SAM 89
Ref 89: 1 Are 4:31.Pri patang naira avum nai neng khala thui nai khulym note Hebrai cha lu Ezarah cheng Etham i thui nai khulym.
1 Aw Areng, kai ly nang i khaw parai nai tamen naira satang ai avawrei khulym thui ai;
kai ly nang i ka-ym awm nai sai ai, neng tleirei amthang hai ai.
2 Nang i tamen naira ly deungtasa khaw iy, ka-ym awm nai py
kani khusang kamta khaw, nanai kai pany bo.
3 Nangmy ly “Kaimy vawi takhra nai khumi hawi Leu Maikawm asa bo;
kai i miseaung Davida teng y,
4 “Nang i kangpreang ly samrang lawm jojo ai; nang i samrang kangpreang lyRef 89.4: 2 Sam 7.12-16; 1 Neng 17.11-14; Sam 132.11; Amt 2.30
amtawn jojo ai,’ nanai kaimy leu adeu bo,” napi.
5 Kani pri ichi ly nang i rengrang sa nai satangchi ai khulym thui u bo;
aw Areng, khumi kachaichi ly nang i ka-ym awm nai satang khulym thui u nai ne.
6 Aw Areng, kani pri mang y nang hawi atawm nai ami awm mo?
mani kanicho ly nang hawi pata pajau ai mo?
7 Nang ly khumi kachaichi i council ra y, tahm pasang ai nai ataing nai ne’
nichi ly nang ai khri pa-rei jei naimy tahm khai u bo.
8 Ati cheaungkhang sa thai nai keung Areng Tameuh,
nang kamta phum-ang len parai nai ly by y;
aw Areng, nang ly cheaungkhangra y ka-ym awm nai ne.
9 Nang ly tui sampyhchi len nai pangli ai peang iy,
khri pa-rei len nanai tui sampyhchi ai rym hai ba.
10 Nang ly tuirengnam Rahabi ai padei iy, tamyh veng bo;
nang i sa thai naira hawimy, nangmy i paleung ka-echi ai pasum bo.
11 Kani khusang ai py, khaileaung ai py peang nai ne;
nang ly khaileaung hawi khaileaung salo y awm nai ngiereichi ai sa nai ne.
12 Nang ly tosyh ngan hawi tokalawi ngan ai sa nai ne.
Tabor mawi hawi Heramon mawichi ly nang ai amo theu naimy palo u bo.
13 Nang ly khri pa-rei sa thai naira len na ly!
Nang i atho ly khri pa-rei len na ly!
14 Nang i pri ly kateng lam hawi leu meitang salo y langdeng pala nai ne;
nang i sa nai ngiereichi ly tamen naira hawi ka-ym awm naira amteng bo.
15 Khulym thui naimy nang ai chiu nai khumichi hawi,
nang i pahen nai kangvang y awm nai khumichi ly
khri pa-rei taham hawi na a!
16 Ati mana nai mo nabaly, nichi ly nang i molam y kani khengrei amo theu nai hawi,
nang i hawi nai sai ai nichi ly nang ai palo u nai deaungkho y ne.
17 Nang ly kaichi ai eaung nai pawi puichi avum hai bo;
nang i tamen naira deaungkho y, kaichi ai eaung hai bo.
18 Aw Areng, nang ly kaichi ai ama hai nai keung vawi takhra pi bo;
Israela chengchi i chai parai nai Tameuh,
nang ly kaichi i vui samrang khai pi nai ne.
Davida teng y Tameuh ly leu adeu nai
19 Jangni khala y nang ly ka-ym awm nai miseaungchi teng y amteng hai nai ly
“Amyn amthang nai sorai risachi ai kaimy sabawm bo;
kaimy khumi theung i nai leaungrei ai vawi takhra iy, samrang atehra kapei pi bo.
20 Kai i miseaung Davida ai asitui leih iy,Ref 89.20: 1 Sam 13.14; Amt 13.22; 1 Sam 16.12
kaimy samrang kapalyn nai ne.
21 Ni ly kai teng i atho nga jojo ai;
kai i sa thai naira saho y ni ai ham hai ai.
22 Ni i paleung ka-echi ly ni ai mana khala py, tiu pajau ai ny y;
khumi aso y naichi ly ni ai tiu pajau ai ny y.
