23
Davida i kangkhym leu
1 Tameuh my tahm pasang nai samrang lawm iy, Jakob i Tameuh my khai takhra nai Israela pri y tangai hawi parai nai khulym adi nai keung, Jese i chapo Davida i kangkhym i thui nai leu ly hinichi ne:
2 Areng i phailo ly kai mang dengdairei leu pei bo;
mymy i leu ly kai i labeaung teng y awm.
3 Israela chengchi ai atleu nai keung,
Israela chengchi i Tameuh ly kai teng y hina nai leu pei bo:
“Tameuh ai jei kaji naimy tahm khai iy,
leu meitang adyh adawi naimy peang nai samrang ly
4 kani nai chum nai bo y khupanym aheang pawn i,
khutawimo neng khala achachi kangvang sadi hai nai kanito hawi atawm.”
5 Hunai kamta teang, Tameuh ly kai i katu chanauchi ai amtheaung naira pei ai;
ati mana nai mo nabaly mymy ly phra pajau y,
athli vui thai y nai deungtasa Leu Maikawm ly
kai hawi asa nai deaungkho y ne.
Hunaibaly kai i kangai angym bo;
hini ly kai i eaung naira ne;
huna nai kamta tym hai ai nai Tameuh ly dawn pi khyp ai.
6 Na i py Tameuh ai pany y nai khumichi ly aphi su nai aleng keungchi hawi atawm;
huni aleng keungchi ai ly ami py kiu hawi syn pajau y.
7 Hunichi ai syn ai nai tamo ateaung, ti y baly tivi teaung ai nai tla;
huni aleng keungchi ly mai hawi leng iy taphra naira avum ai.
Davida i amyn amthang nai sorai risachi
(1Neng 11:10-41)
8 Hini ly Davida i sorai risachi i amynchi ne: angchei i sorai risa ly Haponi mary y awm nai sorai risa leaung thomreichi i lu Joshe Bashebeth ne. Ni ly atiu nai tlenreira my, khumi leaung chungvai tajareichi ai my i tivi hawi thun iy padei pajau nai keung ne.
9 Sorai leaung thomreichi theung i pa-nyh sorai ly Ahoh i cheng theaung Dodo i chapo Eliaza ne. Kanirei nai khala y Eliaza ly tavai atiu ai nai angveirym nai Philistia chengchi ai tiu ai nai Davida hawi vanrei abang bo. Israela chengchi nithun mang y anaw u i py,
10 ni ly anaw y naimy kiu khohai iy haisau patlaw thai y na pa-rei, Philistia chengchi ai tiu bo. Huni kani y Areng ly eaung pui eaung hai nai deaungkho y, atiu nai pajau nai khala Israela chengchi ly kadeichi teng i, tavai ateaungchi la ai nai Eliaza i awm naira y jeu u bo.
11 Pa-thom i sorai ly Aki i chapo, Harar mary i khumi Shamah ne. Philistia chengchi ly khubi bai awm nai Lehi meingtym y angym u. Israela chengchi ly Philistia chengchi teng i dengdairei, preang u pawn teu i py,
12 Shamah ly khubi bai i anaw y naimy, amtang iy Philistia chengchi ai tleh i, huni kani y Areng ly eaung pui eaung hai bo.
13 Chohkatui neng kasa nai khala y, risa leaung phaireichi theung i amyn amthang nai sorai leaung thomreichi ly Davida awm nai Adulam mang y satla u kathiu bo. Huni neng khala Philistia cheng phyreichi ly tavai tiu ai nai Rephaim leaunghawira y akachu u thym nai ne.
14 Huni neng y Davida ly mawi saleung i amtangra theung y awm iy, Philistia cheng phyreichi ly Bethlehem mary ai tiu vui bo.
15 Davida ly yhm mang y adawn nai deaungkho y, “Bethlehem mary apai katheu pa-kho sahawi y awm nai tuikanra i tui kanei ai nai, leaung leaungrei my jeu hai khyly!” nanai kadeaung bo.
