SAM 96
Tameuh ly sa thai naira awm keh nai samrang
(1 Neng 16:23-33)
1 Areng ai ly khulym kangtha thui naimy palo u!
khaileaung pri khumi bawibawichi awi,
khulym thui naimy Areng ai palo u!
2 Areng ai ly khulym thui naimy palo u! Mymy ai ly palo u!
Mymy ly achi ai atleu nai keung ne, nanai satang kahawi ai
kani tlei tleirei thui u.
3 Khumi cheng cheaungkhangchi teng y mymy i nang parai nai sai py,
khumi bawibawichi teng y mymy i lyh ai hawi nai saichi py amthang hai u.
4 Areng ly nang parai keh nai ne iy, khri pa-rei palo ai ataing nai ne;
mymy ly tameuhchi bawibawi tleaung y, jei kaji naimy tahm khai ai ataing nai ne.
5 Takhra khumi bawibawichi i tameuhchi ly mynchi teu;
na i py Areng ly kani khusang sa nai keung ne.
6 Phum-ang hawi tahm asang nai sai ly mymy ai taki naimy awm bo;
sa thai naira hawi apu parai naira ly Achura yhm y awm nai ne.
7 Khaileaung salo y awm nai khumi bawibawichi awi, Areng ai palo u;Ref 96.7-9: Sam 29.1-2
mymy i nang parai naira hawi sa thai naira ai palo u.
8 Areng i amyn nang parai nai ai ly palo u;
katalamrachi syn naimy, mymy i Achura yhm theung y kun u.
9 Chai parai nai keung ang jeu nai khala y, mymy i mo y lu meung u;
khaileaung pri khumi bawibawichi awi, mymy i mo y jei kaji u!
10 “Areng ly samrang ne! Mymy ly khaileaung pri y
khaw hai nai deaungkho y asyh thai y bo;
mymy ly khumi bawibawichi ai leu meitang naimy tara chih ai, nanai
khumi cheng cheaungkhangchi teng y thui pi u.
11 Aw khaileaung hawi kani khusangchi awi, amo theu u!
Pangli hawi pangli theung y awm nai, heng nai amjy bawibawichi awi,
tao pajeng parai naimy aeu u;
12 khaileaung hawi khaileaung salo y awm nai bawibawichi awi, amo theu u!
Daichi thengreung theung y awm nai dengkeaung keungchi ly
amo theu naimy aeu u ai.
13 Ati mana nai mo nabaly Areng ly khaileaung pri y
peang ai nai ang jeu nai deaungkho y ne.
Mymy ly khaileaung pri khumi bawibawichi ai, leu meitang naimy peang ai.