1 Hunaibaly nangchi ly paleung phra nai neng kani tym nai khala y, “Kaichi amo theu naimy awm pajau y leang bo,” nanai thui u ai. Huni neng tym y rai nai saneng nau nai thym khala, amychi ai sa nai keung ai pany u jo ba. 2 Nangchi miteaung acheang u nai khala y kanito, lo, ka-sichi kangvang ly nangchi i vui kangvang jum ryh ai; khupanymchi py veng khiu jo ai. 3 Huna nai khala y nangchi ai ama hai nai nangchi i kiuchi ly ahyn iy, vai atho ham nai kheuchi py atho bai ryh ryh ai; nangchi i hochi py di ryh ai i, teicha teinei taai pajau y ai; nangchi i meichi py phawnja ai i, mei avang hawihai y ai. 4 Nangchi i kanochi py lam mang i katyn kapauchi thai u ai ny y; choh deng nai katyn hawi khulym thui nai raawichi thai vuivai khyh ai. Na i py nangchi ly tavochi i raawi thai nai ryrei my i anglaw ai. 5 Nangchi ly ka-sangra lyn ai nai jei u iy, lam aleaung nai khala py ka-jeira awm ai. Nangchi i sam ly pau ryh ai; nangchi ly nangmychi i tlang ai apako pajau y na pa-rei awm ai; ati sai py ngai nai paleung awm ai ny y. Achi ly amychi kangkhym i anawn ai nai meingtym y tako u ai; huna nai khala vo hai kawp nai khumichi ly lamchira y vo tangam naimy awm u ai. 6 Tangkavui leu vui ai i, muku maisi yhm ly tla nai y kawi ai; tuikan i tui atheu nai vuinawn ly leu nai y, tui kacheang py kawi iy dei lawm vui ai. 7 Hunaibaly achi i tlang ly khaileaung spryh mang y tym ali teang ai i, achi i hengra py, achi ai ang pei nai keung Tameuh teng y tym ali teang ai.

8 Hini leaungsai bawibawichi ly atyhtyh teu, atyhtyh teu, atyhtyh teu, nanai leu kathiu dawn pasym kawp nai khumi kacheng my ly thui nai ne.

9 Na i py leu kathiu dawn pasym kawp nai khumi kacheng ly cheng nai khumi ne iy, mymy i pany kawp nai cheng nairachi ly khumichi teng y patiu pi pateang reng nai ne. 10 Leu kathiu dawn pasym kawp nai khumi kacheng ly paleung awm hai nem nai leuchi ai atho sa iy hau bo. Na i py ni i tajiu nai leaungsaichi ly ka-ym awm nai leuchi ne. 11 Khumi kachengchi i leu ly beramchi typ nai beram typ keung i cheaungvawi kamsui hawi atawm iy, nichi i pateung achu nai thui achi nai leuchi py, khaw parai pa-rei tahen typ nai sengmochi kamta khaw typ jo. Huni leuchi ly achi bawibawi i vui y leaungrei awm khyh nai beram typ keung kalen keh, napi nai Tameuh my ang pei nai ne.

12 Deang awi, nang adawn patyp ai nai harei awm rai; cha-iuchi tajiu nai ly tem bo, nanai by y; amtiu ala nai ly nang i vui atho bai ai.

13 Hina nai kathui chum baly thui bi ai nai leaungsai harei awm khyh bo. Nang ly Tameuh ai jei kaji naimy tahm khai iy, mymy i reita leu pei naichi kry ba; ati mana nai mo nabaly hini leaungsaichi sa hai ai nai Tameuh ly khumi ai sa nai ne. 14 Achi i sa nai leaungsai bawibawichi ai hawi nai py ne sy, hawi y nai py ne sy, kangviu y sa nai saichi py ne sy, Tameuh my tara chih ai.