SOLOMON I KHULYM
Hini Solomon i khulym theung y nawi keh nai ly neampacho leaungrei hawi neampachy leaungrei, nini i thui hawi leungtang nai akhrei ahawi nai khulymchi pangym achu nai ne. Hebrai cha-iu theung i phyreichi my tapeang nai cha-iu theung y ly hini cha-iu ai, “Solomon i khulym,” nanai amyn pathi. Ati mana nai mo na baly hini cha-iu ai ly samrang Solomon my Hebrai leu y tajiu nai deaungkho y ne.
Juda chengchi my hini khulymchi ly Tameuh hawi, mymy i khumichi sala y amkawm nai sai amteng hai nai ne, nanai py, kristianchi my ly Krista hawi Palau Takhra Kamkawm sala y amkawm nai sai amteng hai nai ne, nanai py thui u pachai reng nai ne.
1
1 Ref 1.1: 1 Kor 4:32. Samrang Solomon i tajiu nai khulym leilachi theung y hawi keh nai khulym ne.
Neampachy
2 Kai ly nangmy pachawm nai avawrei avum nai ne;
nang i khrei nai ly kreip hang tleaung y py hawi keh.
3 Nang i amthym nai rimui ly mui hawi parai;
nang i amyn my ly huni rimui ai pany hai teang bo.
Mani neampachy py, nang ai khrei y nai awm pajau y leang.
4 Kai ai nang hawi vanrei hawi jo kyh ba, ani tako hawi kaliki sina;
kai i samrang lawm ba, kai ai nang i yhm takun theung mang y pahawi ba.
Ani ly amo theu naimy awm ahawi ai;
kreip hang nei iy akhrei ahawi sina.
Neampachy luteng my nang ai khrei nai ly lyh ai nai by y leang!
5 Jerusalem mary i neampachychi awi, kai ly tlang panum teu i py, mo-cha ly hawi;
Keda khutaha daichi ka-vymra i kanih tangbeung kamta panum na teu i py,
Samrang Solomon yhm i jang nai kanih ali hang nai kamta apu parai nai ne.
6 Kai i ngan tlang ly kani kabi my dau i,
panum nai deaungkho y kai ai khen nau u moh.
Kai i amprochi my kai ai kado ang theu hai nai deaungkho y
kreip akhora y kai ai kalop sa hai bo.
Kai ly anglo asa ai nai neng ngo y na.
7 Kai i khrei nai awi,
nang i beram kanghu ai mani meingtym y teicha patlai ai mo, nanai py,
kani thun nai khala mani meingtym y anawn hai ai mo, nanai py kai ai thui pi ba.
Kai ly ati mana nai y nang ai takhra beram typ nai keungchi i
beram kanghuchi theung y hau ai mo?
Neampacho
8 Khrei ai hawi keh nai neampachy awi, huni meingtym nang pany y a?
Beram kanghu nithun abang ly
beram typ nai keungchi i kani tangbeungchi sahawi y
nangmy i mi-ichi i vui teicha patlai nai meingtym hau ba.
9 Kai i khrei nai awi, keaungngonu ly samrang Pharao i ka-ri ryh nai keaungngo kataichi i paleung amchyh hai nai kamta,
nang ly neampachochi i paleung amchyh hai bo.
10 Nang i samchi ly nangmy i tangbengra y apu parai i, muku amia kamta
nang i kaneaungra y apu parai nai ne.
11 Nang i vui tangka hawi ka-pu sa nai muku leng
kaichi my kang thip pi ai.
Neampachy
12 Kai i samrang ly mymy i ira tleaung y aseaung nai thym khala,
kai teng i rimui amseaung bo.
13 Kai i khrei nai ly kai i paleung tleaung y aseaung nai thym khala,
ni teng i mura mui katui kai teng y amseaung na bo.
14 Kai i khrei nai ly Engkadi kreip akhora y pau nai
daichi kaseaungchi hawi atawm nai ne.
Neampacho
15 Kai i khrei nai awi, nang ai khen nai khri pa-rei hawi;
nang i meichi ly khrei ai hawi nai sangso ko na ly!
Neampachy
16 Kai i khrei keh nai awi, nang ly khri pa-rei mo-cha hawi nai deaungkho y,
khri pa-rei khrei ai hawi parai na ly!
Ani ly heng-a nai acha bai ai amyni i ira palawn ai nai py,
17 Saitleang keungchi ai ani i yhm kaleaung tapang palawn ai nai py,
maicha keungchi ai ceiling palawn ai nai py khai hawi ai.