SAM 99
Tameuh ly sa thai naira awm keh nai samrang
1 Areng ly samrang ne;Ref 99.1: Theu 25.22
khumichi ly jei hyn u bo.
Mymy ly kherubenchi salo y awm;
naibaly khaileaung ly amchyh nai ne.
2 Areng ly Zion mawi salo y, sa thai naira len keh;
mymy ly khumi cheng cheaungkhangchi ai nang parai naimy peang bo.
3 Khumi bawibawichi ly mymy i nang parai naimy
ka-jei hawi nai amyn palo u ai; mymy ly chai parai nai ne!
4 Sa thai naira len parai nai samrang awi, nang ly kateng lam ai khrei;
nang ly Israela pri y leu meitang kawi hai;
kateng lam hawi leu meitang ai khaw hai nai ne.
5 Achi i Areng Tameuh ai ly palo u;
mymy i areng atehra mo y lu meung iy chiu u!
mymy ly chai parai nai ne.!
6 Mosi hawi Aron nini ly nang i pathyp pi nai keung ne;
Samuela py mymy teng y chiu sa nai keung leaungrei ne;
nichi ly Areng teng y chiu sa nai khala y, mymy ly tangai pi bo.
7 Mymy ly nichi ai tamai theung i dengdairei leu pei nai ne;Ref 99.7: Theu 33.9
nichi py mymy i pei nai reita hawi, reita leu pei naichi ai tangai u bo.
8 Aw Kaichi i Areng Tameuh, nang ly nangmy i khumichi my palau nai khala y pathang pi bo;
huni khumichi i kamngochi molam y pajeng teu i py,
nichi i kamngochi ai palawi pi nai Tameuh ne.
9 Achi i Areng Tameuh ai ly palo u;
mymy i mawi kachai salo y chiu u!
Achi i Areng Tameuh ly kachai ne.