12
Benjamin theaung theung i Davida teng y abang manme naichi
1 Davida ly samrang Sawla teng i dengdairei preang nai thym khala, Zikala mary y awm nai ne. Huna nai khala khumi nawi keh naichi ly ni mang y abawi u.
2 Huni khumi bawibawichi ly Sawla hawi amjo amnau ka-bi Benjamin theaung ra i tavai atiu kawp iy, ka-ym awm nai risachi ne. Nichi ly langvawi kiu py, lamtang kiu py lijai hawi thailiho ko kawp nai ne.
3-7 Nichi i tavailu arengchi ly Kibeon mary Shemah i chapo Ahieza hawi Josha nini ne.
Risachi ly anui mang ichi ne.
Azamaveth i chapo Jeziela hawi Pelet
Anatho mary i Brakha hawi Jehu
Risa leaung phaireichi i lu leaungrei, Kibeon mary i amyn amthang nai risa Ishamaia
Kedera mary i Jeremia, Jahaziela, Johanan hawi Jozaba
Hariphi mary i Eluzai, Jerimoth, Belia, Shemaria hawi Shephatiah
Korah nupai theung i Elakana, Ishia, Azarela, Joeza hawi Jashobeam
Kedo mary Jeroham i chapo Joela hawi Zebadiahchi ne.
Kad theaung i Davida teng abang nai khumichi
8 Davida ly khutaha daichi ka-vym amtangra y awm nai thym khala, ni i tavaimichi theung y kun u nai amyn amthang nai risachi ly anui mang ichi ne. Nichi ly khrangsi kamta ka-jei awm iy, khupui hawi tivi teaung naira y amyn amthang. Mawi tleaung i sisiu kamta rang parai nai ne.
9-13 Kalop kalen katheang ka-thui nichi i amynchi ly: Ezo, Obadia, Eliaba, Mishmanah, Jeremia, Atai, Eliel, Johanan, Elazaba, Jeremia hawi Makhabanai napi naichi ne.
14 Kad theaung theung i huni khumi phyreichi ly leaung sangreichi ai peang nai hawi, phyrei ly leaung chungvaireichi ai peang nai tavailu arengchi ne.
15 Huni saneng angchei lo y Jordan tavo tui len nai khala nichi tavo angpeang chum baly, tavo nisi hawi nidym mang i leaunghawichira y awm u nai khumichi ai preang hai bo.
Benjamin hawi Juda theaung theung i Davida teng abang nai khumichi
16 Kanirei nai khala Benjamin hawi Juda theaungchi theung i khumi phyreichi ly Davida awm nai amtangra mang y jeu u bo.
17 Davida ly nichi ai lamchung iy, “Nangchi ly ahawi kamta kai ai sabawm ai nai jeu u nai ne lawh baly, hi y jeu u ba. Kaichi mang y kun u! Na i py nangchi ly kai ai paleung ka-echi teng au ai nai jeu u nai ne lawh teu baly, kai ly nangchi ai no nga ai nai kangso y teu i py, achi i amsi pajochi i Tameuh my ly nangchi i sa nai niu iy nangchi ai ang pajeng ai,” napi.
18 Tameuh teng i Phailo ly Amasai tlang tleaung y tym i, kangkhym y risa leaung phaireichi i tavailu areng lawm nai Amasai my,
“ Jese i chapo Davida awi, kaichi ly nang i khumichi ne!
Tameuh ly nang mang y awm!
Nang hawi vanrei nang ai sabawm nai khumichi ly eaung naira ngo u sy!” nanai aeu u bo.
Davida ly nichi ai kawn i, mymy i tavaimi theung y miteaung kehchi lawm hai bo.
Manase theaungchi theung i Davida teng y abang nai khumichi
19 Davida ly Philistia chengchi hawi vanrei samrang Sawla ai tiu ai nai amsa nai khala, Manase theaungchi theung i risa phyreichi ly Davida mang y abawi u. Philistia cheng luchi my Davida ly mymy i yhmkeung Sawla mang y abawi iy, nichi ai ka-awi sa ai ngaw khyh, nanai paleung mawn i, Davida ai Zikala mary y pato teang nai ne. Hunai deaungkho y Davida ly Philistia chengchi mang y asa hai ai nai ka-dawn by y vui bo.
