34
Juda samrang Josia
(2 Areng 22:1-2)
1 Josia ly saneng tajarei awm nai khala y Juda samrang lawm i, Jerusalem mary y saneng 31 rei peang nai ne.Ref 34.1: Jer 3:6
2 Ni ly Areng i kangai sa; mymy i amsi pajo samrang Davida i sa nai kamta amtiu iy, Tameuh i Reita bawibawichi tangai nai ne.
Josia ly myn y chiu nairachi taphra nai
3 Josia ly samrang lyn nai khala saneng tajarei awm i, saneng khri pa-rei theang teu i py, mymy i amsi pajo samrang Davida i Tameuh ai chiu amteaung bo. Huni bo i saneng palyhrei khala y ni ly myn chiu nai meingtymchi, tameuhnu Asherah i tamkhawnchi hawi takhra myn ngiereichi ai taphra nai ne.
4 Ni i leu pei nai kamta Bala tameuh ai chiu nai maichamchi taphra pawn iy, tameuhnu Asherah mynchi hawi takhra mynchi py taphra piupa pawn chum baly, huni maichamchira apathyp nai khumichi i tapreaungchi salo y hei u phro bo.Ref 34.4: 2 Areng 21:3; 2 Neng 33:3
5 Samrang ly myn chiu nai pathyp pi nai keungchi i hiuchi ai mychi i maicham salo y mai patawi hai bo. Hina nai kamta sa nai deaungkho y Juda pri hawi Jerusalem mary ai, Reita leaungsai kamta chai naira nga hai ali teang bo.Ref 34.5: 1 Areng 13:2
6 Ni ly Manase khu ka-peang, Ephraim khu ka-peang, Simeon khu ka-peang hawi tosyh mang i Naphtali khu ka-peang tym pa-rei, meingtym tleirei i marychi hawi phra nai meingtymchi ra py, hina nai kamta sa nai ne.
7 Tosyh mang pri verei y maichamchi hawi tamkhawnchi taphra. Mynchi ai dei palawn piu iy mui katuichi leng patlum nai maichamchi py, pakhau piupa iy Jerusalem mary y vawi ali teang bo.
Reita cha-iu niu teang nai
(2 Areng 22:3-20)
8 Samrang lyn nai saneng holai tajarei saneng y, pri verei hawi Achura yhm y myn chiu naichi ai kachai sa chum baly, samrang Josia ly Azalia i chapo Shaphan, Jerusalem mary aripeang Maseja hawi Joaha i chapo samrang i bangtang kalen Joah, nichi leaung thomreichi ai Areng Tameuh i Achura yhm sa palum ai nai pato nai ne.
9 (Ephraim, Manase hawi takhra tosyh mang khumichi teng i py, Juda khumichi, Benjamin theaungchi hawi Jerusalem mary khumichi teng i py) Achura yhm katheu pa-kho typ nai Levi theaungchi my cheaung nai tangkachi ly pathyp pi nai keung kalen keh Hilikia teng y au pi u bo.
10 Naibaly huni tangkachi ai Achura yhm palum naira y lu sa nai leaung thomreichi teng y au pi nai ne.
11 Nichi ly huni tangkachi ai lasamachi hawi kupe kakawpchi teng y pei iy, nichi my kry y nai deaungkho y phra nai yhmchi palum ai nai lengseaungchi hawi dengkeaungchi van u bo.
12 Hini kalop sa nai khumichi ly ka-ym awm parai naichi ne. Nichi ly Levi theaung Merari nupaichi theung i Jahath hawi Obadia, Levi theaung Kohath nupaichi theung i Zekhar hawi Meshulamchi anui y kalop sa nai ne. (Levi theaung bawibawichi ly katyn kapau beu kawi naichi ne.)
13 Levi theaung phyreichi ly yhm sa nai ateaungchi tawn nai kalopra py, phyreichi ly kalop takhra takhrachi ra y kalop sa keungchi ai kalop pacheang naira py, phyreichi ly recordchi kry nai, ti y baly katheu pa-kho tym naichi ra py kalop sa u nai ne.
14 Vawnsai ateaungchi khai nai takun theung i tangka la nai thym khala y Hilikia ly Tameuh my Mosi teng y pei nai Areng i Reita cha-iu niu nai ne.
15 Ni ly Shaphan teng y, “Kai ly Achura yhm takun theung y Reita cha-iu kaniu bo,” napi i, Shaphan teng y Reita cha-iu pei pi bo.
16 Shaphan py samrang teng y syn i, ni teng y, “Kaichi ly nang i pataw nai kalopchi sa nai pajau bo.
17 Achura yhm theung i tangkachi py la iy, kalop sa keungchi hawi lu sa nai khumichi kiu y au pi bo,” napi.
18 Huni bo y, “Hini cha-iu ly kai teng y amo Hilikia my ang pei nai ne,” nanai amti pi chum baly, huni cha-iu ai samrang teng y tao pajeng parai naimy phain pi bo.
