24
Samrang Davida my khumi amyn vuikanai la nai
(1Neng 21:1-27)
1 Huni bo y Areng ly Israela chengchi tlang tleaung y kado theu nai deaungkho y, nichi ai pajeng ai nai molam, Davida ai kamngo sa hai. Areng my Davida teng y, “Chei ly Israela hawi Juda pri y khumi vuikanai lo.” napi.
2 Hunai deaungkho y Davida ly my i tavailu areng keh Juaba teng y, “Nang i tavai luchi hawi vanrei khuteng katem y khrairei, Israela cheng awm naira tleirei y chei ly khumi vuikanai lo u achu. Khumi vuikanai majirei awm mo, nanai kai pany ai nai ngai,” napi.
3 Na i py Juaba my, “Samrang awi, nang i Areng Tameuh ly Israela chengchi ai vai i tleaung y phy chungvairei peung hai na sy; nang my hunai kamta peung nai niu nai pa-rei heng sau sy. Na i py samrang nang ly ati mana nai y, hina nai sa ai nai ngai lawh mo?” napi.
4 Na i py samrang ly Juaba hawi tavai luchi teng y, my i leu pei nai kamta sa hai. Nichi ly Israela cheng khumi vuikanai la ai nai, mymy teng i nai theu u bo.
5 Nichi ly Jordan tavo angpeang u chum baly Kad khu ka-peang leaunghawi um y awm nai Aroer mary tokalawi mang y tai u. Naibaly hunira i dengdairei tosyh mang y awm nai Jaza mary mang py,
6 hu i nai bi baly Kilead pri hawi Hiti khu, Kadesa mary mang py khuleaung amsa u bi nai ne. Naibaly Dan mary hawi Sidon mary tengtang y chei u bo.
7 Naibaly yhm ka-sang awm nai Turu mary mang y chei iy Hivit chengchi hawi Kanani chengchi awm nai marychi mang py, kangkhym y Juda pri tokalawi mang y awm nai Beraseba mary mang py chei u nai ne.
8 Hunai deaungkho y nichi ly pri tleirei y amki iy, lo takawrei bo y kani apomrei bo baly, Jerusalem mary y vawi u teang bo.
9 Nichi ly Israela pri y tavai thau pajau nai khumi leaung 800,000 rei hawi, Juda pri y leaung 500,000 rei awm, nanai samrang teng y amti pi bo.
10 Na i py Davida ly khumi amyn vuikanai la chum nai khala, mymy teng y patang nairachi tym i Areng teng y, “Kai ly hini ka-jei awm nai kamngo sa lawh bo; kai i kamngo pahen pi kyh ba; kai ly kamthu kamleaung kamta sa tamang lawh bo,” napi.
11-12 Areng ly Davida i amo Kad teng y, “Nang ly Davida teng y chei ly kai i sa ai awm nai amjy thomreichi theung y, ngai nai harei vawi ai nai thui pi; ni i vawi nai baly kaimy sa ai,” napi. Kani pa-nyh khawn mang Davida i anglaw nai khala,
13 Kad ly jeu i, my teng y Areng i leu pei nai kamta samrang teng y thui pi i, “Samrang awi, nang i pri theung y saneng thomrei takang theu nai, paleung ka-echi teng i lo thomrei preang nai, kani thomrei no kanghawi tym nai, hunichi theung y mani patangra ngai mo? kai ly Areng teng y mana pathang ai mo, nanai adawn ba,” napi.
14 Davida my, “Kai ly khri pa-rei rai naira avum lawh bo hi ly! na i py khumi my pajeng nai ly tym hai mo sy; Areng my phai pajeng na sy. Mymy ly pahen nai keung ne,” nanai Kad teng y thui pi.
15 Hunai deaungkho y Areng ly khawn mang dengdairei khai yb nai neng ryrei, Israela chengchi tlang tleaung y chym thai nai no kanghawi tym hai bo. Khuteng katem y khrairei, Israela cheng leaung 70,000 reichi dei nai ne.
16 Areng i kani pri amtaw thau my Jerusalem mary ai taphra ai nai thym khala, Areng ly khumichi ai pajeng nai molam y paleung amtlau teang i, kani pri amtaw thau teng y, “Angym bo! anawn jau!” napi. Huni neng khala kani pri amtaw thau ly Jebusi cheng Araunah i choh ati nai meingtym sahawi y angdo nai ne.
17 Khumichi ai pajeng nai kani pri amtaw thau ai Davida my niu nai khala, Areng teng y, “Kamngo awm nai ly kai ne; sa tamang nai khumi ly kai ne; hini khumichi ly ati kamngo sa u mo? nang ly kai hawi kai i yhm dengtheungchi ai naini, pajeng naira tym hai ba,” napi.
18 Huni kani y my Kad ly Davida teng y chei i ni teng y, “Nang ly Jebusi khumi Araunah i choh ati nai meingtym y chei ly Areng i vui maicham so,” nanai Areng i leu pei nai amti pi bo.
19 Davida ly Areng i leu pei nai kamta Araunah i choh ati nai meingtym y chei bo.
20 Araunah ly khen i, mymy mang y samrang hawi bangtangchi jeu nai niu khala, Davida i mo y khaileaung y angbeu iy,
21 “Samrang awi, ati mana nai hini meingtym y jeu lawh mo?” napi.
Davida my, “No kanghawi anawn vui thai ai nai molam y, Areng i vui maicham sa ai nai ngai nai deaungkho y, nang i choh ati nai meingtym vang ai nai kang jeu nai ne,” napi.
22 Araunah my, “Samrang awi, hini choh atyhra meingtym lo ba; nang i ngai nai kamta Areng teng y talam ba. Maicham salo y leng patlum ai nai si kataichi py hi y awm; theng palawn ai nai li thawnra taveangchi, choh atyhra ateaungchi py, hi y awm.
23 Hini bawibawichi samrang nang teng y kang talam bo; nang i Areng Tameuh ly nang i talam naichi kawn pi na sy,” napi.
24 Na i py samrang my, “Hina nai ny y leang, vang kang pei ai; kai ly vang pei y naimy nga nai katalamrachi ai, kai i Areng Tameuh teng y talam ai ny y,” napi. Naibaly samrang ly choh ati nai meingtym hawi sichi ai, tangkacho vui pangrei hawi van bo.
25 Samrang ly huni meingtymra y Areng i vui maicham sa iy leng patlum nai hawi amkawm teang nai kapathyprachi talam bo. Areng my py samrang i chiu sa nai pathang pi i, Israela pri y no kanghawi anawn hai bo.