14
Abasalom vawi teang thai ai nai Juaba my ka-vo sa pi nai
1 Juaba ly Abasalom ai Davida my, khri pa-rei kadeaung naimy awm, nanai pany bo.
2 Hunai deaungkho y ni ly Tekoa mary y awm nai, tau cheng nai neampachy leaungrei ai palau hai i, huni neampachy teng y, “Nang ly vo tangam nai amlawn ba. Paleungsi paleung mawn nai kamta, baichu nina amchiu iy, sam aseu y naimy neng kakra vo tangam nai neampachy kamta amlawn ba.
3 Naibaly samrang teng y chei iy, kaimy pachei nai kamta thui pi ba,” napi.
4 Huni neampachy ly samrang teng y chei iy ahui kajeaung kaji naimy, “Samrang awi, kai ai sabawm kyh ba,” nanai takeng.
5 Samrang my, “Nang ly ati ngai mo?” nanai deng baly neampachy my,
“Kai ly patang parai nai neampachy lumai ne. Kai i juvo ly dei bo.
6 Kai ly chapo leaung nyhrei awm. Kanirei nai khala y nini ly li-prangra y ajo hawi i, nini ai kam ai nai leaungrei py by y. Leaungreimy leaungrei ai padei vui bo.
7 Hunaibaly areng awi, vai ly kai i amjo amnauchi my kai ai ka-jo hau i, kai i chapo katheang ai dei vui nai amjo i jeng y padei teang ai nai au, ang napi. Nichi my padei vui bi baly, kai i vui mo mang y athang khai bi naira, chapo leaungrei py by y leang bo. Kai i juvo kangpreang py myh vui ai bo,” napi.
8 Samrang my, “Hini ly kaimy kang sa pi ai, yhm mang y phai vawi teu ba,” napi baly,
9 neampachy my, “Samrang awi, nang i mana mo sa nai ly kai hawi yhm dengtheungchi tlang tleaung y kamngo tym hai sy; nang hawi nang i amjo amnauchi teng y ly kamngo tym hai mo sy,” napi.
10 Samrang my, “Nang ai pajei pahyn nai khumi awm lawh baly, kai teng y jeu hai. Ni ly nang ai khrukhra hai y leang bo mang,” napi.
11 Neampachy my, “Samrang awi, kai i chapo kalen i vui y vawitheung tha ai tau nai atho sa nai amjo amnauchi ly kai i chapo katheang ai padei nai khri pa-rei katamang ly so u y ai nai, nang i Areng Tameuh teng y chiu so pi kyh ba,” napi.
Huna nai khala y Davida my, “Nang i chapo tlang tleaung y maidenreichy py no pei y ai nai, heng nai Areng i amyn y kai adeu mang,” napi.
12 Neampachy my, “Samrang awi, kai ai leu sairei thui ai nai pei kyh,” nanai takeng.
Samrang my, “Thui bei,” napi.
13 Neampachy my, “Samrang awi, nang ly Tameuh i khumichi ai, ati mana nai ana lawh mo? Nang ly nangmy i chapo ai pri palara i dengdairei, vawi ali teang ai nai pei y lawh be. Nang ly vai i leu pei nai kamta, nangmy ai pajeng naira tym hai bo.
14 Achi bawibawi ly dei ai nai khumichi ne. Achi ly khaileaung y beu nai tui hawi atawm. Huni tui ai vei teang ai nai ngo y leang bo. Tameuh malawn py, dei nai khumi ai heng hai teang y leang. Na i py samrang ly pri palacho leaungrei ai, palau teang pajau nai ne.
15 Samrang awi, kai ly nang teng y kang jeu iy kang takeng nai leaungsai ly khumichi ly kai ai pajei pahyn u nai deaungkho y ne. Kai i nang teng y takeng nai ngierei ly nangmy sa pi khyp ai ngaw khyh, nanai athang khai naimy, kai ly nang teng y hnei takeng baly hawi ai, nanai ka-dawn pasym nai ne.
16 Samrang ly kai i chapo ai padei iy, my i khumichi ai Tameuh my pei nai pri i dengdairei patheu vui ai nai atho sa nai khumichi kiu i nai, kai ai atleu pi ai, nanai kai ly dawn nai ne.
