16
Davida hawi Ziba
1 Davida ly mawi saleung palem prei nai khala y Mephiboseth i miseaung Ziba hawi avum. Ziba ly tako phi chungvai nyhrei, kreip athai kajei phrawn chungvairei, kreip athai kangmyn phrawn chungvairei hawi kreip hang mawipeih adym kawirei, hunichi ai keaungngo kano kasau nyhrei tleaung y tang naimy tym hai bo.Ref 16.1: 2 Sam 9:9-10
2 Samrang Davida my, “Nang ly hini vawnsaichi ai ati aly jeu hai nai mo?” nanai deng.
Ziba my, “Hini keaungngo kano kasauchi ly areng nang i yhm dengtheungchi atang ai nai ne; tako hawi thengthaichi ly nang i khumichi cha ai nai ne i, kreip hang ly daichi ka-vym theung y nichi akawm u nai khala, nei ai nai ne,” nanai pathang.
3 Samrang my, “Nang i yhmkeung, Sawla i katu Mephiboseth ly ma y mo?” nanai deng. Ref 16.3: 2 Sam 19:26-27
Ziba my, “Ni ly vai Jerusalem mary theung y awm; ati mana nai mo nabaly Israela chengchi my, ni i amsipui Sawla teng i pri ly my teng y au ai, nanai ym nai deaungkho y ne,” nanai pathang.
4 Samrang my Ziba teng y, “Mephiboseth i peang nai yhmtheaung katui ngiereichi ly nang teng y kang pei ai,” napi.
Ziba my, “Kai ly nang i miseaung ne; kai ly nang teng y meimai ngo jojo sy!” nanai pathang.
Davida hawi Shimei
5 Davida ly Bahurim mary y tym nai khala y, Sawla i amjo amnau ka-bi Kera i chapo Shimei ly Davida ai pasawi naimy mary theung i nai theu bo.
6 Davida ai tamcheaungchi hawi khumichi my taki teungtareung teu i py, Shimei ly Davida hawi bangtangchi ai lengseaung hawi aphi.
7 Shimei my, “Khumi ai padei nai keung! kamngocho! leh la! leh la!
8 Nang ly Sawla i pri lawm vui iy, ni i dengtheungchi ai padei nai molam y vai, Areng my nang ai pajeng nai bo. Areng ly nang i chapo Abasalom teng y pri au vui bo. Nang khumi ai padei nai keung awi! nang ly ati sai py ny y nai lawm bo,” nanai pasawi nai ne.
9 Zeruiah i chapo Abisai ly samrang teng y, “Areng awi, ati mana nai hini ui kadei ai ly ati mana nai nang ai pasawi ai nai pei lawh mo? Kai ly chei iy ni i lu tameang vui si!” napi.
10 Samrang ly Abisai hawi ni i amjo Juaba teng y, “Hini ly nang i kalop ny y leang; Areng my leu pei nai deaungkho y, kai ai pasawi nai ne lawh baly ni teng y, ‘nang ly ati mana nai y hina nai sa lawh mo?’ nanai ami my deng ai mo?” napi.
11 Naibaly Davida ly Abisai hawi samrang i bangtangchi teng y, “Kai i chapo kypkyp my malawn py kai ai padei ai nai sa nai deaungkho y, hini benjamin khumi i sa nai ly lyh u lawh a? Mymy ngai ngai so sy, pasawi teu sy; Areng my leu pei nai deaungkho y, ni ly hina nai sa nai ne.
12 Areng ly kai i patang nai niu nai deaungkho y, huni khumi i pasawi nai jeng y, amtheaung naira ang pei tang ang pei lym ai,” napi.
13 Naibaly Davida hawi my i nithun abang naichi ly tako u bi nai ne. Shimei ly mawi laileaung mang tako i, pasawi nai tarawi y lengseaungchi hawi aphi; spryhchi hawi py hei bo.
14 Samrang hawi my i khumi bawibawichi ly Jordan tavo y tym nai khala, akawm u nai deaungkho y, hu y amdaw u bo.
Abasalom Jerusalem mary y tym nai
15 Abasalom ly my i nithun abang nai Israela cheng bawibawichi hawi vanrei, Jerusalem mary y kun bo. Nichi hawi vanrei Ahithophela py abawi nai ne.
16 Davida i ka-ym awm nai ahawi Hushai ly Abasalom ai avum nai khala, “Samrang ly heng sau sy! Samrang ly heng sau sy!” nanai aeu naimy lamchung bo.
17 Abasalom my, “Nang i ahawi Davida i tlang tleaung y ka-ym awm nai sai ly mana vui lawh mo? Nang ly ati mana nai deaungkho y, ni teng y abang y lawh mo?” nanai deng.
18 Hushai my, “Kai ly mana abang thai ai mo? Areng my vawi takhra nai keung, hini khumichi hawi Israela cheng bawibawi my vawi takhra nai keung i miseaung y kaawm ai; kai ly nang hawi vanrei awm ai.
19 Kai ly kaimy yhmkeung i chapo teng y kalop so y baly, ami teng y kasa ai mo? Kai ly nang i ampo i kalop sa pi nai kamta vai, nang i kalop sa ai,” napi.
20 Naibaly Abasalom my Ahithophela mang y amhi iy, “Vai, kaichi ly ati sa ai mo? kaichi ai tau pei kyh ba,” napi.
21 Ahithophela my, “Samrang i yhm typ ai nai ngampo my khai nai samrangnu ai kry naichi teng y kun ly nichi hawi i ahawi; huna nai sa baly ngampo ly nang ai paleung ka-e palawn bo, nanai khumichi my pany nai khala, nang i nithun abang naichi ly khri pa-rei atho nga u ai,” napi.
22 Naibaly Abasalom ly samrang i yhm amphu salo y kanih tangbeung jang hai chum baly, khumichi i mei ka-niu y ampo i samrangnu ai kry naichi hawi i ahawi bo.Ref 16.22: 2 Sam 12:11-12
23 Hunai thym khala y khumichi my Ahithophela i tau pei nai ly Tameuh teng i tau pei nai palawn u. Davida hawi Abasalom nini py dawn hawi teang bo.