7
Israela cheng 144,000
1 Huni bo y kacheng y hawi,pangli y hawi, dengkeaung ngierei y py ali my hm y ai nai, khaileaung i ali palyhrei paka naimy kani pri i amtaw thau nai leaung palyhreichi ai ly khaileaung taki palyhrei y angdo nai kaniu.Ref 7.1: Jer 49.36; Dan 7.2; Zek 6.5
2 Naibaly Tameuh kangheng i pajawp typ nai ka-ma-ra syn naimy kani pri i amtaw thau nai takhra ai ly kani theu naira y kalau nai kaniu; naibaly mymy ly kani pri i amtaw thau nai leaung palyhrei; kacheng hawi pangli y atiti hawi y nai sa hai thai ai nai leu nga naichi teng y ly tao pajeng parai naimy,
3 “Kaichi ly Tameuh i miseaungchi ai ly nichi i lukati y pajawp typ nai ka-ma-ra so y ryrei ly kcheng ai hawi pangli ai hawi, dengkeaungchi ai py atiti hawi y nai sai py so hai u moh,’ nanai aeu u bo.Ref 7.3: Ezek 9.4, 6
4 Naibaly huni pajawp typ nai ka-ma-ra nga naichi i nawi nai sai kathai i, Israela kangpreangchi i cheng jyn theung i nai khumi taseng atlo meaungkateaung palyh pa-ngo sang palyhreichi ai pajawp typ nai ka-ma-ra nga hai bo.
5 Juda cheng i khumi meaungkateaung atlo sang nyhreichi ai pajawp typ nai ka-ma-ra nga hai bo:
Ruben cheng i khumi meaungkateaung atlo sang nyhrei:
Kad cheng i khumi meaungkateaung atlo sang nyhrei:
6 Asera cheng i khumi meaungkateaung atlo sang nyhrei:
Naphtali cheng i khumi meaungkateaung atlo sang nyhrei:
Manase cheng i khumi meaungkateaung atlo sang nyhrei:
7 Sumeon cheng i khumi meaungkateaung atlo sang nyhrei:
Levi cheng i khumi meaungkateaung atlo sang nyhrei:
Isakhar cheng i khumi meaungkateaung atlo sang nyhrei:
8 Zebulun cheng i khumi meaungkateaung atlo sang nyhrei:
Josepha cheng i khumi meaungkateaung atlo sang nyhrei:
Benjamin cheng i khumi meaungkateaung atlo sang nyhreichi ai pajawp typ nai ka-ma-ra nga hai bo.
Khumi mipui hubai pui
9 Huni bo y kai ly khen i khen cham, theaung cheaungkhangchi hawi, cheng cheaungkhangchi hawi, khumi cheaungkhangchi hawi, leu cheaungkhangchi theung i ami py kati pajau y nai khumi mipui ka-teng ny y naichi ai ly kanih kangleung akhiu nai, kiu y lymlo syn naimy areng atehra hawi Beram Cho i mo y angdo nai kaniu;’
10 naibaly nichi ly tao pajeng parai naimy,
“Areng atehra tleaung y ateh nai achi i Tameuh teng y hawi,
Beram Cho teng y py paheng naira awm,” a nai aeu u bo.
11 Naibaly kani pri i amtaw thau nai bawibawichi ly areng atehra hawi, miteaung kehchi hawi, heng nai amjy palyhreichi ai taki teung tareung naimy angdo nai ne;
12 naibaly nichi ly areng atehra mo y ambeu u i, “Amen: Amtheaung naira hawi, nang parai naira hawi, cheng naira hawi, kawn naira hawi tahm pasang naira hawi sa thai naira hawi, ham naira py achi i Tameuh teng y deungtasarei awm jojo sy. Amen,” nanai Tameuh ai chiu u bo.
13 Naibaly miteaung kehchi theung i nai leaungrei ly kai teng y, “Hini kanih kangleung akhiu naichi ly amichi mo? Nichi ly ma i dengdairei jeu nai mo?” nanai deng.
14 Naibaly kai ly ni teng y, “Areng, nang ly pany bo,” kanapi. Naibaly mymy ly kai teng y, “Hinichi ly patang parai naira i dengdairei theu u naichi ne, nichi ly Beram Cho i thi y nichi i kanihchi pasiu iy, kaleung hai bo.Ref 7.14: Dan 12.1; Mt 24.21; Mk 13.19
15 Hunai deaungkho y nichi ly Tameuh i areng atehra mo y awm u i, mymy i achura yhm kalen pui y vum kanithun mymy i kalop sa pi jojo: naibaly areng atehra tleaung y ateh nai keung ly nichi i salo y mymy i kanih yhm py jang ai.
16 Nichi ly kajeu alam bi y ai, tui py ahai bi ai ny y, kanito hawi kabi my py nichi ai ang ai ny y:Ref 7.16: Is 49.10
17 ati mana nai mo nabaly areng atehra sala y awm nai Beram Cho ly nichi ai typ nai keung lawn ai i, nichi ai heng nai tuinochi mang y ang pahawi ai; naibaly Tameuh ly nichi i mei i dengdairei mei katui bawibawi tamui pi ai,” napi.Ref 7.17: Sam 23.1; Ezek 34.23; Sam 23.2; Is 49.10, 25.8