17 Samrang nang ly Tameuh i kani pri amtaw thau kamta, hawi nai hawi y nai pany nai keung ne. Hunai deaungkho y kai ly nang i adeu nai kamta, awmnem naira nga ai, nanai ka-dawn. Nang i Areng Tameuh ly nang hawi vanrei awm sy!” napi.Ref 14.17: 2 Sam 19:27
18 Samrang my, “Nang teng y sairei kang deng ai, nang ly kateng khyp, pathang ai nai tla,” napi.
Neampachy my, “Samrang awi,deng ai ngai nai deng ba,” napi.
19 Samrang my, “Hina nai kai teng y takeng ai nai, nang ai ang pachei nai keung ly Juaba ny y a?” nanai deng.
Neampachy my, “Samrang awi, nang i deng nai leu kateng khyp pathang ai nai, kai adeu mang. Mana sa ai mo, mana deng ai mo, nanai pachei nai keung ly nang i miseaung Juaba my ne.
20 Ni i hina nai sa nai ly hina nai leaungsai ai ali hai vui ai nai sa nai ne. Samrang nang ly Tameuh i amtaw thau kamta, tau cheng naira awm i, tym nai leaungsai ngiereichi pany nai ne,” napi.
21 Naibaly samrang ly Juaba teng y, “Nang i ngai nai kamta sa ai nai kai, pasym yb bo; chei ly huni deaungdi Abasalom ai palau ba,” napi.
22 Juaba ly Davida i mo y angbeu iy, “Samrang awi!, nang ai Tameuh my amtheaung hai sy. Nang ly kai ai khrei, nanai vai ly kai pany bo. Ati mana nai mo nabaly nang ly kai i hnei takeng nai kamta, sa pi nai deaungkho y ne,” napi.
23 Naibaly ni ly ang thau iy keshura mary y chei i, Abasalom ai Jerusalem mary y vawi hai bo.
24 Na i py samrang ly Abasalom ai samrang i yhm y awm y ai nai leu pei. Samrang my, “Kai ly ni ai niu ai nai ngai y,” napi. Huna nai y Abasalom ly my i yhm y awm teu i py, samrang teng y kun ai nai ngo y.
Davida hawi Abasalom nini aly hawi teang nai
25 Abasalom ly Israela pri y mo-cha hawi parai nai deaungkho y, ni kamta amyn amthang nai khumi leaungrei py by y; ni ly lu dengdairei kheu kadeaung khrairei, chehra by y nai ne.
26 Ni i sam ly khri pa-rei hawi i, sau py sau, ji py ji nai deaungkho y sanengrei y tlenrei, atakip vui ai nai tla. Takip vui nai sam ly mitu miteaung sie apomrei vi awm nai ne.
27 Abasalom ly chapo leaung thomrei hawi, amyn tamar napi nai chaniu leaungrei awm. Huni chaniu ly khri pa-rei mo-cha hawi parai.
28 Abasalom ly samrang teng y kun ai nai ngo y naimy, Jerusalem mary y saneng nyhrei awm nai ne.
29 Ni ly mymy i vui samrang teng y atli pi ai nai Juaba ai heang i, ni ly jeu pi y nai ne. Tlen pa-nyh heang hai bi i py, Juaba ly jeu pi y bi bo.
30 Naibaly Abasalom ly my i miseaungchi teng y, “Khen cham, Juaba i li ly kai i li hawi abira nai ne. Huni lira y changleung choh neangneang awm; chei u ly mai leng u,” napi. Naibaly miseaungchi ly chei u iy, amti amjangchi ai mai hawi leng pi pawn bo.
31 Naibaly Juaba ly Abasalom i yhm y chei iy, “Nang i miseaungchi ly ati mana nai, kai i li ai mai leng vui lawh mo?” napi.
32 Abasalom my, “Kai i vui samrang teng y atli pi ai ngai nai deaungkho y, kang palau hai bo. Kai ly ati mana nai y keshura mary khai su iy, hini meingtym y tym lawh mo? Huni mary y awm nai ly kai i vui hawi keh alam ai. Samrang hawi avum ai nai, kai i vui so pi. Kai, kamngo awm lawh baly, samrang ly kai ai padei teu na sy,” nanai Juaba teng y thui pi bo.
33 Hunaibaly Juaba ly samrang teng y chei iy Abasalom i thui naichi amti pi. Samrang ly Abasalom ai palau ai nai khumi pato; Abasalom tym nai khala y, samrang i mo y angbeu i, lu meung bo. Samrang ly ni ai kawn i, pachawm nai ne.