10
Samrang Sawla dei nai
(1 Sam 31:1-13)
1 Philistia chengchi ly Israela chengchi hawi Kilabo mawi salo y atiu u i, Israela chengchi khri pa-rei dei u nai ne. Samrang Sawla hawi chapochi raurei, khumichi ly preang u bo.
2 Na i py Philistin chengchi ly hui i kai nai khala, Sawla i chapochi napi nai Jonathan, Abinada hawi Malakhishuachi ai padei nai ne.
3 Tavai ly Sawla i tengpang sahawi y ho parai nai deaungkho y, Sawla ly paleung ka-echi i thailiho chawm i, khri pa-rei no nga bo.
4 Ni ly mymy i tavai ateaung syn pi nai thawndeang ai, “Tameuh by y nai Philistiachi jeu iy kai ai panui hai lawh na; nang ly haisau aphiu iy kai ai tleh vui jau,” napi. Na i py huni thawndeang ly samrang ai tleh ai nai jei nai deaungkho y, Sawla ly mymy i haisau atheu iy, haisau pado i, taba ka bo.
5 Hunaibaly thawndeang ly Sawla dei nai nui nai khala, ni py my i haisau salo y taba iy dei teang.
6 Naibaly Sawla hawi chapo leaung thomrei py dei nai deaungkho y, ni i samrang kangpreang ly tem bo.
7 Jezarela leaunghawi ra y awm nai Israela chengchi ly mymychi i tavaimichi preang pawn nai py, samrang Sawla hawi chapochi dei pawn nai py thai u nai khala, mymychi i marychi khai su iy preang u nai ne. Huna nai khala Philistia chengchi ly jeu iy huni marychi ai peang vui bo.
8 Tavai atiu pajau nai bo kani pa-nyh y, Philistia chengchi ly veuchira i vawnsaichi la u nai thym khala, Sawla hawi chapochi i veu ai Kilabo mawi y niu u.
9 Nichi ly Sawla i lu tameang iy ateaungchi leng pawn nai ne. Naibaly savaichi ai Sawla i lu hawi tavai ateaungchi la iy, Philistia pri amki iy mymychi i chengchi hawi mynchi awm naira y satang thai hai bo.
10 Nichi ly Sawla i ateaungchi ai mychi i achura yhm theung y khai iy, ni i lu ai ly Dakon tameuh yhm y bang hau bo.
11 Sawla ai Philistia chengchi my ati mana sa u mo, nanai Kilead pri Jabe mary i khumichi thai baly,
12 risa bawibawichi ly chei iy samrang Sawla hawi chapochi i veuchi la iy, Jabe mary y syn u bo. Naibaly hiuchi ai ngopraibiu keung anui y up chum baly, kani saryhrei biu hai u nai ne.
13 Samrang Sawla dei nai ly Areng i tlang tleaung y ka-ym by y nai deaungkho y ne. Ni ly Areng i leu tangai y.Ref 10.13: Lev 19.31, 20:6; 1 Sam 13:8-14, 15:1-24, 28:7-8
14 Areng teng y adeng ahui ai nai tleaung y ly khumi kadeichi i phailo hawi amkawm lawh nai ne. Hunai deaungkho y Areng ly Sawla ai padei iy, ni i pri ly Jese i chapo Davida ai peang hai nai ne.