33
Juda samrang Manase
(2 Areng 21:1-9)
1 Manase ly Judachi i samrang lawm nai khala y saneng holai nyhrei awm; ni ly Jerusalem mary y saneng 55 rei peang nai ne.
2 Areng my mymy i khumichi hini pri y kun nai thym khala, patheu pi pawn nai khumichi i reita tanynchi mang y Manase ly abang iy, mymy i tlang tleaung y kamngo sa bo. Ref 33.2: Jer 15:4
3 Mymy i ampo Hezekia my taphra pawn nai myn chiu naira meingtymchi sa palum teang nai ne. Bala tameuh teng y apathyp ai nai maichamchi sa iy, Israela samrang Ahab kamta, tameuhnu Asherah i tamkhawnchi pado nai hawi ka-sichi ai py chiu bo.
4 Mymy ai chiu jojo ai nai meingtym napi nai Areng my thui nai Achura yhm theung y, mynchi teng y apathyp ai nai maichamchi sa u.Ref 33.4: 2 Neng 6:6
5 Achura yhm apai nyhrei sala i ly-um ra y ka-si taukichi ai chiu ai nai maichamchi sa.
6 Mymy i chapochi ai Hinnom leaunghawira y leng patlum nai apathyp nai ne. Ni ly mo mang i satang thui kawp nai, dawi sa naichi teaung iy, leung khen kawp nai hawi vawinam kun nai khumichi teng y atitichi deng reng nai ne. Ni ly Areng i tlang tleaung y khri pa-rei kamngo sa iy, kado theu hai bo.
7 Ni ly Achura yhm theung y myn khai nai ne. Huni Achura yhm molam y Tameuh my Davida hawi chapo Solomon teng y, “Israela theaung holai nyhreichi i khu ka-peang ngiereichi theung i, kaimy vawi takhra nai Jerusalem mary i hini Achura yhm theung y, kai ai chiu u jojo ai nai tla.Ref 33.7-8: 1 Areng 9:3-5; 2 Neng 7:12-18
8 Israela chengchi ly kai i leu pei nai ngiereichi tangai iy, Mosi my pei nai Reita ngiereichi kry u baly, kai ly nichi ai amsi pajochi teng y kaimy pei nai pri i dengdairei kapatheu ai ny y,” napi.
9 Manase ly Israela chengchi kun u nai thym khala y, Areng my patheu pi pawn nai khumichi tleaung y khri pa-rei kamngo sa ai nai, mymy i khumichi ai lam patei bo.
Manase uikheih nai
10 Areng my Manase hawi khumi mipuichi ai pany hai pi teu i py, nichi ly tangai u y.
11 Hunai deaungkho y Areng ly Asuria tavaimi kamkawm hawi tavai luchi ai, Juda pri y kun ai nai pei bo. Nichi ly Manase ai patiu i tamo leangkhawn hawi ve iy, sengkry hawi pakheng naimy Babulon mary mang y hawi jo nai ne.
12 Samrang ly ngari kamtang avum nai khala y, mymy i Areng Tameuh teng y ali teang i, kasabawmra nga ai nai hnei takeng bo.
13 Tameuh my Manase i chiu sa nai tangai pi i, ni ai Jerusalem mary y vawi ali teang ai nai pei iy, peang ai nai pei. Huna khala naini Areng ly Tameuh ne, nanai Manase hawihai palai pany bo.
14 Naibaly Manase ly Davida mary nisi mang i Kihon micheaung sahawi leaunghawi dengdai tosyh mang ngo katheu pa-kho hawi Ophel napi nai meingtym ryrei, angam mang mary apai pasang nai ne. Samrang ly Juda pri lengseaung apai tapang nai mary ngiereichi ra py, tavailu leaungrei y tavaimi kamkawm chy harei hawi kry ai nai khai bo.
15 Ni ly cheng takhra khumichi i tameuhchi hawi my i khai nai mynchi ai Achura yhm i dengdairei py, mynchi teng y apathyp nai maichamchi ai Achura yhm awm nai mawi hawi Jerusalem mary meingtymchi dengdairei py, taphra pawn nai ne. Samrang ly huni bawibawichi ai mary angam mang y patheu pawn bo.
16 Ni ly Areng ai chiu ai nai maicham sa palum teang chum baly, amkawm teang nai kapathypra hawi kawn nai kapathyprachi talam nai ne. Juda khumi bawibawichi ly Israela chengchi i Areng Tameuh ai chiu ai nai leu pei bo.
17 Khumichi ly takhra chiu nai meingtymchi ra y, kapathyprachi talam u jojo teu i py, Areng teng y naini apathyp u nai ne.
Manase i peang nai deung tem nai
(2 Areng 21:17-18)
18 Manase i sa nai takhra leaungsai ngiereichi py, Tameuh teng y chiu sa hnei takeng nai hawi Israela chengchi i Areng Tameuh i amyn y amochi my ni teng y thui pi nai leuchi py, Israela samrangchi i cha-iu theung y tajiu pi typ nai ne.
19 Samrang i chiu sa nai hawi Tameuh my pathang pi nai sai, ni i kamngo sa naichi hawi y naira sa naichi, ni i sa nai myn chiu naira meingtymchi, tameuhnu Asherah i tamkhawnchi hawi ni i chiu nai mynchi satang ly amochi i cha-iu theung y tajiu pi typ bo.
20 Manase dei nai khala y, ni ai ly samrang yhm theung y up u nai ne. Naibaly chapo Ammon ly ampo i meingtym y amtym i, samrang lyn bo.
Juda samrang Ammon
(2 Areng 21:19-26)
21 Ammon ly saneng 22 rei awm nai khala Juda samrang lawm i, Jerusalem mary y saneng nyhrei peang nai ne.
22 Ni ly mymy i ampo Manase kamta Areng i tlang tleaung y kamngo sa i, ampo i chiu nai mynchi chiu teang bo.
23 Na i py ni ly ampo kamta paleung apanem naimy Areng teng y ahihawi y. Ampo tleaung y malawn py kamngo sa nai ne.
24 Samrang Ammon i bangtangchi ly kangviu y dawn paviu iy, ni ai samrang yhm y padei u bo.
25 Na i py Juda khumichi my Ammon ai padei nai khumichi ai padei teang iy, ni i chapo Josia ai samrang palyn u nai ne.