22
Davida i eaung nai khulym
(Sam 18)
1 Davida ly Sawla hawi takhra paleung ka-echi kiu i, Areng my atleu pi nai khala y, hini khulym hawi Areng ai palo bo.
2 Areng ly kai ai atleu nai keung,
kai i khaw parai nai khengsi apai ne.
3 Kai i Tameuh ly kai ai atleu nai deaungkho y,
kai ly chymme naira nga bo.
Mymy ly khupui kamta kai ai ama hai;
mymy ly kai mang y asa hai iy kai ai chymme naimy ang khai bo.
Mymy ly kai i atleu keung ne;
kai ai ama hai iy pahyp y naimy ana naira i py atleu bo.
4 Kai ly Areng teng y hnei takeng nai khala,
mymy ly kai ai paleung ka-echi kiu i nai atleu pi bo.
5 Dei areng i tui sampyhchi ly kai ai katanmeuh bo;
tama naira tui sampyhchi ly kai i tlang tleaung y um na bo.
6 Tavau pri i vuinawnchi ly kai ai ang pi na bo;
dei areng ly kai ai patiu ai nai deaung pateung yb bo.
7 Kai ly patang naira theung i nai Areng ai kapalau bo;
kasabawmra nga ai nai kaimy i Tameuh teng y aeu nai ne.
Mymy ly Achura yhm theung i dengdairei, kai i raawi thai;
kasabawmra nga ai nai kai i aeu nai raawi thai bo.
8 Hunaibaly Tameuh i kado theu nai molam y
khaileaung ly amchyh na;
kani mang i atitichi ly ahyn u bo.
9 Notareang theung i dengdairei maikhyhchi py,
labeaung mang dengdairei kang hai reng nai mai kadeu hawi mai-aichi py theu bo.
10 Mymy ly kani katheu paeaung iy satla kathiu bo;
kheu padawi anui y vengpang nai khupanymchi awm.
11 Mymy ly Kheruben tleaung y atang naimy,
ali kamrawi y satla kaliki bo.
12 Mymy ly mymy ai kaveng hawimy khiu bo;
mymy i sahawi y tui kamhui kawi meng nai khupanymchi awm.
13 Mymy i mo y amlosadi theu nai deaungkho y, mai-aichi ly a-ai jawn na bo.
14 Naibaly Areng ly kani mang dengdairei, kani pajyh hai;
ati cheaungkhang sa thai nai Tameuh i raawi ly theu.
15 Mymy ly thailihochi hawi ko iy paleung ka-echi ai ahei hai;
amlosadi theu hai iy nichi ai preang hai bo.
16 Areng ly paleung ka-echi tlang tleaung y
kado theu iy hang hai nai khala,
suida pangli paichi hawi khaileaung i
langdengchi amteng seaungkhrang na bo.
17 Areng ly kani mang dengdairei kiu jaha iy, kai ai amkhaw bo;
tui thiu parai naira i dengdairei kai ai atleu bo.
18 Mymy ly sa thai naira awm nai paleung ka-e,
kai ai niu ngai y nai khumi bawibawichi kiu i nai kai ai atleu bo.
Nichi ly kai, hui kai pajau y na pa-rei atho awm.
19 Kai patang naira avum nai khala y, nichi ly kai ai tiu u;
na i py Areng ly kai ai ama hai bo.
20 Mymy ly kai ai patangra i nai lawi hai ai nai sabawm;
kai ai paleung bie nai deaungkho y atleu bo.
21 Kai ly kateng sa nai deaungkho y, Areng ly kai ai kawn vangchi pei;
kai ly kamngo by y nai deaungkho y, mymy ly kai ai amtheaung hai bo.
22 Kai ly Areng i reita leu pei naichi tangai nai ne;
kaimy i Tameuh ai nithun thun vai y leang.
23 Kai ly mymy i reita leu pei nai ngiereichi kry bo;
mymy i leu pei naichi ai akhi vai y leang.
24 Kai ly kamngo by y nai khumi nanai py,
hawi y nairachi amkyn nanai py, mymy pany.
25 Huna nai y kai ly kamngo by y nai khumi ne, nanai pany nai deaungkho y py,
kai ly kahawi sa nai deaungkho y py, mymy ly kai ai kawn vangchi ang pei.
