SAM 97
Sathai naira len parai naimy peang nai Tameuh
1 Areng ly samrang ne! Khaileaung awi, amo theu!
Panglichira y awm nai tlawn bawibawichi awi, amo theu u!
2 Khupanymchi hawi kavengchi ly mymy ai taki naimy awm bo;
mymy i peang nai ly leu meitang hawi adyh adawi naira y sangum pala nai ne.
3 Mai kadeu ly mymy i mo y tako i, mymy i tengpang y awm nai
paleung ka-echi ai kang hai bo.
4 Mymy i amlosadichi ly khaileaung pri verei y angvang hai;
huna naichi niu nai khala y, khaileaung ly amchyh neung bo.
5 Khaileaung pri ai peang nai keung napi nai Areng i mo y,
mawichi ly samdai kamta tlawn vui bo.
6 Mymy i neaung hawi nai saichi ai kani khusang ly amthang hai i,
khumi bawibawichi ly mymy i nang parai nai sai niu u nai ne.
7 Mynchi ai chiu u nai khumi bawibawichi ly kangji nga u bo;
tameuh bawibawichi ly Areng i mo y lu meung u bo.
8 Aw Areng, nang i tara chih nai saichi deaungkho y,
Zion mary i khumichi ly amo theu u bo;
Juda marychi py amo theu u nai ne.
9 Ati cheaungkhang sa thai nai keung Areng,
nang ly khaileaung pri verei ai peang nai keung;
nang ly tameuhchi bawibawi tleaung y len keh nai ne,
10 Areng ly hawi y naira ai niu ngai y nai khumichi ai tamen;
mymy i khumichi nang chawn nai ai ama hai;
mymy ly nichi ai khumi hawi y naichi kiu i nai atleu bo.
11 Khumi kahawi tlang tleaung y amo theu naira hawi,
paleung hawi nai khumichi tlang tleaung y amo theu naira py tym hai nai ne.
12 Nangchi khumi kahawi bawibawichi awi,
Areng i sa pi nai saichi molam y amo theu u!
Chai parai nai Tameuh i sa nai saichi ai pany u jo ly
mymy ai kawn nai palo u.