9
1 Naibaly kani pri i amtaw thau nai pa-ngo i nai ly eng i, kani mang i dengdairei khaileaung y tla angchi nai ka-si kaniu:naibaly ngari angawm kalawi by y nai i kho i saw ly ni teng y au bo.
2 Naibaly ni ly kho paeaung i, mai pui khyh nai kamta ly angawm i dengdairei maikhyh theu kalau bo; kanito hawi kani ly angawm i maikhyh nai deaungkho y veng bo.Ref 9.2: AA 19.28
3 Naibaly huni maikhyh theung i nai akhuchi ly khaileaung y theu i, khaileaung i kanitaaichi i sa thai naira awm nai kamta ly nichi teng y sa thai naira pei bo.Ref 9.3: Theu 10.12–15
4 Naibaly Tameuh i pajawp typ nai ka-ma-ra lukati y by y nai khumichi harei khyh ny y baly, khaileaung pri i acha kangheng hawi, atiti heng yh nai amjychi hawi, dengkeaung ngiereichi ai py atiti hawi y nai so hai y ai nai nichi teng y thui pi bo.Ref 9.4: Ezek 9.4
5 Naibaly nichi ly huni khumichi ai padei y naimy, lo pangrei sala y nichi ai patang u hai ai nai leu nga u bo; naibaly nichi ai patang hai nai sai ly kanitaai my khumi ai kei iy patang hai nai kamta ne.
6 Naibaly huni neng khala y ly khumichi my deira hau ai i, pipi avum lawh ai ny y; nichi ly dei ai nai kadeaung i, deira ly angpreng pi veng ai.Ref 9.6: Job 3.21; Jer 8.3
7 Naibaly akhuchi i atawm nai sai ly tavai atiu ai nai angvei hai rym nai keaungngochi kamta ne: nichi i lu tleirei y py muku kamta awm nai areng lukhym amym nai ne, nichi i meimai py khumi i meimai kamta ne.Ref 9.7: Joel 2.4
8 Naibaly nichi i mui ly neampachychi i sam kamta ne i, nichi i ho ly khrangsi takai i ho kamta ne teang.Ref 9.8: Joel 1.6
9 Naibaly nichi ly tamo khupui kamta khupui awm i, nichi i pakhi aho nai katyn ly tavai ka-ri hawi keaungngo neangneangchi ly tavai atiu naira y angpreng mar nai katyn kamta ne.Ref 9.9: Joel 2.5
10 Naibaly nichi ly kanitaai tamai kamta awm i, thailai py awm ; naibaly khumichi ai lo pangrei sala y patang hai ai nai sa thai naira ly nichi i tamai y awm.
11 Nichi tleaung y samrang lawn nai ly ngari angawm kalawi by y nai i amtaw thau nai ne: Hebrai leu y mymy i amyn ly Abadonna ne i, Krik leu y ly mymy i amyn ly Apoluona ne.
12 Angchei i Taham Si Naira ly tem bo. Khen cham, vai hini bo y Taham Si naira nyhrei awm asai rai na a.
13 Naibaly kani pri i amtaw thau nai tariu i nai ly eng i, Tameuh i mo y muku maicham taki i dengdairei raawi kathai:Ref 9.13: Theu 30.1–3
14 Huni raawi ly baw syn nai kani pri i amtaw thau nai tariu i nai teng y ly, “Euphratis jang pang pui mang y kani pri i amtaw thau nai kawm angchi nai leaung palyhreichi ai su jau,” napi.
15 Naibaly huni nari hawi, kani hawi, lo hawi saneng i vui y py khai rym nai kani pri i amtaw thau nai palyhreiai khumi phy thomrei y phyrei ai ly padei ai nai su vui bo.
16 Naibaly keaungngo tleaung y atang nai kamkawmchi i nawi nai sai ly kudi apomrei awm: nichi i nawi nai sai ly ang thui pi nai kathai.
17 Naibaly amteng hai naira y ly keaungngochi hawi hunichi i tleaung y atang naichi ai ly hina nai kamta kaniu: nichi i khupui ly mai hawi, mai kadeu hawi, kan reaung kamta ne: keaungngochi i lu py khrangsi takaichi i lu kamta ne: nichi labeaung theung i nai py mai hawi, maikhyh nai hawi, kan py theu.
18 Nichi labeaung theung i nai theu nai mai hawi mai khyh nai hawi kan py, huni no hai naira thomrei my ly khumi phy thomrei y phyrei ai ly padei veng.
19 Ati mana nai mo nabaly huni keaungngo i sa thai naira ly nichi i labeaung y hawi tamai y py awm: nichi i tamai py pavui kamta ne lawh i, luchi py awm teang; hunichi deaungkho y nichi ly amichi ai no hai.
20 Naibaly huni patang hai naira y padei nai kamthomchi ly vawinamchi hawi, muku mynchi hawi, tangka mynchi hawi kheupaja mynchi hawi, lengseaung mynchi hawi, dengkeaung mynchi hawi, niu py niu thai y nai, thai py thai y nai, tako py tako thai y naichi ai chiu u y ai nai, mychi i kiu y atiti sa naichi uikhei nai by y leang:Ref 9.20: Sam 115.4–7, 135.15–17; Dan 5.23
21 nichi i padei naichi, atamchi, angai naichi, kangviuchi py uikhei u lawh nai ny y leang.