemchi ly Jerusalem mary
neampachychi i aneng nai kanih kamsen jeaung hawi khiu nai ne.
11 Zion mary i neampachychi awi,
jeu u ly Samrang Solomon ai khen u.
Ni ly mymy i apom nai kanih hawi amo theu nai kani y
amhm my pei nai samrang lukhym adeung nai ne.