20 Zikala mary mang y Davida vawi vui nai thym khala, Manase theaungchi ni mang y abawi nai soraichi ly Adana, Jozaba, Jediaela, Mikhaela, Jozaba, Elihu hawi Zilethaichi ne. Nichi bawibawi ly Manase theaung leaung sangrei kamkawm tavailu arengchi ne.
21 Nichi ly amyn amthang nai soraichi ne nai deaungkho y, Davida i risachi ai peang nai miteaung kehchi lawm nai ne. Kangkhym y nichi ly Israela tavaimi kamkawm theung y miteaung kehchi lawm u bo.
22 Kani tleirei Davida i tavaimi theung y khumi kangthachi kun nai deaungkho y, ni i tavaimi kamkawm ly atho awmryh awmryh nai ne.
Davida i tavaimi kamkawm vuikanai
23-37 Areng my adeu pi nai kamta, samrang Sawla i meingtym y Davida ai palyn pajau ai nai molam, sabawm ai nai tavai leaungsai kawp yb nai sorai risa neangneangchi ly ni i tavaimi kamkawm theung y tym u bo. Huni khumichi i vuikanai ly anui mang ichi ne.
Khopuichi hawi tivichi syn naimy, tavai ateaung kangym amthyp nai Juda theaung risachi leaung 6,800
Hawihai palai acham yb nai Simeon theaung risa leaung 7,100
Levi theaung khumi leaung 4,600
Aron kangpreang Jehojada nithun abang nai khumi leaung 3,700
Tavai atiu kawp nai thawndeang Zadok amjo amnau lu sa nai leaung 22
Sawla i nupai napi nai Benjamin theaung khumi leaung 3,000 (Benjamin theaung theung i nawi keh naichi ly Sawla i ka-ym awm nai khumichi ne)
Ephraim risa leaung 20,800, nichi ly mymychi i nupaichi theung y amyn amthang naichi ne.
Nidym mang Manase theaungchi theung i Davida ai samrang palyn ai vawi takhra nai khumi leaung 18,000
Isakhar theaung lu sa nai leaung 200 reichi hawi, nichi nithun abang naichi (hini luchi ly Israelachi sa ai avo nai kalopchi sa ai nai neng kani pany nai khumichi ne)
Ka-ym awm nai Zebulon theaung khumi leaung 50,000, nichi ly atiu ai nai angveirym iy, tavai ateaung kangym teaung kawp naichi ne.
Khupui, tivi teaung kawp nai khumi leaung 37,000 reichi hawi vanrei, Naphtali theaung lu sa nai leaung 1,000
Tavai leaungsai acham yb nai Dan theaung khumi leaung 28,600
Tavai thau ai nai angveirym yb nai Asha theaung khumi leaung 40,000
Jordan tavo nisi mang i Ruben, Kad hawi nisi manase theaungchi theung i tavai ateaung kangym teaung kawp nai khumi leaung 120,000.
38 Tavai thau ai nai aeng yb nai sorai risa bawibawichi ly Davida ai Israela pri verei y peang nai samrang y palyn ai nai leu pacheang yb nai, Hebron mary mang y chei u bo. Huni bo i Israela mipui bawibawichi py, huna nai kamta paleung ka-dawn awm u nai ne.
39 Nichi ly mymychi i khumichi my sa pi rym nai teicha teineichi cha iy, Davida hawi vanrei kani thomrei awm u bo.
40 Kamlora i Isakhar, Zebulon, Naphtali theaungchi napi nai tosyh mang i khumichi ly tako dei, thaidu athai, kreip hang hawi olive asituichi keaungngo kano kasauchi, kula-iuchi, keaungngo kaneaung kasauchi, sichi tleaung y tang iy syn u bo. Nichi ly tleh iy cha u ai nai sichi hawi beramchi py, syn u nai ne. Hina nai leaungsai bawibawichi hawi, pri verei y awm nai Israela chengchi i amo theu nai sai amteng hai nai ne.