SAM 92
Palo nai khulymnote Hebrai cha lu Anawn kani i vui khulym.
1 Aw Areng, nang teng y kawn nai leu thui nai py,
tahm asang keh nai Tameuh, nang i nang parai nai ai palo nai khulym thui nai py,
2 tangai hawi parai nai taro katyn hawi vanrei,
vui tai nai katyn kapau beu nai katynchi hawi,
3 khawn tleirei nang i khaw parai nai tamen naira amthang hai iy,
dym tleirei nang i ka-ym awm nai sai thai hai nai py, amlau parai nai ne.
4 Aw Areng, nang i lyh ai hawi parai nai sa nai saichi ly kai ai amo theu hai bo;
nang i sa nai leaungsaichi molam y, kai ly amo theu parai naimy khulym thui nai ne.
5 Aw Areng, nang i sa nai leaungsaichi ly khri pa-rei lyh parai na a!
nang i dawn nai saichi py thiu parai na!
6 Khumi ka-khumchi pany pajau y naira,
cheng naira by y nai khumichi pany thai y naira, harei awm.
7 Huni ly khumi aso y naichi acha keungchi kamta sai-eung iy,
kahawi so y nai khumichi nang chawn u teu i py,
huni khumichi ly myn kang naira avum u ai.
8 Ati mana nai mo nabaly, Areng ne nai
aly peang naira asang keh nai keung ne nai deaungkho y ne.
9 Nang i paleung ka-echi ly dei u ai, nanai py,
khumi aso y nai bawibawichi ly sum u ai, nanai py, kaichi pany nai ne.
10 Nang ly kai ai salen katai kamta atho awm hai bo;
nang ly kai ai amo theu ai nai amtheaung naira pei nai ne.
11 Kai ly paleung ka-echi sum nai niu;
khumi aso y naichi vo nai py thai.
12 Khumi kahawichi ly chamleaung keungchi kamta, apu parai naimy awm ai;
nichi ly Lebanon mawi i saitleang keungchi kamta, achaw angvai ai.
13 Nichi ly Areng i yhm y ui iy, achi i Tameuh i Achura yhm y
angvai nai dengkeaung keungchi hawi atawm.
14 Huni dengkeaung keungchi ly keung reng teu i malawn py,
athaichi athai iy apu parai naimy khaw jojo nai ne.
15 Hini ly Areng ly lei meitang ne, nanai py,
kai ai ama hai nai keung ly hawi angym, nanai py pany hai bo.