35
Josia my Katlen Vui Nai Pawi sa nai
(2 Areng 23:21-23)
1 Samrang Josia ly Areng ai tahm pasang nai, Jerusalem mary y Katlen Vui nai Pawi sa iy, angchei lo kani holai palyhrei kani y si hawi beramchi tleh hai bo.
2 Samrang ly pathyp pi nai keungchi ai Achura yhm theung y sa ai nai kalopchi pasym pi iy, hunichi sa angym ai nai atho pei.
3 Israela chengchi ai atiti patiu pi nai, mymychi ai Areng teng aau yb nai Levi theaungchi teng y samrang my, “Davida i chapo samrang Solomon i sa nai Achura yhm theung y Leu Maikawm Pawm khai u. Nangchi ly huni Pawm ai meingtym kasyh piupa y naimy, nangchi i Areng Tameuh hawi mymy i khumichi i vui kalop so u.
4 Samrang Davida hawi chapo samrang Solomon nini my pei nai kalopchi ai nupai ka-thui, Achura yhm theung y meingtym la u ai nai tla.Ref 35.4: 2 Neng 8:14
5 Huna nai sa naira y Israela cheng yhm dengtheung tleireichi ai, nangchi theung i phyreichi ly sabawm ai nai so amteaung u.
6 Nangchi ly Katlen Vui nai beramchi, mi-ichi tleh ai nai tla. Vai, nangmychi ai Reita leaungsai kamta kachai sa iy, Mosi dengdairei Areng i leu pei naichi teaung u patawm ai nai kapathyprachi angvei u rym,” napi.
7 Samrang Josia ly Katlen Vui nai Pawira y mipuichi teaung ai nai mymy hai theung i beram katheang kalen hawi mi-i cho amai 30,000 rei, si katai amai 3,000 rei talam nai ne.
8 Ni i miteaung kehchi my py khumichi, pathyp pi nai keungchi hawi Levi theaungchi teaung ai nai pei pi bo. Naibaly Achura yhm miteaung kehchi napi nai pathyp pi nai keung kalen keh Hilikia, Zekhariah hawi Jehielachi ly pathyp pi nai keungchi teng y beram cho, mi-i cho amai 2,600 rei hawi si katai amai 300 rei, pawi theung y apathyp ai nai talam pi nai ne.
9 Levi theaungchi ai lu sa nai Konania, Shemaiah hawi amnau Nethanela, Hashabiah, Jeiela hawi Jozabachi my py, Levi theaungchi apathyp ai nai beram cho, mi-i cho amai 5,000 rei, si katai amai 500 rei talam pi bo.
10 Katlen Vui nai Pawi sa ai nai atitichi angveirym pajau nai bo y pathyp pi nai keungchi hawi Levi theaungchi ly samrang i leu pei nai kamta mymychi i vui meingtym la u bo.
11 Levi theaungchi ly beramchi, mi-ichi tleh iy peih lei u. Pathyp pi nai keungchi my maicham salo y thi katheng u.
12 Naibaly nichi ly Mosi i reita cha-iura thui yb nai kamta, leng patlum ai nai tawnbawichi ly mipuichi teng y yhm dengtheungchi ka-thui paji pi sei bo.
13 Levi theaungchi ly khai yb nai reita leaungsai kamta, Katlen Vui nai kapathyp ra ai mai ra y dang iy, alai laawm, sa-y-kang pui, sa-y-kang chychi hawi byh chum baly, khumichi teng y paji pi kaliki nai ne.Ref 35.13: Theu 12:8-9
14 Naibaly Levi theaungchi ly mymychi i vui hawi Aron kangpreang pathyp pi nai keungchi i vui, mawi phy paji pi bo. Ati mana nai mo na baly pathyp pi nai keungchi ly bom verei leng patlum nai kapathyprachi hawi, tawnbawi thauchi ai leng patlum nai ly kani dym pa-rei kalop nawi u nai deaungkho y ne.
