ANGCHEI I
ARENGKEH
1 Arengkeh hawi 2 Arengkeh cha-iu theung y peang nai samrang leaung leaungreichi ai dawn pasym baly, Tameuh i tlang tleaung y ka-ym awm mo, by y mo, nanai dawn pany pajau. Ka-ym awm nai deaungkho y pri ly chawn, pa naira nga; myn chiu iy reita leu pei naichi patawm y nai deaungkho y pri ly phra naira tym, nanai pany hai bo. Tosyh pri y peang nai samrang bawibawichi ly Tameuh i tlang tleaung y ka-ym by y nanai py, Juda pri y peang nai samrangchi theung y ka-ym awm nai hawi ka-ym by y naichi akatlem piupa naimy awm nanai py, tajiu typ nai ne.
1 Arengkeh cha-iu theung y pany ai hawi keh nai thui pi patyp nai ly Areng i amochi satang ne. Hunichi my ly myn ai chiu y ai nai hawi, Tameuh i leu pei nai tangai ai nai khumichi teng y vam parai naimy thui pi nai keungchi ne. Aly len keh nai ly (pakeung 18) reita y pany hai nai Bala i amochi hawi acham nai amo Elija i satang ne.
1
Samrang Davida miteaung cheang nai
1 Samrang Davida ly khri pa-rei miteaung cheang nai khala, miseaungchi my kanihchi khiu pi teu i py, ngan kabi ngo pajau y bo.
2 Hunai deaungkho y samrang i bangtangchi my ni teng y, “Samrang awi, nang ai kry ai nai hawi pasawm patau ai nai anglo leaungrei, kaichi my hau pi ai. Huni neampachy ly nang i sahawi y abiri naimy i ai i, nang ai bi-um pa-rei ang sa pi ai mang,” napi u.
3 Naibaly nichi ly Israela pri verei theung y mo-cha hawi parai nai neampachy leaungrei ai hau u i, Shunem mary y awm nai Abisha napi nai anglo ai avum; naibaly ni ai samrang teng y hawi u.
4 Mo-cha khri pa-rei hawi parai nai huni neampachy ly samrang ai pachawm patau bo; na i py samrang ly ni hawi ta-pui ta-chi apho ahawi y leang.
Adonijah ly samrang atheng vui ai nai atho sa nai
5-6 Davida hawi Hakith nini i chapo Adonijah ly khri pa-rei mo-cha hawi parai; Abasalom dei nai bo baly ni ly Davida i chapochi theung y, chapo kalen lawm bo. Davida ly ni ai ati mo ra py, thui parip nai awm vai y; ni ly samrang lawm ai nai athang khai nai ne i, my i vui ka-richi, keaungngochi hawi mo amtheung nai khumi leaung vui pangreichi py awm.Ref 1.5: 2 Sam 3:4
7 Ni ly Zeruiah i chapo Juaba, pathyp pi nai keung Abiathachi hawi adeng ahui i, nichi my ni ai sabawm ai nai ngai u bo.
8 Na i py pathyp pi nai keung Zadok, Jehojada i chapo Benajah, amo Nathan, Shimei, Re-i hawi Davida i tamcheaungchi ly Adonijah mang y abawi u y leang.
9 Kanirei nai khala y Adonijah ly Anrokela micheaung sahawi i pavui lengseaungra y beram, si katai, veung hawi nai sichochi hawi apathyp bo. Davida i takhra chapochi hawi Juda pri samrang i bangtangchi ai py huni pawira y palau.
10 Na i py ampo y vanrei, amhm takhra nai amnau Solomon, amo Nathan, Benajah hawi samrang i bangtangchi ai ly palau y nai ne.
Solomon ai samrang palyn nai
11 Hunaibaly Nathan ly Solomon i amhm Bethaseba teng y chei i ni teng y, “Hakith i chapo Adonijah ly mymy ai mymy naimy samrang y apalyn nai ly thai bo a? Samrang Davida malawn py huni satang thai y leang rai!Ref 1.11: 2 Sam 12:24
12 Nang ly nangmy i tlang hawi nang i chapo Solomon i tlang ai atleu ai nai ngai baly, nang ai kaimy tau kang pei ai.
13 Nang ly vaimy samrang Davida teng y chei iy ni teng y, ‘Samrang awi, kai i chapo Solomon ai nangmy i meingtym samrangra y kapalyn ai, nanai kai teng y adeu khyp nai ny y a? Vai ly ati mana nai deaungkho y Adonijah ly samrang lawm vui lawh mo?’ nanai deng.
