17
Abasalom tamang hai ai nai Hushai my tau pei nai
1 Ahithophela my Abasalom teng y, “Kai ly khumi meaung kateaung atlo sangnyhrei vawi takhra iy, vaini my Davida nithun hui ai.
2 Ni paleung phra akawm nai thym khala y, kai ly tiu ai. Huna nai khala ni ly jei ai i, nichi i khumichi py preang u pawn ai. Kai ly samrang leaungrei ai naini padei iy,
3 deaung nang nai anglo ly my i juvo teng y vawi ali teang nai kamta, ni i khumi bawibawichi ai nang teng y vawi hai teang ai. Nang i dei hai ai ngai nai ly leaungrei awm khyh; takhra khumi bawibawichi ly patang naira tym u ai ny y leang,” napi.
4 Hini tau pei nai leu ai ly Abasalom hawi Israela cheng miteaung kehchi my ngai u bo.
5 Abasalom my, “Vai Hushai ai palau u; ni i tau pei nai py tangai u sina,” napi.
6 Hushai tym nai khala Abasalom my, “Ahithophela my tau pei nai ly hina nai ne. Ni i tau pei nai kamta sa ai nai avo na a? Avo y lawh baly kaichi ati mana sa ai mo, nanai thui pi cham,” napi.
7 Hushai my, “Hini tlenrei nang ai Ahithophela my tau pei nai ly avo y leang.
8 Nang i ngampo hawi ni i khumichi ly tavai atiu kawp parai naichi ne, nanai py, nichi ly cho tama nai tavym nu kamta ka-jei hawi parai, nanai py nang pany chybo. Nang i ngampo ly tavai atiu kawp parai nai deaungkho y, vum y my i khumichi hawi vanrei i vai y.
9 Vai malawn py ni ly tapiu ha harei ra y mo, ti y baly takhra ha harei ra y mo, aheu naimy awm ai. Davida my ang tiu phai ang tiu baly, nang i khumichi ly sum ai. Huni satang thai nai khumichi my nang i khumichi sum u bo, nanai thui u ai.
10 Hunaibaly khrangsi kamta jei nai paleung tama iy, khri pa-rei vam parai nai khumichi malawn py angtheng u ai. Ati mana nai mo nabaly nang i ampo ly sorai risa pui leaungrei ne iy, ni i tavaimichi py tavai atiu kawp naichi, nanai Israela cheng vereichi pany u nai deaungkho y ne.
11 Nang ai kaimy tau pei ai ngai nai ly pangli spryh jirei nawi nai Israela cheng bawibawichi ai khuteng taki katem i dengdai temra y khrairei palau ai nai ne. Naibaly nichi ai nangmy lu sa iy tavai keung y thau ba.
12 Davida ai avum y avum pa-rei hau iy, achi ly ni ai vaimy tiu tamang tang ai. Hunaibaly ni i khumichi ly leaungrei py kangheng tleaung ai ny y.
13 Ni ly mary harei mang y anaw vui baly, achi bawibawi ly vuinawnchi syn iy mawi saleung i lengseaung harei py by y pa-rei, huni mary i leaunghawi theung mang y ryh pawn ai,” napi.
14 Abasalom hawi Israela cheng bawibawichi my, “Hushai i tau pei nai ly Ahithophela i tau pei nai tleaung y hawi keh,” nanai thui u. Abasalom teng y patang naira tym hai ai nai Areng ly Ahithophela i pei nai tau kahawi ai phra hai vui nai ne.
Pany hai yb naira avum iy Davida law tleang nai
15 Naibaly Hushai ly pathyp pi nai keung Zadok hawi Abiatha nini teng y. mymy ly Abasalom hawi Israela lu sa naichi ai ati mana tau pei iy, Ahithophela my ati mana tau pei mo, nanai thui pi bo.
16 Naibaly Hushai my, khumi leaungrei pato iy samrang Davida teng y, “Daichi ka-vym kady tuivum y jei u moh sy. Jordan tavo vai mang y vaimy angpeang u; huna i naini nang hawi nang i khumichi ly deira i nai law tleaung u ai nanai thui hai ba,” napi.
17 Zadok i chapo Ahimaz hawi Abiatha i chapo Jonathan nini ly khumichi my niu lawh na, nanai mawn nai deaungkho y, mary theung y kun hawi vam y i, Enrokela avang y ajeng hawi bo. Naibaly Davida teng y thai hai ai nai satang ly anglo leaungrei my thai hai reng nai kamta, nini ly samrang Davida teng y chei iy amti pi.
18 Na i py hini tlenrei naira y deaungdi leaungrei my nini ai niu i, Abasalom teng y amti pi. Naibaly Jonathan hawi Ahimaz nini ly Bahurim mary yhm hareira y chei kaliki i, huni yhm sahawi i tuikan theung y satla iy, aheu hawi bo.
19 Yhmkeung nu ly tuikan ai tleangkhym hawi tleang iy, ami py pany pajau y ai nai khym salo y choh vau khyp veng bo.
20 Abasalom i miteaung kehchi ly huni yhm y tym u i, huni neampachy teng y, Ahimaz hawi Jonathan nini ly ma y mo?” nanai deng.
Neampachy my, “Nini ly tavo angpeang hawi veng bo,” napi.
Miteaung kehchi ly nini ai hau u i py niu y nai deaungkho y, Jerusalem mary y vawi u ali teang bo.
21 Nichi vawi u nai khala Ahimaz hawi Jonathan nini ly tuikan i nai theu hawi iy, samrang Davida teng y chei i, leu amti pi bo. Nini ly samrang ai tiu ai nai Ahithophela my mana tau pei mo, nanai amti pi chum baly, “Tavo vai mang y vaimy angpeang praw jau ba,” napi.
22 Hunai deaungkho y Davida hawi abang nai bawibawichi ly Jordan tavo angpeang u i, khutawi nai khala angpeang u pajau bo.
23 Ahithophela ly my i tau pei nai tangai pi y, nanai apany baly keaungngo kano kasau tleaung y atang iy, mymy i awm nai mary y vawi bo. Ni ly my i sa ai awm nai kalopchi sa chum baly akaeu vui bo. Ni i veu ai ly amjo amnauchi i tapreaung y up nai ne.
24 Abasalom hawi Israela chengchi ly Jordan tavo angpeang u nai thym khala y, Davida ly Mahanaim mary y tym veng bo.
25 (Abasalom ly Amasa ai Juaba i meingtym tavailu areng kehra y khai bo. Amasa ly Ismaela chengnote 17:25\xk Ismaela cheng: Hebrai leu y “Israela cheng” napi. \x*Jetha i chapo ne. Ni i amhm ly Nahash i chaniu, Juaba i amhm Zeruiah i amnau Abikaila ne.)
26 Abasalom hawi abang nai bawibawichi ly Kilead pri y tai u bo.
27 Mahanaim mary y Davida tym nai khala, Ammon pri i Rabah mary y awm nai Nahash i chapo Shobi, Lodebar mary y awm nai Ammiela i chapo Makhira hawi Kilead pri Rokelim mary y awm nai Bazilai nichi ly ni teng y jeu iy ka-vum sa u bo.
28-29 Daichi ka-vym theung y Davida hawi ni i khumichi ly teicha teinei alam iy, atho bai naimy awm u, nanai nichi pany nai deaungkho y, khauchi, alai laawmchi, irachi, changleung, choh chajai, choh leaungphi, prichi, khawibi, khawi hang, thobai, sikanu hawi beramchi syn pi u nai ne.