16 Amyn kamthang risa leaung thomreichi ly Philistia tavaimichi tai naira theung y kun prei iy, tuikanra i tui deu i, Davida teng y tym hai. Na i py samrang ly huni tui nei y i, Areng teng y talam nai leih vui iy,
17 “Aw Areng, kai ly mana mo i py hini tui nei pajau y leang! mychi i tlang areu naimy tui deu naichi i thi kanei nai hawi atawm ai!” napi. Hunai deaungkho y nei y bo.
Hini ly amyn amthang nai sorai risa leaung thomreichi i sa vam nai saichi ne.
18 Juaba i amnau Abisai ly amyn amthang nai risa leaung phaireichi i lu ne. Ni ly khumi leaung chungvai thomreichi ai tivi hawi padei pajau nai deaungkho y, amyn amthang nai risa leaung phaireichi theung y amyn len nai ne.
19 Ni ly amyn amthang nai risa leaung phaireichi theung y amyn len nai ne i py, sorai risa leaung thomrei kamta ly amyn len y. Davida ly ni ai tamcheaung typ naichi i lu ra y khai bo.
20 Kazila mary y awm nai Jehojada i chapo Benaja ly amyn amthang nai sorai risa leaungrei ne. Ni ly vam parai nai kalopchi sa; ni ly khri pa-rei tlang atho awm nai Moba tavaimi risa leaung nyhrei ai padei nai ne. Naibaly khri pa-rei savai nanai kaseih neng, kanirei nai khala y ni ly tapiu theung y kun iy, khrangsi harei ai padei pajau.
21 Ni ly khri pa-rei tlang len iy tivi syn nai Aikupta khumi leaungrei ai py padei nai ne. Benaja ly huni khumi ai tamtleang hawi ni iy, ni teng i tivi lawm vui; naibaly huni tivi hawimy, huni khumi ai padei nai ne.
22 Hini ly amyn kamthang risa leaung phaireichi theung i, Benaja i sa vam nai saichi ne.
23 Ni ly amyn amthang nai risa leaung phaireichi theung y amyn amthang nai ne i py, sorai risa leaung thomrei kamta amyn len y. Davida ly ni ai tamcheaung typ nai risachi i lu y khai bo.
24-39 Amyn amthang nai risa leaung phaireichi theung y abawi naichi ly hinichi ne:
Juaba i amnau Asahela
Bethlehem mary y awm nai Dodo i chapo Elahanan
Harod mary y awm nai Shamah hawi Elika
Pelet mary y awm nai Heleza
Tekoa mary y awm nai Ikesa i chapo Ira
Anatho mary y awm nai Abieza
Husha mary y awm nai Mebunai
Ahoh mary y awm nai Zalmon
Netopha mary y awm nai Maharai
Netopha mary y awm nai Baana i chapo Heleb
Benjamin khu Kibeah mary y awm nai Ribai i chapo Itai
Pirathon mary y awm nai Benaja
Kasa sahawi i leaunghawi ra y awm nai Hidai
Arabah mary y awm nai Abiabon
Bahurim mary y awm nai Azamaveth
Shaalabon mary y awm nai Elijaba
Jashan i chapochi
Jonathan
Harar mary y awm nai Shamah
Harar mary y awm nai Shara i chapo Ahiam
Maaka mary y awm nai Ahasabai i chapo Eliphelet
Kilo mary y awm nai Ahithophela i chapo Eliam
Karamela mary y awm nai Hezaro
Arab mary y awm nai Paarai
Zobah mary y awm nai Nathan i chapo Ikala
Kad khura i Bani
Ammon cheng Zelek
Zeruiah i chapo Juaba i tavai ateaung syn pi nai Beeroth mary i khumi Naharai
Jatti mary y awm nai Ira hawi Kareb
Hiti cheng Uriah
Hinichi bawibawi ly amyn amthang nai risa leaung phai palyh leaung saryhreichi ne.