14 Hunai kamta deng nai thym khala y kai ly kun ai i, nang i leu khaw hai ai,” napi.
15 Hunai deaungkho y Bathaseba ly samrang ira takun theung mang y samrang hawi avum ai nai chei bo. Samrang ly khri pa-rei miteaung cheang bo i, Shunem mary i neampachy Abisha my ni ai pasawm patau nai ne.
16 Bathaseba ly samrang i mo y lu meung nai khala y samrang my, “Nang ly ati aly ngai nai mo?” nanai deng.
17 Bathaseba my, “Samrang awi, nang ly kai i chapo Solomon ai nangmy i meingtym amtym ai i, samrang palyn ai, nanai nangmy i Areng Tameuh i amyn y leu adeu bo.
18 Nai i py vai, Adonijah ly samrang y lyn vui bo; huni satang ly nang pany y leang rai.
19 Ni ly si katai, beram, veung hawi nai sichochi hawi apathyp i, nang i chapochi, pathyp pi nai keungchi hawi, nang i tavailu areng Juaba ai py heang bo; na i py nang i chapo Solomon ai ly heang y.
20 Samrang awi, nang i meingtym samrang y ami ai palyn ai mo, nanai Israela cheng vereichi ly nang i leu ajeng u nai ne.
21 Nang ly hinai kamta leu pei y baly, kai hawi kai i chapo Solomon ly nang by y vui nai bo y, reita taphra naichi ang palawn ai i, khumi hawi y naichi lawm ai,” napi.
22 Hunai kamta amti pi nai thym khala y amo Nathan tym.
23 Amo tym nai satang samrang teng y amti pi u bo. Nathan py takun theung y kun iy samrang i mo y lu meung naimy,
24 “Samrang awi, Adonijah ai nang i meingtym y amtym hai ai nai nangmy satang thai hai bo a?
25 Vaini my ni ly maichamra y chei iy si katai, beram, sicho veung hawi naichi hawi apathyp bo. Ni ly nang i chapo bawibawichi hawi, nang i tavailu areng Juaba hawi, pathyp pi nai keung Abiatha ai py heang i, vai i neng y nichi ly Adonijah hawi vanrei cha nei u iy, ‘samrang Adonijah heng sau sy!’ nanai aeu u bo.
26 Na i py Adonijah ly nang i miseaung kai hawi, pathyp pi nai keung Zadok, Benaja hawi, Solomon ai ly heang y.
27 Hina nai sa naichi ai ly nangmy ngai nai sai a? Nang i samrang meingtym y ami ai palyn ai mo, nanai nangmy i bangtangchi teng y pany hai y pui naimy, hina nai kamta nang sa lawh a?” napi.
28 Samrang Davida my, “Bathaseba awi, takun theung y kun teang ba,” napi i, Bathaseba ly kun iy ni i mo y angdo.
29 Naibaly samrang my, “Kai ai patang naira cheaungkhang theung i atleu nai keung, heng nai Areng i amyn y kai, leu adeu mang.
30 Kai ly nang i chapo Solomon ai kai i meingtym y amtym ai nai samrang kapalyn ai, nanai Israela chengchi i Areng Tameuh i amyn y vaineng adeu nai kamta kai, kasa ai, nanai vaini kai adeu mang,” napi.
31 Bathaseba ly lu meung naimy, “Kai i areng, kai i samrang ly heng sau sy!” nanai thui.
32 Naibaly samrang Davida ly Zadok, Nathan hawi Benaja ai palau hai bo. Nichi tym u nai khala,
33 samrang my nichi teng y, “Kai i bangtangchi ai palau u ly kai i chapo Solomon ai kai i keaungngo kano kasau tleaung y atang hai iy, Kihon micheaung mang y pahawi u.
34 Huni meingtym y Zadok hawi Nathan nini my ni ai, Israela samrang lawm ai nai asitui leih pi hawi sy. Naibaly baw eng iy, ‘Samrang Solomon heng sau sy!’ nanai aeu u.
