15
Abasalom my tiu nai
1 Naibaly Abasalom ly keaungngo ka-ri harei, keaungngochi hawi mo mang y amtheung nai tavaimi leaung vuipangreichi ai, my i vui pangym yb bo.
2 Ni ly khawn angthodyh ang thau iy, mary apai pa-kho lamteng y angdo naimy awm reng nai ne. Samrang i tara leu pacheang nai tangai ai jeu nai, seu nai keung leaungrei jeu nai khala y, ni ai palau i, “Nang ly ma i jeu nai mo?” nanai deng. Seu nai keung my, “Kai ly hini meingtym Israela cheng theaung i khumi ne,” napi i,
3 Abasalom my, “Khen cham, nang i tara leu ly reita hawi amlau nai ne. Na i py samrang i jeng y, nang i tara chih pi ai nai keung leaungrei py by y.
4 Kai phai tara chih nai keung ne i khyly, rai nai, seu nai khumi ly kai teng y jeu baly, kaimy leu meitang y chih pi ai,” nanai thui pi reng.
5 Huni khumi ly Abasalom teng y ahihawi iy lu meung lawh teu baly, Abasalom ly kiu pheu i, huni khumi ai amkhaw iy pachawm reng nai ne.
6 Abasalom ly samrang i tara chih pi nai ngai nai y jeu nai, Israela cheng ngiereichi ai hina nai kamta sa pi nai deaungkho y, huni khumichi my tahm khai parai nai ne.
7 Saneng palyhrei nai bo khala y Abasalom ly samrang Davida teng y, “Samrang awi, kai ly Areng teng y adeu nai kamta sa ai nai, Hebron mary y chei ai nai pei ba.
8 Kai ly Suria pri keshura mary y awm nai thym khala y, Areng my kai ai Jerusalem mary y tym hai teang baly, Hebron mary y chei iy nang ai kang chiu ai, nanai kai ly adeu nai ne,” napi.
9 Samrang my, “Paleung awmnem naimy chei ba,” napi i Abasalom ly Hebron mary y chei bo.
10 Na i py ni ly Israela cheng theaung bawibawichi teng y savaichi pato i, “Nangchi ly baw eng nai katyn thai nai khala y, ‘Abasalom ly Hebron mary y samrang lawm bo’ nanai aeu u,” nanai taviu yb nai ne.
11 Abasalom my palau nai y, ni hawi vanrei, Jerusalem mary i dengdairei abang nai khumi leaung 200 rei awm. Nichi ly Abasalom i kangviu y sa nai ly pipi pany u y. Paleung ka-dawn kahawi y abang u nai khumichi ne.
12 Kapathyprachi talam nai thym khala y Abasalom ly Kilo mary y khumi pato i, Davida ai tau pei nai keung, Kilo mary y awm nai Ahithophela ai palau. Abasalom nithun y abang naichi ly nawira nawira nai hawi vanrei, samrang ai tiu ai nai kangviu y dawn pasym nai ly atho awmra nai ne.
Jerusalem mary i dengdairei, Davida preang nai
13 Abasalom ly Israela chengchi my ka-ym awm nai keung lawm veng bo, nanai khumi leaungrei my Davida teng y satang thai hai pi bo.
14 Naibaly Davida ly Jerusalem mary y awm nai bangtangchi teng y, “Abasalom kiu i tleaung ai nai ngai baly achi ly vaimy theu ai nai tla ai. Achi theu kaliki y baly, ni ly kra y naimy hini meingtym y tym ai i, achi ai ang tiu iy mary i khumichi ai tleh pawn ai!,” napi.
15 Huni khumichi my, “Teng parai mang samrang awi, kaichi ly nang i leu pei nai kamta sa ai nai angvei yb bo,” napi u.
16 Hunai deaungkho y samrang ly my i yhm dengtheungchi hawi bangtangchi ai palau iy preang u bo. Samrang yhm typ ai nai samrangnu ai kry nai khumi leaung horeichi ai naini daw jo nai ne.
17 Samrang hawi my i khumichi ly hunai kamta theu u nai bo y mary kangtem y awm nai, yhm hareira y anawn u.
18 Samrang i bangtangchi ly ni i sahawi y awm u nai thym khala y, tamcheaungchi ly samrang i mo mang tako u prei bo. kath mary i abang nai tavaimi leaung 600 reichi py, tako u prei nai khala y,
19 Samrang my nichi i tavailu Itai teng y, “Nang ly ati mana nai kaichi hawi vanrei abang lawh mo? Samrang kangtha hawi awm ai nai ali teang; nang ly cheng takhra khumi ne. Nangmy i pri hawi py palo iy, pri takhra y abyh nai khumi ne.
