8
Davida i eaung nai tavai atiu naichi
(1 Neng 18:1-17)
1 Neng kra kyh nai bo y Samrang Davida ly Philistia chengchi hawi atiu bi i, nichi ai eaung bo. Naibaly Philistia chengchi i peang nai ly tem hai bo.
2 Naibaly Samrang ly Moba khumichi ai tiu nai pajau i, patiu naira i nga nai khumichi ai khaileaung y atlym hai iy, phy thomrei y phy nyhreichi ai padei hai bo. Hunai deaungkho y Moba khumichi ly Davida i anui y awm i, kahm pei u nai ne.
3 Naibaly Rehob i chapo Zobah samrang Hadadeza ly tleaung mang Euphrat tavo sahawi i khu ka-peaung nga teang ai nai tiu nai thym khala y, Davida my ni ai tiu i pajau vui bo.
4 Davida my keaungngo risa leaung 1,700 rei hawi tavaimi leaung 20,000 reichi ai patiu nai ne. Samrang ly ka-ri chungvairei i vui y, keaungngo chungvairei patiu iy, huni bo i keaungngochi ai ly kheu tabai hai pawn bo.
5 Damaska mary i Suria khumichi ly samrang Hadadeza ai sabawm ai nai jeu u nai khala y, Davida ly nichi ai tiu i, khumi leaung 22,000 reichi ai padei nai ne.
6 Naibaly samrang ly huni khumichi i khu ka-peang theung y tavai tairachi sa nai deaungkho y, nichi ly samrang i peang nai anui y awm i, kahm pei u. Areng my Davida i chei naira tleirei y eaung hai bo.
7 Davida ly Hadadeza i tavai luchi syn nai muku khopuichi vym vui iy, Jerusalem mary mang y syn bo.
8 Samrang ly Hadadeza i peang nai marychi, Betah mary hawi Berothai marychira i kheupaja neangneangchi py vym vui nai ne.
9 Davida my Hadadeza i tavaimi bawibawichi ai tiu i, pajau vui bo nanai Hamath samrang To-i thai bo.
10 Hunai deaungkho y chapo Joram ai Davida teng y pato i, Hadadeza ai eaung vui nai molam y khri pa-rei amo theu parai, nanai leu thui hai bo. To-i ly Hadadeza ai tavai neangneang tiu nai khumi ne. Joram ly mymy hawi vanrei muku, tangka, kheupaja hawi sa nai ateaung alangchi Davida teng y syn pi nai ne.
11 Samrang Davida ly huni vawnsaichi ai chiu sa naira y teaung ai nai Tameuh teng y au bo.
12 Hunai kamta mymy i eaung nai Edom, Moba, Ammon, Philistia hawi Amalek prichira i nga nai muku, tangkachi hawi Hadadeza teng i nga nai vawnsai phyreichi ai py, Tameuh teng y au nai ne.
13 Davida ly palawi leaunghawira i Edom khumi leaung 18,000 reichi ai padei chum nai vawi ali teang nai khala y, ni ly amthang tleaung amthangra bo. Ref 8.13: Sam 60 (Title)
14 Ni ly Edom pri verei y tavai tairachi sa nai deaungkho y, huni pri i khumichi ly ni i anui y awm u. Areng ly Davida i tavai thau naira tleirei y eaung hai nai ne.
15 Davida ly Israela pri verei peang iy, adyh adawi naimy awm ai nai sa bo.
16 Zeruiah i chapo Juaba ly tavailu areng keh ne iy, Ahilud i chapo Jehoshapha ly vuikanai kry nai keung ne.
17 Ahitub i chapo Zadok hawi Abiatha i chapo Ahimelek nini ly pathyp pi nai keungchi ne. Seraiah ly samrang yhm i secretary ne.
18 Jehojada i chapo Benaja ly samrang Davida ai tamcheaung typ nai keungchi i lu ne. Davida i chapochi ly pathyp pi nai keungchi lawm u bo.