26 Aw Areng, nang ly ka-ym awm nai khumichi ai, ka-ym awm naimy kry bo;
cheh ai nai by y na pa-rei hawi angym naichi ai py, temra by y na pa-rei pahen pi ai.
27 Paleung y chai nai khumichi teng y chai nai paleung ka-dawn py,
khumi hawi y naichi teng y paleung ka-awi py, amteng hai ai.
28 Mymy ly paleung apanem nai khumichi ai atleu;
na i py paleung len amlyh nai khumichi ai ly tahm anem hai bo.
29 Aw Areng, nang ly kai i kangvang ne iy,
kai i veng naira ai angvang hai bo.
30 Nang ly paleung ka-echi ai tiu ai nai atho py,
nichi i amtangrachi taphra ai nai sa thai naira py, kai ai pei bo.
31 Hini Tameuh i sa nai kalopchi ly angym nai ne;
mymy i leu py ym ai nai hawi parai na ly!
Mymy ly mymy ai ym nai
khumi bawibawichi i vui khupui kamta ne.
32 Areng leaungrei naini Tameuh ne;
Tameuh naini achi i abyhra ne.
33 Hini Tameuh ly kai i abyhra, khaw parai nai khengsi apai ne;
mymy ly kai i tako ai nai lam ai chymme hai bo.
34 Mymy ly kai ai sisiu kamta kheu khaw hai iy,Ref 22.34: Hab 3:19
mawichira y chymme naimy ang khai.
35 Ham parai nai thailiho a-eaung pajau ai nai
tavai keung i vui, kai ai acham hai bo.
36 Aw Areng, nang ly kai ai ama hai iy atleu bo;
nang ly sabawm nai deaungkho y, kai ly veang ryh nai ne.
37 Nang ly kai ai paleung ka-e my patiu pajau y ai nai ka-vo sa pi;
kai ly mana khala py sum nai avum vai y.
38 Kai ly paleung ka-echi ai patiu iy
nichi ai tiu nai pajau y ryrei ly anawn ai ny y.
39 Kai ly paleung ka-echi ang thau pajau y pa-rei tiu bo;
nichi ly kai i kheu keung y atlym u i, sum u nai ne.
40 Nang ly kai ai tavai thau pajau ai nai atho pei;
paleung ka-echi tlang tleaung y eaung ai nai py pei bo.
41 Nang ly kai mo i paleung ka-echi ai angpreng hai pawn bo;
kai ly kai ai niu ngai y nai khumichi ai tamyh pawn ai nai nganai ne.
42 Nichi ly atleu ai nai keung hau i py, atleu nai keung by y;
Areng ai palau u teu i py, pathang pi y.
43 Kai ly nichi ai tamyh nai deaungkho y, nichi ly spryh kamta dei lawm u na bo;
lam salo i aneaung kapan chiu nai kamta, kai ly nichi ai kachiu bo.
44 Nang ly kai ai tiu nai mipuichi kiu i nai atleu iy,
khumi cheng cheaungkhangchi ai peang ai nai pei bo.
Kai apany vai y nai khumichi ly vai i neng y kai teng y kahm pei u.
45 Cheng takhra khumichi ly kai i mo y lu meung u;
nichi ly kai i leu pei nai thai baly, tangai u nai ne.
46 Nichi ly sorai paleung tama u veng bo i,
mychi i lengseaung yhmchi ra i nai, kaso theu naimy theu u bo.
47 Areng ly heng! kai ai ama hai nai keung ai palo u!
Sa thai naira awm iy kai ai atleu nai Tameuh ly nang parai nai ne, nanai aeu u!
48 Mymy ly kai ai paleung ka-echi ai eaung ai nai pei bo;
khumi cheng cheaungkhangchi ai, kai i kiu anui y tym hai iy
49 paleung ka-echi kiu i nai kai ai atleu bo.
Aw Areng, nang ly kai ai paleung ka-echi ai eaung ai nai pei iy
khrukhra hai nai khumichi teng i nai ama hai bo.
50 Hunaibaly kai ly khumi cheng cheaungkhangchi mo y, nang ai palo iy, Ref 22.50: Rom 15:9
nang i nang parai nai ai khulym thui ai.
51 Tameuh ly mymy i khai takhra nai samrang ai eaung naira pei;
mymy i khai takhra nai samrang Davida dengdairei, kangpreangchi teng y
khaw parai nai tamen naira ly deungtasa khrairei patei pi bo.