6
Leu Maikawm Pawm Jerusalem mary mang y la nai
(1 Neng 13:1-14; 15:25-16:6, 43)
1 Kanirei nai khala y Davida ly Israela pri i vawi patyp nai tavaimi leaung 30,000 reichi ai palau achu iy,
2 Kherubenchi i pakhi deung nai salo y awm nai, ati cheaungkhang sa thai nai deungtasa Areng i amyn pathi nai, Leu Maikawm Pawm la ai nai Juda pri Bala mary mang y amsa u bo.Ref 6.2: Theu 25:22
3 Nichi ly mawi aheung y awm nai Abinada yhm i dengdairei, ka-ri kangtha harei salo y tang iy syn u. Abinada i chapo Uzah hawi Ahio nini ly Leu Maikawm Pawm ka-ri pahawi hawi.Ref 6.3: 1 Sam 7:1-2
4 Ahio ly Pawm mo mang pahawi nai ne.
5 Davida hawi Israela cheng bawibawichi ly Areng i nang parai nai sai palo ai nai ham parai naimy lam u bo. Nichi ly taro champreng, atym, cha-mi, baw hawi sa-rachi beu u nai ne.
6 Nichi ly Nakon i choh atyhra meingtym y tym nai khala y, si kataichi athei nai deaungkho y, Uzah ly Leu Maikawm Pawm ai kiu jaha iy amkhaw cheng nai ne.
7 Areng ly kado theu i, Uzah i sa nai ly tahm khai y nai lawm vui nai y padei vui. Naibaly Uzah ly Leu Maikawm Pawm sahawi y dei bo.
8 Hunai deaungkho y huni meingtym ai Perez Uzah, nanai vaini khrairei palau u. Areng ly Uzah ai kado theu i, pajeng nai deaungkho y Davida ly khri pa-rei kado theu bo.
9 Naibaly Davida ly Areng ai jei nai deaungkho y, “Vai, kai ly hini Leu Maikawm Pawm ai mana angjeaung ai mo?” nanai thui iy,
10 my i awm nai Jerusalem mary mang y syn y naimy, kath mary y awm nai Obed Edom i yhm mang y angjeaung iy tha u bo.
11 Leu Maikawm Pawm ai ly hu y lo thomrei khai i, Areng my Obad Edom hawi ni i yhm dengtheungchi ai amtheaung hai bo.Ref 6.11: 1 Neng 26:4-5
12 Leu Maikawm Pawm saho y Obed Edom i yhm dengtheung hawi ni i awm nai bawibawichi ai, Areng my amtheaung naira pei nai satang ly Davida my thai nai khala y, huni Pawm ai pawi sa hai iy Obed Edom yhm i dengdairei, Jerusalem mary mang y angjeaung vui bo.
13 Leu Maikawm Pawm angjeaung nai khumichi ly kheu kan tariurei takan baly Davida my anawn hai iy, Areng teng y si katai harei hawi veung hawi nai sicho harei kapathypra talam bo.
14 Davida ly ateaung kanem harei naini amthyp iy, Areng i nang parai nai sai palo nai, ham parai naimy lam.
15 Naibaly samrang hawi Israela cheng bawibawichi ly amo theu nai aeu iy, bawchi eng naimy Leu Maikawm Pawm ai, Jerusalem mary mang y angjeaung u nai ne.
16 Pawm ai mary theung y angjeaung u nai thym khala y, Sawla i chaniu Mikhala ly thaibeng pa-kho mang angdeang i, samrang Davida ai achaw naimy lam nai niu baly, samrang ai kaji hai bo.
17 Khumichi ly Pawm angjeaung u i, Davida my sa yb nai tai theung i pasym yb nai meingtymra y khai u bo. Naibaly Davida ly Areng teng y leng patlum nai kapathyprachi hawi amkawm nai kapathyprachi talam nai ne.
18 Huna nai talam chum nai khala y, ni ly ati cheaungkhang sa thai nai keung Areng i amyn y, khumichi ai amtheaung hai bo.
19 Israela pri y awm nai neampacho, neampachy ngireichi ai tako phirei, mawi dang nai akawirei hawi kreip athai phi ha harei anga pa-rei paji pi. Naibaly khumi bawibawichi ly mychi i yhm mang y vawi u bo.Ref 6.19-20: 1 Neng 16:43
20 Naibaly Davida ly mymy i yhm dengtheungchi ai kawn ai nai yhm mang y vawi nai khala y, Sawla i chaniu Mikhala ly ni ai lamchung ai nai theu. Mikhala my, “Kangji by y nai khumi ka-khum i ateaung alei nai kamta, miteaung kehchi i miseaung neampachychi i mo y, amy i ateaung alei nai Israela samrang ly vaini, phum-ang len parai na ly!” napi.
21 Davida my, “Kai ai nang i ngampo hawi katu chanauchi ai katlen hai vui iy, Israela chengchi i lu lawm ai nai vawi takhra pi nai, Areng i nang parai nai ai palo nai ka-lam nai teu. Areng i tahm awm nai palo ai nai, mo mang py lam ai i,
22 kaimy i tlang ai hini tleaung y kangji kangai nga hai ai. Nang ly kai ai tahm khai y teu i py, huni miseaung neampachychi my tahm ang khai u ai,” napi.
23 Sawla i chaniu Mikhala ly mymy deungrei, cho chanau ngo y bo.