35 Ni ly kai i samrang atehra tleaung y ateh ai nai, hi y vawi ali teang nai khala nangchi py, ni i nithun abang u ai nai tla. Ni ai ly Israela pri hawi Juda pri i vui samrang lawm ai nai kaimy vawi takhra bo. Hunai deaungkho y ni ly kai i meingtym y amtym nai samrang lawm ai,” napi.
36 Benaja my, “Nang i leu pei nai kamta kasa pi ai. Nang i Areng Tameuh my py, huni leu pei nai khaw hai sy.
37 Areng ly nang hawi vanrei awm hai nai kamta, Solomon hawi vanrei py awm hai iy, ni i peang nai neng khala ly nang i peang nai neng tleaung y nang chawn hai keh na sy,” napi.
38 Hunai deaungkho y Zadok, Nathan, Benaja hawi samrang i tamcheaung risachi ly Solomon ai samrang Davida i keaungngo kano kasau atang hai iy, Kihon micheaung mang y chei hai u bo.
39 Zadok ly Areng i awmra taichyra i asitui syn iy, Solomon ai samrang palyn nai asitui leih pi bo. Huni bo y baw eng nai khala khumi bawibawichi ly “Samrang Solomon heng sau sy!” nanai aeu u.
40 Naibaly amo theu parai naimy aeu u iy, byhlyhchi eng u i, khaileaung amchyh na pa-rei katyn pasau naimy, Solomon nithun abang u bo.
41 Adonijah hawi ni i angvynchi ly cha nei u nai pajau u vi nai khala, huni katyn thai u nai ne. Juaba ly baw eng nai katyn thai nai khala y, “Mary theung i hini katyn ly ati mana nai mo?” nanai deng.
42 Ni i leu tem y rai khala my pathyp pi nai keung Abiatha i chapo Jonathan tym i Adonijah my, “Kun ba, nang ly khumi kahawi ne i, satang kahawi syn nai khumi ne ai,” napi.
43 Jonathan my, “Satang kahawi athang khai y; achi i areng samrang Davida ly Solomon ai samrang palyn veng bo.
44 Samrang ly Zadok, Nathan, Benaja hawi samrang i tamcheaung risachi pato i, Solomon ai samrang i keaungngo kano kasau tleaung y tang iy, pahawi hai bo.
45 Naibaly Zadok hawi Nathan nini my Solomon ai, Kihon micheaungra y samrang palyn nai asitui leih hawi bo. Nichi ly amo theu aeu u naimy, mary theung y kun u i, mary i khumichi ly vai, aeu nai raawi tyn tukulu nai ne. Nang i thai nai katyn ly huni khumichi i katyn ne.
46 Solomon ly vai, samrang lawm veng bo.
47 Samrang i bangtangchi ly samrang Davida teng y tahm khai ai nai chei u iy, ‘Nang i Tameuh ly Solomon ai, nang tleaung y amthang hai keh sy; nang i peang nai deung tleaung y Solomon i peang nai deung ly nang chawn nai pri lawm hai sy’ napi u bo. Naibaly samrang Davida ly mymy i ira tleaung y lu meung naimy,
48 ‘Kai i kangpreang theung i leaungrei ai samrang y palyn pi nai khyh chang y i, kai ai py hunichi niu ai nai pei nai keung, Israela chengchi i Areng Tameuh ai palo u sina,’ nanai chiu sa bo,” nanai pathang.
49 Naibaly Adonijah i angvynchi ly jei u nai deaungkho y ang thau i, vawi u akyhkyh pawn bo.
50 Adonijah ly Solomon ai khri pa-rei jei nai deaungkho y, Areng i awmra taichy yhm theung y kun iy, maicham takichi amkhaw cheng naimy,
51 “Samrang Solomon ly kai ai padei ai ny y, nanai vaineng adeu man sy,” nanai thui. Huni satang ai samrang Solomon teng y amti pi u nai ne.
52 Solomon my, “Ni ly ka-ym awm nai khumi ne baly, ni i lura i sam amairei ai malawn py, kiupajeung kadeaung hawi teaung y ai; ka-ym by y nai khumi ne lawh baly dei naira avum ai,” napi.
53 Naibaly samrang Solomon ly khumi pato iy, Adonijah ai maichamra i nai palau hai bo. Adonijah ly samrang teng y tym i, ni i mo y lu meung naimy chiu bo. Naibaly samrang my ni teng y, “Nangmy i yhm y vawi pajau bo,” napi.