2
Achura yhm sa ai nai angveirym nai
(1 Areng 5:1-18)
1 Samrang Solomon ly Areng ai chiu ai nai Achura yhm py, mymy i vui samrang yhm py sa ai nai ka-dawn awm.
2 Samrang ly vawnsaichi tawn ai nai kalop sa keung khumi leaung 70,000 rei, lengseaung khawi nai kalop sa keung khumi leaung 80,000 rei, kalop sa keungchi ai kalop pacheang nai keung leaung 3,600 reichi ai khai takhra bo.
3 Solomon ly Turu samrang teng y savai pato iy leu pei nai ly “Nang ly kai i ampo samrang Davida teng y samrang yhm sa ai nai molam saitleang keungchi jo pi nai kamta, kai hawi py ka-jo ka-van so sina.
4 Kai ly kaimy i Areng Tameuh ai chiu ai nai Achura yhm sa ai. Huni Achura yhm ly kai hawi kaimy i khumichi chiu sa ai nai meingtym lawm ai. Huni Achura yhm theung y rimui mui katuichi leng patlum iy, khai takhra nai tako avawrei talam naimy, dym tlei, khawn tlei, anawn kani, lo si pawi kani hawi kaichi i Areng Tameuh ai tahm pasang nai takhra kani kachaichi neng khala, leng patlum nai kapathyprachi talam ai nai ne. Areng ly Israela khumichi teng y hina nai kamta sa jojo ai nai leu pei bo.
5 Kaichi i Tameuh ly tameuhchi bawibawi tleaung y len keh nai deaungkho y, kaichi ly khri pa-rei len nai Achura yhm sa ai nai dawn.
6 Tameuh i vui ly ami py Achura yhm so pi pajau y leang. Ati mana nai mo na baly temripma pany y na pa-rei kau nai kani khusang malawn py, Tameuh i vawi ly amchei asai rai. Hunai deaungkho y kai ly Tameuh i vui rimui patawi naira Achura yhm naini kasa ai.Ref 2.6: 1 Areng 8:27; 2 Neng 6:18
7 Vai nang ly kai teng y myn oh nai keung, muku, tangka hawi kheupaja paitheng, pau thun kawp nai keung, an kamsen, kamngau, kangdau aneng kawp nai khumi ai kai teng y pato pi kyh. Huni khumi ly kai i ampo my vawi takhra nai Juda pri hawi Jerusalem mary i, kupe kakawpchi hawi vanrei sa ai nai ne.
8 Nang i dengkeaung paliu nai khumichi ly khri pa-rei kalop kawp, nanai kai pany. Hunai deaungkho y Lebanon daichi theung i saitleang keung, maicha keung hawi junipa keungchi tha pi ba.
9 Kai i sa ai nai Achura yhm ly khri pa-rei len parai nai deaungkho y, nang i khumichi dengkeaung kalop sa naira y, nang i khumichi ai sabawm ai nai kai i khumichi ai pato pi ai.
10 Kai ly nang i kalop sa keungchi i vui cha nei vawn chohpui chomaw teaung 250,000 rei, chajai choh theaung 250,000 rei, kreip hang ka-leang 110,000 rei hawi olive asitui ka-leang 110,000 rei tha pi ai,” napi.
11 Turu samrang Hiram ly Solomon teng y cha pathang pi. Huni cha theung y ly “Areng ly mymy i khumichi ai tamen nai deaungkho y, nang ai nichi i samrang lawm ai nai ang vawi takhra nai ne.
12 Kani hawi khaileaung sa nai keung Israela khumichi i Areng Tameuh ai ly palo nai awm sy! Mymy ly Davida teng y cheng naira awm nai chapo leaungrei pei pi bo. Huni chapo ly vai, Areng i vui Achura yhm hawi mymy i vui samrang yhm sa ai nai paran bo.
13 Hunai deaungkho y Huram napi nai kupe kakawp ai, nang teng y kang pato pi ai. Nichi ly cheng naira awm iy kalopra y kawp parai nai khumi ne.
14 Ni i amhm ly Dan theaung, ni i ampo ly Turu mary i khumi ne. Ni ly muku, tangka, kheupaja, tamo, lengseaung hawi dengkeaung hawi sa nai vawnsai ateaungchi sa kawp iy, kamsen, kamngau, kangdau ateaungchi, kanih mai ka-synchi py aneng kawp nai ne. Sa manme nai kalopchira y kawp katlen i, ni ai tau pei nai kamta sa pajau nai khumi ne. Ni ai nang i ampo my teaung nai kupe kakawpchi hawi vanrei kalop so hai ba.
15 Hunai deaungkho y nangmy adeu nai kamta vai, kai teng y chohpui chomaw, chajai chohnei, kreip hang hawi olive asituichi tha pi ba.
16 Kai ly nang i aly ngai nai kamta Lebanon mawi i saitleang keungchi paliu iy, dengkeaung pan sa ai i, pangli mang Joppa mary tym pa-rei pathui pi ai. Huni mary i dengdairei Jerusalem mary y tym pa-rei ly nang i khumichi my la pajau mang,” napi.
Achura yhm sa amteaung nai
(1 Areng 6:1-38)
17 Samrang Solomon ly ampo Davida my, khumi amyn vuikanai la nai kamta, Israela pri y awm nai cheng takhra khumichi ai amyn vuikanai la nai khala, khumi leaung 153,600 rei nga nai ne.
18 Samrang ly huni khumichi theung i vawnsai tawn ai nai khumi leaung 70,000 rei, mawi mang y lengseaung si ai nai khumi leaung 80,000 rei, kalop pacheang nai khumi leaung 3,600 rei khai nai ne.