19 Samrang ly huna nai phain pi nai ai thai nai khala, mymy i ateaungchi sei nai ne.
20 Ni ly Hilikia, Shaphan i chapo Ahikam, Mikaia i chapo Abadon,note 34:20\xk Abadon: 2 Areng 22:12 ra y ly Akhabo, napi. \x*secretary Shaphan hawi tamcheaung Asaiahchi ai palau iy,
21 “Nangchi ly chei u iy, hini cha-iu theung i thui naichi kai i vui hawi Juda pri hawi Israela pri y awm jo rai nai khumichi i vui py Areng teng y deng pi u cham. Achi i amsi pajochi ly Areng i leu tangai u y. Reita cha-iu theung y awm naichi so patawm u y nai deaungkho y, Areng ly achi i tlang tleaung y kado theu nai bo,” napi.
22 Samrang i leu pei nai kamta Hilikia hawi phyrei khumichi ly Jerusalem mary kangtha ngan mang y awm nai khumi, Hulada napi nai neampachy amo teng y chei iy leu deng u bo. (Huni neampachy i juvo, Haraha i katu, Tikvah i chapo Shalum ly Achura yhm i ateaungchi kry nai keung ne.) Nichi ly huni neampachy teng y atiti tym naichi amti pi.
23 Huna nai khala neampachy my nichi ai vawi hai i samrang teng y,
24 Areng teng i leu pei naichi amti hai pi bo. Leu pei naichi ly “Samrang teng y phain pi nai cha-iu theung y abawi nai vaineng leusai kamta, Jerusalem mary hawi vanrei, mary i khumi bawibawichi ai kaimy taphra pawn ai.
25 Nichi ly kai ai khai su iy, tameuh takhrachi teng y apathyp u bo. Hunai deaungkho y nichi ly mymychi i sa nai atitichi molam y, kai ai kado theu hai ra bo. Kai ly Jerusalem mary ai kado theu hai bo i, huni kado theu nai ly rym ai ny y.
26 Samrang teng y Israela chengchi i Areng Tameuh my, ‘Nang ly Reita leu pei nai cha-iu theung y tajiu nai kamta tangai bo.
27 Jerusalem mary i khumichi ai pajeng ai nai kaimy leumo pei nai thai nai khala y, nang ly vo bo; nangmy i ateaungchi sei iy uikheih naimy, kai i mo y paleung apanem nai ne. Naibaly kai ly nang i chiu sa hnei takeng nai thai nai deaungkho y,
28 Jerusalem mary tlang tleaung y kamngo pajeng ai nai ly nang i deung y avum ai ny y. Kai ly nang ai chymme naimy tlang tem ai nai pei ai,’ nanai leu pei bo,” napi.
Nichi ly huni leu amti pi ai nai samrang teng y vawi u nai ne.
Josia ly Areng i leu tangai ai nai Leu Maikawm asa nai
(2 Areng 23:1-20)
29 Samrang Josia ly Juda pri hawi Jerusalem i miteaung kehchi ai palau iy,
30 pathyp pi nai keungchi, Levi theaungchi, khumi kamawn, kanangchi raurei, Jerusalem mary i khumi bawibawichi hawi vanrei, Achura yhm mang y chei u bo. Samrang ly huni khumi bawibawichi teng y Achura yhm theung y niu nai Leu Maikawm cha-iu ai tem pa-rei phain pi nai ne.
31 Ni ly samrang i leungchengnote 34:31\xk samrang i leungcheng: Hebrai leu y “my i meingtym y” nanai sai ne. \x* sahawi y angdo iy, “Kai ly nang i leu tangai ai. Nang i reita hawi leu pei naichi ai paleung hawi verei kry ai. Leu Maikawm cha-iu theung y tajiu nai kamta sa patawm ai,” nanai Areng hawi Leu Maikawm asa bo.
32 Samrang ly Benjamin theaungchi hawi Jerusalem mary y awm nai khumi bawibawichi ai py, Leu Maikawm atyp ai nai adeu hai bo. Hunai deaungkho y Jerusalem mary i khumi bawibawichi ly amsi pajochi i Tameuh hawi mymychi asa nai Leu Maikawmra abawi naichi teaung patawm u.
33 Samrang Josia ly Israela chengchi i khu ka-peang theung i, amso ngai hawi nai myn ngiereichi ai taphra iy, mymy heng nai sala ryrei khumichi ai, amsi pajochi i Areng Tameuh ai chiu hai nai ne.