7
Davida ai Nathan my pany hai nai leu
(1 Neng 17:1-15)
1 Samrang Davida ly mymy i samrang yhm y tlamsa naimy awm nai khala y, Areng ly samrang Davida ai paleung ka-echi teng i nai chymme hai nai deaungkho y,
2 Amo Nathan teng y,” “Khen cham, kai ly Seda keung hawi sa nai samrang yhm y awm ai nai nga teu i py, Tameuh i Leu Maikawm Pawm ly kanih yhm theung y awm jo lawh ly!” napi.
3 Nathan my, Areng ly nang hawi vanrei awm nai ne i, nangmy ngai nai kamta so ba,” napi.
4 Na i py huni vum y Areng ly Nathan teng y,
5 kai i miseaung Davida teng y chei iy ni teng y, ‘Nang ly kai i vui Achura Yhm sa ai nai avo y.
6 Israela chengchi ai Aikupta pri i nai pahawi nai dengdai vaini khrairei, kai ly Achura yhm y kaawm vai y. Kanih yhm y naini kaawm naimy, amki aleaung nai ne.
7 Huna nai kamta kaimy i khumichi hawi amki aleaung nai khala y mana khala y py, kai ly kaimy i vawi takhra nai miteaung kehchi teng y, ‘Nang ly ati mana nai kai i vui Seda keung Achura Yhm so pi y lawh mo?’, nanai deng vai y.
8 “Na i py ati cheaungkhang sa thai nai keung kai, Areng ly kai i miseaung Davida teng y, ‘Kai ly nang ai kai i khumi Israela chengchi i samrang lawm ai nai, beram typ nai prang i dengdairei, kang palau nai ne.
9 Nang i chei naira tleirei y kaimy kang awm hai iy, nang i paleung ka-echi tlang tleaung y eaung ai nai pei bo. Kai ly nang ai khaileaung pri y amthang keh nai lu leaungrei lawm hai bo.
10-11 Kai i khumi Israela chengchi i vui awm ai nai meingtym vawi takhra iy, ana patang naira avum hai y naimy, saleaung khuteng chah hai bo. Hini pri y kun khyp khala i dengdairei, khumi hawi y naichi my tiu nai avum teu i py, vai mo mang y ly avum bi ai ny y. Nang ai paleung ka-echi teng i nai lawira nga hai ai i, katu chanauchi peung hai ai, nanai kai adeu bo.
12 Nang ly dei iy ngamsichi hawi vanrei a-up nai khala y, kai ly nang i chapochi theung i leaungrei ai samrang palyn ai i, ni i pri khaw hai ai.Ref 7.12: Sam 89:3-4, 132:11; Joh 7:42; Amt 2:30
13 Ni ly kai i vui Achura Yhm sa ai nai nga ai. Kai ly ni i samrang atehra khaw hai jojo ai.
14 Kai ly ni i ampo lawm iy, ni ly kai i chapo lawm ai. Ni ly sa tamang nai khala y, ampo my chapo ai parip nai kamta, ni ai kaparip ai.Ref 7.14: Sam 89:26-27; 2 Kor 6:18; Heb 1:5
15 Na i py nang teng y samrang au pajau ai nai, kaimy pala vui nai Sawla teng i peang naira la pi veng nai kamta, nang teng i la pi veng ai ny y.
16 Nang i kangpreang ly mana khala py, myh kang y naimy nang i pri ly deungtasa khaw hai jo ai. Nang i peang nai haiho ly mana khala py jum veng ai ny y,’ nanai leu pei nai amti pi,” napi.Ref 7.16: Sam 89.36-37
17 Nathan ly mymy teng y Tameuh my leu pei nai ngiereichi ai, Davida teng y amti pi nai ne.
Davida i kawn nai chiu sa nai
(1 Neng 17:16-27)
18 Samrang Davida ly Areng i kanih yhm theung y kun iy ateh i, “Salo kangteng aw Areng, kai hawi kai i yhm dengtheungchi ly kai i vui nang i pahen naira hawi ataing y leang.
19 Salo kangteng aw Areng, nang ly kai ai jangni i tleaung y pahen na lawh ly. Mo mang i neng khala avum ai nai kai i katu chanauchi i vui leu adeu pi bo. Salo kangteng aw Areng, nang ly hini satang khumi leaungrei teng y pany hai lawh bo ly!
20 Kai ly ati mana nang teng y hnei bi pajau ai mo? Nang i miseaung kai i satang nangmy pany.
21 Nang ly nangmy i kangai dawn nai kamta, hina nai sa nai ne. Kai ai amtiu hai nai, hini len parai nai saichi nangmy sa pi bo.
22 Aw Areng, nang ly khri pa-rei nang parai na ly! Kai i thai nai ryrei nang hawi atawm nai Tameuh, nang ny y baly Tameuh takhra by y.
23 Mani cheng py nang i khumi Israela cheng hawi pata pajau y. Nang ly nangmy i khumichi tavai amsa nai thym khala y, takhra khumichi hawi nichi i tameuhchi ai patheu pi pawn nai ne. Aikupta pri y miseaung i nai lawira nga nai khumichi ai, nangmy i khumi lawm hai bo. Ref 7.23: Leu 4:34
24 Nang ly Israela chengchi ai deungtasarei, nangmy i khumi lawm hai bo. Aw Areng, nang ly nichi i Tameuh lawm bo.
25 Naibaly vai ly aw Areng Tameuh, nang i miseaung kai hawi yhm dengtheung i vui, nangmy adeu pi nai ai deungtasarei khaw hai iy, nangmy i leu pei nai kamta so pi kyh ba.
26 Nang i amyn ly deungtasarei amthang jojo ai. Khumichi my, ‘Ati cheaungkhang sa thai nai Areng ly Israela chengchi i Tameuh ne,’ nanai thui u jojo ai. Nangmy i miseaung Davida i samrang kangpreang py khaw hai ai.
27 Israela chengchi i Tameuh, ati cheaungkhang sa thai nai keung Areng awi, nang i miseaung teng y hini atitichi pany hai iy, nang i miseaung kai i katu chanauchi ai samrang y palyn pi ai, nanai leu pei nai deaungkho y, kai ly nang teng y chiu sa hnei takeng vam nai ne.”
28 “Naibaly aw Areng, nang ly Tameuh ne. Leu adeu naichi py khaw hai bo. Nang i miseaung teng y, hini lyh ai hawi parai nai adeu pi bo.
29 Nang i miseaung, kai i katu chanauchi ly nang i mo y meimai nga ai nai, nichi ai amtheaung hai kyh ba. Aw Areng, nang ly adeu pi yb bo. Nang i amtheaungra ly nang i miseaung kai i katu chanauchi amtym jojo ai nai pei kyh ba,” nanai chiu sa nai ne.