11
Davida ly Israela pri hawi Juda pri i samrang lawm nai
(2 Sam 5:1-10)
1 Israela khumi bawibawichi ly Hebron mary i Davida teng y chei u i ni teng y, “Kaichi ly nang i thi ngan ka-bichi ne.
2 Lawn veng nai neng khala samrang Sawla deung y, nang ly Israela khumichi ai lu sa iy tavai thau bo. Nang i Areng Tameuh my py, nang ly mymy i khumichi i lu, nichi i samrang lawm ai, nanai leu pei bo,” napi u.
3 Huna nai Israela chengchi ai lu sa naichi ly Hebron mary y awm nai Davida teng y tym u nai khala, samrang ly Areng i mo y huni khumichi hawi amkawm nai vaineng asa bo. Nichi my py Samuela teng y Areng my adeu nai kamta, Davida ai asitui lei iy Israela samrang y palyn u bo.
4 Samrang Davida hawi Israela cheng bawibawichi ly Jerusalem mary y tiu ai nai amsa u. Huni thym khala Jerusalem mary ly Jebu mary, nanai amyn awm nai ne. Huni mary y awm yb nai Jebusi khumichi awm u asai rai.Ref 11.4: Josua 15.63; Tara 1:21
5 Jebusi khumichi my samrang Davida teng y, “Nang ly hini mary theung y mana khala py kun ai nai nga ai ny y,” napi u. Na i py samrang Davida ly nichi i Zion amtangra ai tiu pajau vui nai deaungkho y, amtangra ly “Davida mary”, nanai amyn nga nai ne.
6 Samrang Davida my, “Jebusi khumi leaungrei ai tleh man nai khumi ai ly tavailu areng y pei ai!” nanai thui nai kamta, Zeruiah i chapo Juaba ly tavai atiu naira y lu sa nai deaungkho y, tavailu areng y atheng bo.
7 Samrang Davida ly huni amtang ra y awm ai nai chei reng nai molam y, huni ai “Davida mary,” nanai amyn pathi u.
8 Abyhra amkeu taphum nai meingtym dengdairei, amtangra ka-ki mary palum nai ne. Mary apai so bawi y rai nai ai ly Juaba my sa palum pi bo.
9 Samrang Davida ly sa thai naira awmra awmra. Ati mana nai mo na baly ati cheaungkhang sa thai nai keung Areng ly samrang hawi vanrei awm nai deaungkho y ne.
Samrang Davida i amyn amthang nai risachi
(2 Sam 23:8-39)
10 Anui ichi ly Davida i amyn amthang nai risachi ne. Nichi ly Areng i adeu nai kamta, Davida ai samrang palyn pajau ai nai takhra Israela khumichi hawi vanrei amkawm iy, samrang i pri khaw hai nai keungchi ne.
11 Huni khumichi i amynchi ly angchei y Hamoni nupai Jashobeam ne. Ni ly sorai leaung thomreichi theung y lu ne. Tavai tlenrei atiu naira y my khumi leaung 300 reichi ai tivi hawi thun iy padei nai keung ne.
12 Amyn amthang nai sorai leaung thomreichi theung y pa-nyh sorai ly Ahoh nupai Dodo i chapo Eleaza ne.
13 Ni ly Pas Damim tavai keung y Davida hawi vanrei Philistia chengchi ai tiu nai khumi ne. Israela chengchi tavai anaw y kyh rai khala, ni ly chohpui chomaw bai hareira awm nai ne.
14 Huna nai khala ni ly my i ahawichi hawi li prang ra y angdo naimy, Philistia chengchi ai tiu. Areng ly ni ai eaung naira len parai nai pei pi bo.
15 Kanirei nai khala risa leaung phaireichi ai lu sa nai sorai leaung thomreichi ly Rephaim leaunghawira y meingtym la u nai Philistia kamkawm harei y tiu ai nai, Davida awm nai Adulam tapiu sahawi i lengseaung pui ra y chei u bo.
16 Huni neng khala Davida ly amtangra kakhaw sa yb nai mawi saleung harei ra awm iy, Philistia kamkawm hareichi py Bethlehem mary y meingtym la yb nai ne.
