SAM 98
Khaileaung pri ai peang nai keung Tameuh note Hebrai cha lu Sam.
1 Areng ai ly khulym kangtha thui naimy palo u;
mymy ly lyh ai hawi nairachi sa.
Mymy ly mymy i sa thai naira hawi,
atho haiho hawi py eaung naira nga nai ne.
2 Areng ly mymy i eaung nai sai amthang hai iy, atleu pajau nai
sa thai naira ai khumi cheng cheaungkhangchi teng y pany hai bo.
3 Mymy ly mymy i khaw parai nai tamen naira hawi ka-ym awm nai hawimy,
Israela chengchi teng y adeu nai leu ly khaw hai bo.
Meingtym tleirei y awm nai khumi bawibawichi ly
achi i Tameuh i eaung nai niu u nai ne.
4 Khaileaung i khumi bawibawichi awi, amo theu naimy khulym thui iy,
Areng i nang parai nai ai palo u;
khulymchi thui iy amo theu aeu naimy, mymy ai palo u!
5 Palo nai khulym thui naimy Areng i nang parai nai ai palo u!
tarochi beu iy nang parai nai sai palo u!
6 Bawchi hawi atu-tangchi eng iy,
achi i samrang, Areng i mo y amo theu naimy aeu u.
7 Pangli hawi, pangli theung y awm nai, heng nai amjy bawibawichi awi,
tao pajeng parai naimy aeu u;
khaileaung hawi khaileaung salo y heng nai bawibawichi awi, khulym thui u.
8 Tavochi awi, nangchi i kiu tabeang u;
mawichi awi, Areng ly khaileaung pri y peang ai nai ang jeu bo i,
9 mymy i mo y vanrei, amo theu khulym thui naimy palo u.
Mymy ly khaileaung pri khumi bawibawichi ai
leu meitang naimy peang ai.