20 Hini meingtym y tym nai py kra y rai nai deaungkho y, kai ly ati mana nai nang ai kai hawi vanrei meingtym tleirei y, amki hai ai mo? Kai py ma mang y chei ai mo, nanai kapany y. Nang ly nangmy i chengchi ai palau iy, vawi teang ba. Areng i ka-ym awm nai hawi pahen naira ly nang i tlang tleaung y tym hai sy,” napi.
21 Na i py Itai my, “Samrang awi, kai ly dei ai nai ne teu i py, samrang nang i chei naira tleirei y abang veangveang ai, nanai Areng i amyn y kai ly vaineng abeu bo,” nanai pathang.
22 Davida my, “Hawi mang! abang!” napi i, Itai ly my i khumichi hawi vanrei, nichi teng y abyh nai khumichi ai py hawi bo.
23 Davida nithun abang naichi theu u nai khala y, mipuichi ly vo hang u. Samrang hawi abang nai khumi bawibawichi ly Kidron tavo angpeang iy daichi ka-vym mang y tako u bo.
24 Pathyp pi nai keung Zadok hawi Leu Maikawm Pawm angjeaung nai Levi theaungchi py abawi u. Nichi ly Leu Maikawm Pawm ai khaileaung y khai iy, khumi bawibawichi mary theung i theu nai khei y ryrei ly ajeng u bo. Nichi theung y pathyp pi nai keung Abiatha py abawi teang.
25 Naibaly samrang ly Zadok teng y, “Leu Maikawm Pawm ai mary theung y syn teang. Areng my kai ai aly ngai baly, kanirei nai khala y Leu Maikawm Pawm ai py, Pawm anawn nai meingtym ai py, khen ai nai ang pei ai.
26 Na i py kai ai aly ngai y lawh baly, mymy i ngai nai kamta so teu sy,” napi.
27 Huni bo y samrang my Zadok teng y, “Khen cham, nang i chapo Ahima hawi Abiatha i chapo Jonathanchi ai palau iy, paleung awmnem naimy mary theung y vawi u.
28 Hini sala y kai ly nang teng i satang ngo y ryrei ly daichi ka-vym y awm nai kady tuivum y ajeng ai,” napi.
29 Hunaibaly Zadok hawi Abiatha nini ly Leu Maikawm Pawm ai Jerusalem mary theung y syn u teang iy, hu y awm u bo.
30 Davida ly phainai aleng iy paleung si nai ka-ma-ra lu amym i, vo nai tarawi y Olive mawi mang y lyn kalau bo. Ni i nithun abang u nai khumi bawibawichi py, lu amym iy vo u.
31 Ahithophela ly Abasalom i kamkawmra y abawi veng bo, nanai Davida thai nai khala y, “Aw Areng, Ahithophela i tau pei naichi ly ati sai py ny y nai mang y lawm hai veng ba,” nanai chiu sa bo.
32 Davida ly chiu nai meingtym, mawi y tym nai khala y, my i ka-ym awm nai khumi Akhi mary i awm nai Hushai ly mymy i ateaungchi sei iy lu y py spryh aphui naimy, samrang ai lamchung bo.
33 Davida my Hushai teng y, “Nang ly kai hawi vanrei abang baly, kai ai ati sai py kasabawmra pei pajau ai ny y leang.
34 Na i py nang ly mary y vawi ali teang iy, Abasalom teng y, “Samrang awi, kai ly ngampo teng y kalop sa reng nai kamta, vai, nang teng y kalop kasa ai, nanai thui. Naibaly Ahithophela i tau pei nai ai, nangmy taphra pajau lawh baly, kai ai sabawm pajau.
35 Pathyp pi nai keung Zadok hawi Abiatha nini ly mary theung y awm u ai. Samrang i yhm y nang i thai nai satang nichi teng y thui pi.
36 Nichi hawi vanrei nichi i chapochi Ahima hawi Jonathan nini py awm u nai ne i, nang i nga nai satang ngiereichi ai, nini leaungnyh dengdairei kai teng y tym hai,” napi.
37 Hunai deaungkho y Davida i ahawi Hushai ly mary y vawi teang bo. Huni neng khala y my Abasalom ly mary theung y tym nai ne.