21
Sawla i katu chanauchi ai padei nai
1 Davida i peang nai thym khala y saneng thomrei ly khri pa-rei takang theu bo. Hunai deaungkho y Davida ly Areng teng y hnei takeng i Areng my, “Sawla ly Kibeon mary i khumichi ai padei nai molam y, ni hawi ni i yhm dengtheungchi ly khumi padei nai kamngo awm nai deaungkho y, hini patang naira tym nai ne,” napi.
2 (Kibeon mary i khumichi ly Israela chengchi ny y; nichi ly Amori cheng khumi maidenreichy ne i, nichi ai Israela chengchi my ama hai ai, nanai adeu yb bo. Na i py Sawla ly Israela hawi Juda khumichi i vui y paleung apei keh nai y, Kibeon mary i khumichi ai tamyh ai nai atho sa nai ne.)Ref 21.2: Josua 9:3-15
3 Hunai deaungkho y Davida ly Kibeon mary i khumichi ai palau iy, “Kai ly nangchi i vui ati kang sa pi ai mo? Nangchi ly Areng i khumichi ai amtheaung naira pei u ai nai, kai ly nangchi i avum nai hawi y naira molam y, sai sairei kang sa pi ai nai ngai,” napi.
4 Nichi my, “Sawla i yhm dengtheungchi hawi kaichi sala, ajo athui nai molam y muku tangka hawi atleu i py ngo pajau y leang; kaichi ly mani Israela chengchi ai py, padei ai nai ngai y leang,” napi u bo.
Davida my, “Tuna lawh baly nangchi i vui mana kang sa pi ai nai ngai mo?” nanai deng.
5 Nichi my, “Sawla ly Israela pri theung y kaichi i cheng leaungrei py by y na pa-rei tamyh ai nai dawn bo.
6 Hunai deaungkho y ni i katu chanau leaung saryhrei ai kaichi teng y au; kaichi ly Areng my vawi takhra pi nai samrang Sawla i meingtym, Kibeah mary y nichi ai Areng i mo y padei ai,” napi u.
Samrang my, “Huni khumichi ai kang pei ai,” napi.
7 Davida ly Tameuh i mo y Jonathan hawi vaineng asa nai molam y, Jonathan i chapo, Sawla i katu Mephiboseth ai lawi hai bo.Ref 21.7: 1 Sam 20:15-17; 2 Sam 9:1-7
8 Ei-a i chaniu Rizpah hawi Sawla i nga nai chapo Armoni hawi Mephiboseth nini, Meholah mary i Bazilai i chapo Adriela hawi Sawla i chaniu Mirab i nga nai chapo leaung pangreichi ai, Kibeon mary i khumichi teng y pei pi bo.Ref 21.8: 1 Sam 18:19
9 Kibeon mary i khumichi ly huni khumichi ai mawi salo Areng i mo y akaeu hai bo. Huni khumi leaung saryhreichi ly nisa katheu, choh katui, choh tyn amteaung nai neng khala dei u be nai ne.
10 Naibaly Ei-a i chaniu, Sawla i samrangnu ai kry nai Rizpah ly paisiu kanih hawi veuchi khai nai lengseaung salo y khiu iy, choh tyn amteaung khyp khala i dengdairei, nicho neng tym pa-rei veuchi ai kanithun y tavochi my, vum y daichi mawichi my cho y pa-rei typ nai ne.
11 Rizpah i sa nai saichi thai nai khala,
12 Davida ly Kilead pri mang y chei iy, Jabesa mary khumichi teng i Sawla hawi Jonathan nini i hiuchi la. (Jabesa mary i khumichi ly huni hiuchi ai Beth Shan mary i nai, kangviu y la vui nai ne. Philistia chengchi ly Kilabo mawi salo Sawla ai padei chum baly, ni i veu hawi Jonathan i veu ai Beth Shan mary y banghau nai ne.) Ref 21.12: 1 Sam 31:8-13
13 Davida ly Sawla hawi Jonathan nini i hiuchi la chum baly, akaeu nai khumi leaung saryhreichi i hiuchi py pangym bo.
14 Naibaly nichi ly huni hiuchi ai Sawla hawi Jonathan nini i hiuchi hawi vanrei Benjamin khu, Zela mary y awm nai Sawla i ampo Kisa i tapreaung y heung u bo. Nichi ly samrang my leu pei nai kamta sa u. Naibaly Tameuh ly nichi i pri i vui y, nichi i hnei takeng nai pathang pi nai ne.
Khri pa-rei tlang atho awm nai Philistia chengchi hawi tavai atiu nai
(1 Neng 20:4-8)
15 Philistia chengchi hawi Israela chengchi ly tavai atiu u taleang bi bo. Davida hawi my i khumichi ly Philistia chengchi mang y chei iy tiu u. Tavai atiu naira y Davida ly khri pa-rei atho bai na bo.
16 Isabino nanai amyn nga nai, khri pa-rei tlang atho awm nai khumi leaungrei ly Davida ai padei ai nai tau bo. Ni ly haisau harei syn; ni i kheupaja tivi ly sie tajarei ji na.
17 Na i py Zeruiah i chapo Abisai ly Davida ai sabawm i, Philistia khumichi ai padei bo. Davida i khumichi ly samrang teng y, vai mo mang y ly nichi hawi vanrei tavai keung y abang y ai nai adeu hai bo. Nichi my, “Nang ly Israela chengchi i athang khai naira ne; kaichi ly nang ai tama hai ai nai ngai y,” napi u.Ref 21.17: 1Areng 11:36; Sam 132:17
18 Hunaibaly Kob mary y Philistia chengchi hawi atiu bi i, Husa mary i Sibekai ly Sapha napi nai, khri pa-rei tlang atho awm nai khumi ai padei vui bo.
19 Kob mary y my Philistia chengchi hawi atiu takhra bi nai ne. Huni tavai keung y Ja-ira chapo, Bethlehem mary i Elahanan ly kath mary i Koliatha ai padei vui bo. Koliatha i tivi apheung ly pe cheaungkheu tirei awm nai ne.
20 Huni bo y kath mary y naimy atiu u bi nai ne. Huni atiu naira y tavai atiu ai nai ngai parai nai, tlang atho awm nai khumi leaungrei awm. Ni i kiuchira y kiu pajeung tariurei awm i, kheuchira py kheu pajeung tariurei awm.
21 Ni ly Israela chengchi teng y ka-jo hau nai leu thui nai deaungkho y, Davida i amjo Shamah i chapo Jonathan my ni ai padei vui bo.
22 Hini khumi leaung palyhreichi ly kath mary y awm naitlang atho awm naichi i kangpreang ne. Nichi ly Davida i khumi soraichi kiu y dei u bo.