17 Davida ly yhm mang y adawn parai nai deaungkho y, “Kai ai Bethlehem mary katheu pa-kho sahawi tuikanra i tui nei ai nai syn pi nai khumi awm i khyly kai y!” nanai kadeaung bo.
18 Huna nai khala amyn amthang nai sorai leaung thomreichi ly Philistia khumichi tai naira y tako prei i, tuikanra i tui maidenreichy deu iy, Davida teng syn pi. Na i py samrang ly huni tui nei pi y. Huni tui nei ai nai tleaung y ly Areng teng y talam nai leih vui bo.
19 Naibaly samrang my, “Kai ly hini tui nei pajau y, amy i tlang areu iy kalop sa nai khumichi i thi kanei nai hawi atawm ai!” napi. Hunai deaungkho y nei y nai ne. Hini ly amyn amthang nai sorai leaung thomreichi i vam nai sai ne.
20 Juaba i amnau Abisai ly amyn amthang nai risa leaung phaireichi i lu ne. Ni ly khumi leaung 300 reichi ai tivi hawi thun iy padei nai deaungkho y, risa leaung phaireichi theung y amyn amthang nai ne.
21 Ni ly risa leaung phaireichi theung y amyn amthang keh nai ne i, nichi i lu lawm bo. Na i py sorai leaung thomreichi theung y abawi y.
22 Kezela mary i Jehojada i chapo Benaia ly amyn amthang nai risa leaungrei ne. Ni ly sorai kalopchi neangneang sa. Huni kalopchi theung y khri pa-rei len nai Moba khumi leaung nyhrei ai padei nai py abawi nai ne. Kanirei nai khala y ni ly kadam tla nai neng y mawi tapiu theung y kun i, khrangsi amairei padei.
23 Tivi pui syn nai khumi, jeng ka-sang miu pangrei awm nai Aikupta neampacho leaungrei ai py padei bo. Benaia ly thengbeang hawi amtang iy huni khumi teng i tivi pui lawm vui i, huni tivi pui hawimy ni ai padei nai ne.
24 Hini kalopchi ly sorai risa leaung phaireichi theung y abawi nai Benaia i vam nai saichi ne.
25 Ni ly sorai risa leaung phaireichi theung y amyn amthang keh nai ne i py, sorai leaung thomreichi theung y abawi y. Samrang Davida my ni ai ly mymy ai typ nai tavailu areng ra y khai bo.
26-47 Amyn amthang nai takhra risachi ly anui mang ichi ne.
Juaba i amnau Asahela
Bethlehem mary Dodo i chapo Elahanan
Herodi mary i Shammoth
Pelet mary i Heleza
Tekoa mary Ikesa i chapo Ira
Anatho mary i Abieza
Husha mary i Sibekai
Ahoh mary i Ilai
Netopha mary i Maharai
Netopha mary Baana i chapo Heleza
Benjamin pri Kibeah mary Ribai i chapo Ithai
Pirathon mary i Benaia
Kasha mary sahawi leaunghawichi ra i Hurai
Arba mary i Abiela
Bahurum mary i Azamaveth
Shalabon mary i Eliaba
Kizon mary i Hasem
Hara mary Sakha i chapo Jonathan
Hara mary Sakara i chapo Ahiam
Ura i chapo Elipha
Mekhera mary i Hepha
Pelon mary i Ahijah
Karamela mary i Hezaro
Ezabai i chapo Naarah
Nathan i amnau Joela
Hakari i chapo Mibaha
Ammon mary i Zelek
Juaba i tavai ateaung syn pi nai Bero mary i Naharai
Jatir mary i Ira hawi Kare
Hiti khumi Uriah
Ahlai i chapo Zabad
Shiza i chapo Adina (Ni ly Ruben theaung i lu ne iy risa leaung phaireichi ai peang nai khumi ne)
Maaka i chapo Hanan
Mithani mary i Joshaphet
Ashaterah mary i Uzia
Aroe mary Hotham i chapo Shama hawi Jeiela
Tiz mary Shimiri i chapo Jediaela hawi Joha
Mahava mary i Eliel
Eliel i chapo Jeribai hawi Joshavia
Moba mary i Ithama
Zobah mary i Eliel, Obed hawi Jasielachi ne.