8
Pajaw typ nai ka-ma-ra saryhrei
1 Naibaly mymy ly pajawp typ nai ka-ma-ra saryhrei nai ly su phai su baly, kani pri y ly nari ka-hyhrei vi syhp na bo.
2 Naibaly Tameuh i mo y angdo reng nai kani pri i amtaw thau nai leaung saryhreichi ai kaniu:naibaly nichi teng y baw saryhrei au bo.
3 Naibaly kani pri i amtaw thau nai takhra ang jeu i, rimui pakhyh nai muku laawm syn naimy maicham mo y angdo bo; naibaly mymy ly areng atehra mo y awm nai muku maicham salo y khumi kachaichi i chiu sa naira hawi amrui thai ai nai, ni teng y pakhyh ai nai rimui neangneang au bo.Ref 8.3: Amo 9.1; Theu 30.1, 3
4 Naibaly hini rimui i khyh nai ly kani pri i amtaw thau nai kiu i nai khumi kachaichi i chiu sa naira hawi, Tameuh i mo y amhui kalau bo.
5 Naibaly kani pri i amtaw thau nai my ly huni rimui pakhyh nai laawm syn i, maicham i mai-ai kawi pa-rei khai iy, khaileaung y aphi kathui bo; hunaibaly kani pajyh naichi hawi katynchi hawi, amlo theu naichi hawi, kaleih tlenrei theu nai py awm tamangtang bo.Ref 8.5: Lev 16.12; Ezek 10.2; Theu 19.16; Amt 11.19, 16.18
Bawchi eng nai
6 Naibaly baw saryhrei syn nai kani pri i amtaw thau nai saryhreichi ly eng ai nai angvei u rym bo.
7 Naibaly kangman keh nai ly eng i, ji hawi mai, thi hawi abawi paraw para naimy awm tamangtang bo; hunichi ai ly khaileaung y aphi kathiu bo; naibaly khaileaung phy thomrei y phyrei ly kang bebe bo, dengkeaungchi py phy thomrei y phyrei ly kang bebe bo, acha kangheng bawibawi py kang bebe teang bo.Ref 8.7: Theu 9.23–25; Ezek 38.22
8 Naibaly kani pri i amtaw thau nai pa-nyh i nai ly eng i, mawi pui ka-tawm kang thym naimy pangli y aphi kathiu bo: naibaly pangli phy thomrei y phyrei ly thi lawn vui bo;
9 naibaly pangli i heng nai amjy phy thomrei y phyrei ly dei i, paleaungchi py phy thomrei y phyrei ai ly taphra bo.
10 Naibaly kani pri i amtaw thau nai pa-thom i nai ly eng i, ka-si kalen pui harei, maiteaung kamta angveaung nai ly kani mang i dengdairei ang tla bo; naibaly huni ly tavo phy thomrei y phyrei tleaung y hawi, tuinochi tleaung y py tla bo:Ref 8.10: Is 14.12
11 huni ka-si amyn ly Tareng Sang Chy ne: naibaly tui phy thomrei y phyrei ly tareng sang chy lawn bo; hunaibaly tui ai ly kho hai nai deaungkho y khumi neangneangchi dei bo.Ref 8.11: Jer 9.15
12 Naibaly kani pri i amtaw thau nai palyh i nai ly eng i, kanito phy thomrei y phyrei hawi, lo phy thomrei y phyrei hawi, ka-sichi phy thomrei y phyrei py chau bo; hunaibaly nichi phy thomrei y phyrei ly kaveng lawn veng bo; kanithun py phy thomrei y phyrei ly angvang y, vum py hunai kamta ne teang.Ref 8.12: Is 13.10; Ezek 32.7; Joel 2.10, 31, 3.15
13 Naibaly kai ly khen i, ahm pui kani laileaung y angkeang iy, tao pajeng parai naimy, “Kani pri i amtaw thau nai leaung thomreichi i baw eng bi rai ai nai katynchi deaungkho y khaileaung pri tleaung y awm naichi ly taham si! taham si! taham si!” napi nai kathai.