36
Juda samrang Joaha
(2 Areng 23:30-35)
1 Juda mipuichi ly Josia i chapo Joaha ai vawi iy, Jerusalem mary y samrang palyn nai asitui leih u bo.
2 Joaha ly saneng 23 rei awm nai khala y Juda samrang lawm i, Jerusalem mary y lo thomrei peang nai ne.
3 Aikupta samrang Niko ly ni ai patiu vui iy, Juda mipuichi teng i langseaung tangka chang kaji sie 5,200 rei hawi muku chang kaji sie 50 rei hnei.
4 Niko ly Joaha i amnau Eliakim ai Juda samrang y palyn iy, Jehojakim, nanai amyn kangtha pei nai ne. Joaha ai ly Aikupta pri y Niko my hawi jo bo.Ref 36.4: Jer 22:11-12
Juda samrang Jehojakim
(2 Areng 23:36-24:7)
5 Jehojakim ly saneng 25 rei awm nai khala y Juda samrang lawm i, Jerusalem mary y saneng holai harei peang nai ne. Ni ly mymy i Areng Tameuh tlang tleaung y kamngo sa.Ref 36.5: Jer 22:18-19, 26:1-6, 35:1-19
6 Babulon samrang Nebukhadnezar ly Juda pri theung y kun i, Jehojakim ai patiu iy, sengkry hawi pakheng naimy Babulon pri mang y hawi jo nai ne.Ref 36.6: Jer 25:1-38, 36:1-32, 45:1-5; Dan 1:1-2
7 Achura yhm i yhmtheaung katui phyreichi py la iy, my i Babulon samrang yhm y khai bo.
8 Jehojakim i amso ngai hawi nai sa nai saichi hawi, hawi y naira sa naichi raurei, ni i takhra sa nai leaung sai bawibawichi ai Juda samrangchi i cha-iu theung y tajiu pi typ nai ne. Ni i chapo Jehojakhin ly ampo i meingtym y atym i, samrang lyn bo.
Juda samrang Jehojakhin
(2 Areng 24:8-17)
9 Jehojakhin ly saneng holai tajarei awm nai khala y, Juda pri samrang lawm i, Jerusalem mary y lo thomrei peang nai ne. Ni py Areng i tlang tleaung y kamngo sa.
10 Kanipui theu nai khala y samrang Nebukhadnezar ly Jehojakhin ai patiu iy Babulon pri y hawi vui bo. Samrang yhm i yhmtheaung katuichi py la pi pawn nai ne. Naibaly Nebukhadnezar ly Jehojakhin i ampochy Zedekiah ai Juda samrang y palyn i, Jerusalem mary y peang hai bo.Ref 36.10: Jer 22:24-30, 24:1-10, 29:1-2, 37:1; Ezek 17:12, 13
Juda samrang Zedekiah
(2 Areng 24:18-20; Jer 52:1-3a)
11 Zedekiah ly saneng 21 rei awm nai khala y Juda samrang lawm i, Jerusalem mary y saneng holai harei peang nai ne.Ref 36.10: Jer 22:24-30, 24:1-10, 29:1-2, 37:1; Ezek 17:12, 13
12 Ni ly Areng i tlang tleaung y kamngo sa iy, Areng i leu thui pi nai keung amo Jeremia i leu ai tahm apanem iy tangai y bo.
Jerusalem mary anawi nai
(2 Areng 25:1-21; Jer 52:3b-11)
13 Zedekiah ly samrang Nebukhadnezar ai tiu. Nebukhadnezar ly mymy tlang tleaung y ka-ym awm ai nai, ni ai athorei my Tameuh i amyn y, vaineng abeu hai bo. Zedekiah ly paleung tang i uikheih y. Israela chengchi i Areng Tameuh teng y ali teang y naimy awm bo.Ref 36.13: Ezek 17:15
14 Juda chengchi ai lu sa naichi, pathyp pi nai keungchi hawi mipuichi py, mymychi saleaung deaungpa khumichi i sa nai kamta mynchi chiu iy, mymy i kachai khai takhra nai Achura yhm y chai hai y bo.
15 Nichi amsi pajochi i Areng Tameuh ly mymy i khumichi hawi Achura yhm law tleaungra nga ai ngai hai nai deaungkho y, nichi ai pany hai pi ai nai amochi pato pi bi nai ne.
16 Na i py nichi ly Tameuh i amtaw thauchi ai panui hai iy, leu pei nai tangai u y. Amochi ai panui hai u bo. Na i py kangkhym y Areng ly khri pa-rei kado theu nai deaungkho y, nichi tleaung pajau ai nai pei y.
17 Hunai deaungkho y Areng ly Babulon samrang ai tiu hai nai ne. Huni samrang ly Juda thawndeang deaungdichi ai Achura yhm theung y tleh bo. Tameuh my miteaung deaungdi, neampacho neampachy, no naichi, no y naichi ai pahen y naimy, Babulon samrang i kiu y au nai ne.Ref 36.17: Jer 21:1-10, 34:1-5
18 Babulon samrang ly Achura yhm theung i ateaungchi py, muku tangkachi py, samrang hawi miteaung kehchi i muku tangka ngiereichi py, la pi pawn bo.
19 Ni ly Achura yhm hawi mary ai mai leng iy, Jerusalem mary apaichi py taphra bo. Samrang yhmchi hawi vang kateng vawnsaichi hawi vanrei, mai leng pawn nai ne.
20 Samrang ly dei kamthum khumichi ai Babulon pri mang y hawi iy, Pasian empara pri amthawn nai neng tym nai pa-rei, mymy hawi my i kangpreangchi teng y miseaung achei hai bo.
21 Na i py amo Jeremia dengdairei Areng my thui pi nai leu angym hai nai ly “Anawn kani y ja ynote 36:21\xk anawn kani y ja y: saryh saneng y li hlau so y ai nai thui pi nai ne (Levi 25:1-7 khen). \x*vui lawh nai y, pany jo ai nai molam, huni pri y saneng vui saryhrei, khumi angso savai angau ai,” napi.Ref 36.21: Jer 25:11, 29:10
Kuru my Judachi ai vawi hai ali teang nai
(Ezara 1:1-4)
22 Pasia empara samrang Kurunote 36:22\xk Pasia samrang Kuru: Babulon samrang ai 539BC saneng y peang nai Babulon empara samrang lawm nai ne. \x*my peang nai angchei saneng y, Areng my ni teng y leu pei nai cha patheu hai iy, ni i empara pri verei y phain hai nai ne. Hina nai sa nai ly amo Jeremia dengdairei, Areng my leu pei nai kamta tym hai ai nai ne.
23 “Hini ly Pasia empara samrang Kuru i leu pei nai ne. Kani pri mang y awm nai Areng Tameuh my, kai ai khaileaung pri verei peang hai iy, Juda pri Jerusalem mary y mymy i vui Achura yhm sa ai nai kalop kai teng y au bo. Tameuh i khumichi napi nai khumi bawibawichi ly Jerusalem mary y chei u. Tameuh ly nangchi hawi vanrei awm hai sy,” napi.