15 Asap nupaichi theung i katyn kapau beu kawp naichi napi nai Asap, Heman hawi samrang i amo Jeduthunchi ly samrang Davida my thui yb nai kamta, meingtym khai pi naira y awm u bo. Achura yhm tamcheaungchi ly mychi ai khai pi nai meingtymchi ra i nai theu u vui ai nai aly by y. Ati mana nai mo na baly nichi i vui takhra Levi theaungchi my, Katlen Vui nai dym biu sawn pi rym nai deaungkho y ne.Ref 35.15: 1 Neng 25:1
16 Hunai deaungkho y Areng ai chiu nai, Katlen Vui nai Pawi sa nai hawi maicham salo y leng patlum nai kapathyprachi talam nai molam y, samrang Josia my leu pei nai kamta, huni kani y my sa u nai ne.
17 Huni meingtym y awm u nai Israela khumi bawibawichi ly Katlen Vui nai Pawi hawi tako angbo abawi y nai pawi kani saryhrei sa u bo.
18 Amo Samuela deung i dengdairei, mana khala py Katlen Vui nai Pawi ai hina nai kamta sa nai by y. Samrang Josia hawi vanrei pathyp pi nai keungchi, Levi theaungchi, Juda khumichi, Israela khumichi hawi Jerusalem mary i khumichi sa u nai Katlen Vui nai Pawi ka-tawm ly takhra mani samrang py so vai y.
19 Hini pawi ly samrang Josia my peang nai saneng holai tajarei saneng y sa nai ne.
Josia i samrang deung tem nai
(2 Areng 23:28-30)
20 Samrang Josia ly Achura yhm i vui hina nai atitichi sa pajau nai thym khala y, Aikupta samrang Niko ly Euphrat tavo sahawi i Kakhemish mary y tiu ai nai jeu bo. Josia ly ni ai paka ai nai atho sa.
21 Na i py Niko my, “Aw Juda samrang awi, vai, kai i tiu nai tavai ly nang hawi abi y leang. Kai ly nang ai tiu ai nai jeu nai ny y; kai i paleung ka-echi ai tiu ai nai jeu nai teu. Tameuh my tiu kaliki ai nai leu ang pei nai ne. Kai mang y awm nai Tameuh ai ka-awi so moh. Ti y baly Tameuh my nang ai ang taphra ai,” nanai Josia teng y savai pato iy thui hai bo.
22 Na i py Josia ly tavai atiu ai nai leu pacheang yb nai deaungkho y, mymy i mo ataphra naimy tavai amsa. Ni ly samrang Niko dengdairei Tameuh my pei nai leu tangai y naimy, Mekido angdymra y tavai atiu u bo.
23 Tavai atiu nai thym khala samrang Josia ly Aikupta khumichi i thailiho chawm nai deaungkho y, miseaungchi teng y, “Kai ly tamo kalem nga bo; kai ai kajeaung u veng jau!,” nanai leu pei.
24 Ni i risachi my py kajeaung iy khai yb nai takhra ka-ri tleaung y theng i, Jerusalem mary y vawi hai bo. Samrang ly ka-ri tleaung y my tlang tem nai deaungkho y, ni i veu ai ly samrangchi i tapreaung y up bo. Juda khumichi hawi Jerusalem mary i khumi bawibawichi ly samrang dei nai molam y paleung si nai vo tangam u.
25 Amo Jeremia ly samrang Josia molam y vo khulym harei tajiu iy, khulym kawp nai neampacho, neampachychi my, Josia dei nai i vui y paleung si nai ka-ma-ra, hini khulym thui u. Hina nai khulym thui nai ly Israela chengchi i reita lawm i, huni vo khulym ly vo khulym cha-iu pui theung y abawi nai ne.
26 Josia i Areng teng y ahihawi nai sai hawi Reita leu pei naichi tangai nai saichi py,
27 ni i satang bawibawichi hawi ni i sa nai ati cheaungkhangchi py, Israela samrangchi i cha-iu theung y tajiu pi typ nai ne.