6
Palaw typ mai ka-ma-rachi
1 Naibaly beram Cho ly pajawp typ nai ka-ma-ra saryhreichi theung y harei su nai thym khala y ly kakhen; naibaly heng nai amjy palyhreichi theung y harei ly kani pajyh nai kamta raawi katheu iy, “Jeu jau,” napi nai kathai.
2 Naibaly kai ly khen i, khen cham keaungngo kangleung harei awm i, huni tleaung y atang nai keung ly thai syn bo; naibaly areng lukhym mymy teng y pei bo; mymy ly pajau nai thym khala y pajau ra ai nai theu bo.Ref 6.2: Zek 1.8, 6.3, 6
3 Naibaly mymy ly pajawp typ nai ka-ma-ra pa-nyh nai ly su phai su baly, heng nai amjy pa-nyh i nai ly,“Jeu jau,” napi nai kathai.
4 Naibaly keaungngo kamleng harei theu taleang bi bo; naibaly huni tleaung y atang nai keung teng y ly khaileaug i dengdairei aly naira la pi vui thai ai nai hawi, khumichi ai apadei leungtang hai thai ai nai py pei bo; mymy teng y haisau kalen py pei teang bo.Ref 6.4: Zek 1.8, 6.2
5 Naibaly mymy ly pajawp typ nai ka-ma-ra pa-thom nai ly su phai su baly, heng nai amjy pa-thom i nai ly, “Jeu jau,” napi nai kathai. Naibaly kai ly khen i, khen cham, keaungngo kamnum harei awm; huni tleaung y atang nai keung ly mymy i kiu y ne naira harei syn.Ref 6.5: Zek 6.2, 6
6 Naibaly huni heng nai amjy palyhreichi sala i nai ly raawi ka-tawm naimy, “Choh pui sierei pia vui pangrei sy, changleung sie thomrei py pia vui pangrei sy, asitui hawi kreip athai hang ai ly atiti hawi y nai sai py so hai moh,” napi nai kathai.
7 Naibaly mymy ly pajawp typ nai ka-ma-ra palyh nai ly su phai su baly heng nai amjy palyh nai i raawi ly, “Jeu jau,” napi nai kathai.
8 Hunaibaly kai ly khen i, khen cham, keaungngo ka-mang harei awm:huni tleaung y atang nai keung i amyn ly Dei Naira ne: naibaly Tavau Kho ly ni teng y abang bo. Naibaly nini ly haisau hawi, takang theu hai nai hawi, kanghawi kanglai tym hai nai hawi, khaileaung i mawi kasichi ai py teaung iy, khaileaung phy palyhrei ra y phyrei y padei ai nai leu nga bo.Ref 6.8: Ezek 14.21
9 Naibaly mymy ly pajawp typ nai ka-ma-ra pa-ngo nai ly su phai su baly, maicham anui y ly Tameuh i leu deaungkho y hawi, mymychi i pany hai nai leu patawn nai deaungkho y padei chum naichi i phailochi ai kaniu;
10 naibaly nichi ly tao pajeng parai naimy, “Aw Areng, kachai hawi meitang, nang ly tara chih iy, khaileaung pri y awm naichi i tlang tleaung y kaichi i thi i kavui y vawitheung tha pi y nai ly majirei kra ai mo?” nanai aeu u bo.
11 Naibaly nichi leaung leaungrei teng y kanih kangleung harei pei bawibawi bo; naibaly nichi kamta khyp my padei ai tla nai, nichi i miseaung ahawichi hawi amjo amnauchi py angym y ryrei ly anawn u rai ai nai tla, nanai nichi teng y thui pi bo.
12 Naibaly mymy ly pajawp typ nai ka-ma-ra tariurei nai ly su phai su baly kai ly khen i, kaleih khra pa-rei theu bo; kanito py mawi mui kanih kamta panum iy, lo py bom verei thi kamta lawn veng bo;Ref 6.12: Amt 11.13, 16.18; Is 13.10; Joel 2.10, 31, 3.15; Mt 24.29; Mk 13.24–25; Lk 21.25
13 naibaly thaidu keung y ali ho parai nai my hm nai kha y thawn y nai athai vui taru nai kamta, kani ka-sichi ly khaileaung y tla bo.Ref 6.13–14: Is 34.4
14 Naibaly kani ai ly cha-iu aeang taeang nai kamta tasyh vui bo; mawi pui bawibawi hawi, tlawn bawibawi py nichi i meingtym i dengdairei tasyh vui bo.
15 Naibaly khaileaung pri i samrangchi hawi, khumi kalenchi hawi, tavaimi luchi hawi, khumi kanangchi hawi, khumi atho kaawmchi hawi, miseaungchi hawi, miseaung ny y nai cheaungkhangchi ly tapiu y hawi, mawi pui lengseaung pui y py aheu u bo;Ref 6.15: Is 2.19, 21
16 naibaly nichi ly mawi puichi hawi lengseaung puichi teng y ly, “Kaichi ai taphom kyh, areng atehra tleaung y ateh nai keung meimai i dengdairei hawi, Beram Cho i kado theu naira i dengdairei py kaichi ai heu kyh:Ref 6.16: Hos 10.8; Lk 23.30
17 nini i kado theu naira kani aly len parai nai ang tym nai bo he; hunaibaly ami angdo pajau ai mo?” napi.Ref 6.17: Joel 2.11; Mal 3.2