SAM 90
PHY PALYHREI
Tameuh hawi khuminote Hebrai cha lu Tameuh i khumi Mosi i chiu sa nai.
1 Aw Areng, nang ly deungtasarei kaichi i abyhra yhm ne.
2 Mawichi lawm y rai khala y hawi,
khaileaung pri palum y rai khala y
nang ly awm yb nai Tameuh ne;
tem naira by y nai Tameuh py ne.
3 Nang ly leu pei iy khumichi ai
spryh lawm hai ali teang bo.
4 Saneng sangrei ly nang teng y kani harei kamta ne;Ref 90.4: 2 Pet 3.8
lawm veng nai jangdyh kanirei kamta py,
neng dawi parai nai vumreichy kamta py ne.
5 Nang ly khumichi ai tui my um hai nai kamta, tama hai pawn veng bo;
nichi ly amang kamta, tanareichy awm ai nai nga u khyh.
Nichi ly khawn mang y acha kamta peung.
6 Khawn mang ly veangryh naimy pau amthym i,
dym mang y ly jei iy tama veng nai ne.
7 Nang i kado theu nai molam y kaichi ly tama bo;
nang i kado theu nai haiho molam y, kaichi ly jei hyn u na bo.
8 Kaichi i kamngochi ly nang i mo y khai bo;
kaichi i kangviu y sa nai kamngochi ai py,
nangmy niu pajau nai meingtym y khai bo.
9 Kaichi ly nang i kado theu hai nai avum nai deaungkho y deung dawi u bo;
kaichi i heng naira ly kamsyh y thui nai leu ali kamta, tama reng nai ne.
10 Kaichi ly saneng vui saryhrei naini heng khyh;
tlang atho awm naichi ne u lawh baly, saneng vui tajarei heng pajau;
na i py huna nai heng nai ly patang naira hawi, paleung bi nairachi avum bo;
kra y nai sala y dei i, kaichi ly tama u ryp nai ne.
11 Nang i kado theu nai haiho ai ly ami avum bawi pajau ai mo?
nang i kado theu nai ly mana tanrei jei ai hawi na mo, nanai ami pany pajau ai mo?
12 Kaichi ai kaimychi i heng nai deung ly mana tanrei dawi na mo, nanai
pany ai nai patiu pi kyh ba;
hunaibaly kaichi ly tau cheng naira nga u ai.
13 Nang i kado theu nai ly mana tanrei kra na pa-rei, rym y naimy awm ai mo?
Aw Areng, nang i miseaungchi ai pahen kyh ba!
14 Kaichi ly heng nai ryrei, khulym thui naimy amo theu u pajau ai nai,
khawn tleirei kaichi ai nang i khaw parai nai tamen naira avum hai kyh ba.
15 Kaichi i patang nai thym khala y,
nang ly kaichi ai amo theu naira avum hai kyh ba.
16 Nang i miseaung kaichi ai nang i rengrang sa naichi niu ai nai pei kyh ba;
kaichi i katu chanauchi ai py, nang i phum-ang hawi
sa thai naira nang parai nai niu ai nai pei pi kyh ba.
17 Kaichi i Tameuh ne nai Areng,
nang i amtheaung naira ly kaichi teng y tym hai sy;
kaichi i sa nai tleireira py, eaung naira pei kyh ba!