10
Cha-iu aeangchy syn nai kani pri amtaw thau
1 Naibaly kani pri i amtaw thau nai ham parai nai takhra leaungrei khupanym akhiu naimy kani mang i dengdairei satla nai kaniu: ni i lu y ly seaungjai takui i, ni i meimai ly kanito kamta ne, ni i kheu py maiteaung kamta ne:
2 naibaly ni i kiu y ly cha-iu aeang theangchi chy lam angchi nai kaniu: naibaly mymy ly ni i lamtang mang i kheu ly pangli y chiu i, langvawi mang i nai ly kacheng y chiu bo;
3 naibaly mymy ly khrangsi takai pa-u nai kamta tao pajeng parai naimy aeu i, aeu nai khala y kani pajyh nai saryhrei ly mychi i raawi ahui thlyhthlyh bo.
4 Naibaly kani pajyh nai saryhrei ly mychi i raawi ahui phai ahui thlyhthlyh baly, kai ly tajiu ai nai tau thym kha y, kani mang i dengdairei raawi ly, “Kani pajyh nai saryhrei i thui nai ai ly pajawp typ, tajiu moh,” napi nai kathai.
5 Naibaly pangli y hawi kacheng y py chiu iy angdo nai kani pri i amtaw thau nai kaniu nai ly mymy i lamtang mang i kiu kani mang y jaha i,Ref 10.5–7: Theu 20.11; Deut 32.40; Dan 12.7; Amo 3.7
6 “Ajeng veangveang bi ai nai ly by y leang bo:na i py kani pri i amtaw thau nai saryh i nai eng ai nai neng thym khala y ly Tameuh i leu kathiu, mymy i miseaung amochi teng y satang kahawi thui pi nai kamta angym ai bo,” nanai,
7 kani hawi huni theung y awm naichi ai hawi, khaileaung hawi huni theung y awm naichi ai hawi, pangli hawi huni theung y awm naichi ai py sa nai keung, deungtasarei heng jojo nai i amyn y tauh iy vaineng abeu bo.
8 Naibaly kani mang i dengdairei raawi kathai nai ly arum hai bi nai kathai i, “Chei, pangli hawi kacheng y py chiu iy angdo nai kani pri i amtaw thau nai i kiu y awm nai alam angchi nai cha-iu aeang lo ly,” ang napi.Ref 10.8–10: Ezek 2.8—3.3
9 Naibaly kani pri i amtaw thau nai teng y kachei i huni cha-iu aeang theangchi chy kai ai pei ai nai mo kana. Naibaly ni ly kai teng y, “Lo ly, cho be; hunaibaly nang i kajeu ai ly kho hai ai, na i py nang i labeaung y ly khawi hang kamta tui nai amny ai,” napi.
10 Naibaly kani pri i amtaw thau nai kiu i dengdairei cha-iu aeang theangchi chy la i, kacha be: hunaibaly huni ly kai i labeaung y khawi hang kamta tui nai amny i , cha phai kacha baly kai i kajeu ai kho hai.
11 Naibaly kai teng y, “Khumi neangneangchi hawi, theaung neangneangchi hawi, leu neangneangchi hawi, samrang neangneangchi i satang py nang ly thui ai nai tla rai,” ang napi.