SAM 94
Khumi bawibawichi ai tara chih nai Tameuh
1 Aw Areng, nang ly kamngo pajeng ai nai aly peang nai Tameuh ne;
nang i kado theu nai amteng hai ba!
2 Nang ly khumi bawibawichi ai tara chih nai keung ne;
ang thau iy paleung len nai khumichi ai
mychi hawi ataing nai kamngo pajeng pi ba!
3 Khumi aso y naichi ly mana tanrei amo theu u ai mo?
aw Areng, mana tanrei kra ai mo?
4 Kamngo sa tamang nai khumichi ly mana tanrei paleung len amlyh iy,
mychi i sa tamang nai kamngochi ai amlyh naimy awm u ai a?
5 Aw Areng, nichi ly nang i khumichi ai chiu piupa bo;
nang i peang nai khumichi ai ana u piupa bo.
6 Nichi ly neampachy lumaichi hawi, nurochochi ai padei u;
kaichi i pri y awm nai angvynchi ai py padei u nai ne.
7 Nichi my, “Areng ly kaichi ai niu y leang;
Israela chengchi i Tameuh ly niu y leang,” nanai thui u bo.
8 Kai i khumichi awi, nangchi ly ati mana nai y
hina tanrei cheng naira by y iy, tau akhum u na mo?
mana khala y tau cheng u ai mo?
9 Achi i kanochi sa pi nai keung ly thai pajau nai ny y a?
mei sa pi nai keung ly niu pajau nai ny y a?
10 Khumi cheng cheaungkhangchi ai parip nai keung ly nichi ai pajeng y ai a?
khumi bawibawichi ai cheng naira patiu pi nai keung ly
pany thai naira awm nai ny y a?
11 Huni khumichi i dawn tau naichi ai Areng ly pany;Ref 94.11: 1 Kor 3.20
nichi i dawn pasym naichi ly atyhtyh teu, nanai mymy ly pany nai ne.
12 Aw Areng, nangmy thui parip nai khumi,
reita leu hawi kamlau, nangmy parip nai khumi ly taham hawi!
13 Khumi aso y naichi tla ai nai angawm tai nai pajau y kyh rai khala y,
neng hawi y nai theung i nangmy, ni ai law tleaung naira pei bo.
14 Areng ly mymy i khumichi ai aphi su ai ny y;
mymy i peang nai khumichi ai ly khai su ai ny y.
15 Tara jeungchira y leu meitang tara chih nai ly awm teang ai;
khumi kahawi bawibawichi py, huni leu meitang tara chih nai ai ly paleung pado u ai.
16 Khumi aso y naichi ai ka-awi sa ai nai, kai mang y ami asa hai ai mo?
Hawi y sa nai khumichi ai ka-awi sa ai nai, kai mang y ami asa hai ai mo?
17 Areng my kai ai sabawm y lawh teu baly,
kai ly khumi angso savai tlang nai meingtym y, tym kasa lawh ai nai ne.
18 Aw Areng, “Kai ly athei i, atlym bo,” nanai apany nai khala y,
nang i khaw parai nai tamen naira my ly kai ai dawnkhawm vui bo.
19 Kai ly paleung mawn naimy ka-dawn hawi y nai tym nai khala y,
nang ly kai ai paleung awmnem naira pei iy amo theu hai bo.
20 Nang ly teng y nai kalop ai kateng palawn reng nai,
un cha nai tara chih keungchi hawi ly ati sai py amtawn abi y leang.
21 Nichi ly khumi kahawichi ai padei ai nai pa-rei,
tara leu amcheang hai u bo.
22 Na i py Areng ly kai ai ama hai bo;
kai i Tameuh ly kai i abyhra ne.
23 Mymy ly nichi i khumi aso y naichi molam y pajeng ai;
mychi i kamngo nai molam y, nichi ai taphra ai;
achi i Areng Tameuh ly nichi ai taphra iy, tamyh pawn ai.