23 Kai ly ni i paleung ka-echi ai tamyh vui ai;
ni ai niu ngai y nai khumi bawibawichi ai padei pawn ai.
24 Kai ly ni ai tamen iy ka-ym awm ai;
kai ly ni ai eaung hai jojo ai.
25 Kai ly ni i pri ai Mrethe pangli dengdairei,
Euphrat tavo tym pa-rei kau hai ai.
26 Ni ly kai teng y, “Nang ly kai i ampo hawi kai i Tameuh,
nang ly kai i abyhra hawi
kai i atleu keung ne,” nanai thui ai.
27 Kai ly ni ai kai i chapo chalu kapalawn ai;Ref 89.27: Amt 1.5
phum-ang len keh nai samrang lawm hai ai.
28 Kai ly ni i tlang tleaung y adeu nai leu ly khaw hai jojo ai;
kai ly ni hawi asa nai Leu Maikawm ai khaw hai ai.
29 Ni i pri ly kani khusang kamta khaw hai ai;
ni i katu chanauchi ly samrang lawm jojo ai.
30 “Na i py ni i katu chanauchi ly kai i reita leu ai khai su iy,
kai i reita leaungsai ai patawm y lawh baly,
31 nichi ly kai i leu pacheang naichi ai dawndan y iy,
kai i reita leu pei naichi ai patawm y lawh baly,
32 kai ly nichi i kamngo sa nai molam y pajeng ai;
kai ly nichi i sa tamang nai molam y kapajeng ai.
33 Na i py kai ly Davida ai tamen jojo ai;
ni teng y kaimy leu adeu nai ai py taphra ai ny y.
34 Kai ly ni hawi asa nai Leu Maikawm ai phra hai ai ny y;
kai ly ni teng y pei yb nai leu ka-deu ly harei py ajiu vui ai ny y.
35 “Kai ly mana khala y py Davida ai tapawp nai leu thui ai ny y, nanai
kaimy i amyn kachai y tlenreira my tem pa-rei leu adeu nai ne.
36 Davida i kangpreang ly mana khala py myh kang ai ny y;
kani tleirei, kai ly ni i pri khaw hai jojo ai.
37 Ni i pri ly kani mang y khaw jo nai lo kamta,
khaw naimy awm jojo ai,” napi.
Samrang ly sum nai molam y vo tangam nai
38 Na i py nang ly nangmy khai takhra nai samrang ai kado theu hai bo;
nang ly ni ai khai su bo, ni ai nyn va bo.
39 Nang i miseaung hawi asa nai Leu Maikawm ly taphra vui bo;
ni i samrang lukhym py, khaileaung y pala vui bo.
40 Nang ly ni i mary pui apaichi ai taphra iy,
ni i amtangrachi py panawi pi pawn bo.
41 Ni i sahawi mang aki aleaung nai khumi bawibawichi ly
ni i yhmtheaung katuichi paviu u;
ni i yhm deaungpachi my py panui hai bo.
42 Nang ly ni i paleung ka-echi ai eaung ai nai pei;
nang ly nichi bawibawi ai amo theu hai bo.
43 Nang ly ni i haisau bochi tlum hai pawn iy,
ni ai tavai sum hai bo.
44 Nang ly ni i samrang cheaungvawi la pi vui iy,
ni i samrang atehra py, khaileaung y atlym hai veng bo.
45 Nang ly ni ai neng tym y naimy miteaung cheang hai iy
kangji nga hai bo.
Law tleaung ai nai chiu sa nai
46 Aw Areng, nang ly meimai aheu pi veng jojo ai bo a?
nang i kado theu nai ly mai kamta, mana tanrei angveaung naimy awm ai mo?
47 Kai i heng nai ly mana tanrei deung dawi mo, nanai pany pi jo kyh ba;
nang ly dei nai amjy napi nai kaichi bawibawi ai sa nai ne, nanai pany pi jo kyh ba.
48 Ami nai ly dei y naimy heng jojo thai ai mo?
Khumi ly amymy ai tapreaung y tym y pa-rei, mana paka thai ai mo?
49 Aw Areng, vaichi khala y thui pi nai nang i tamen naira ly ma mang y awm vui mo?
Davida teng y nang i adeu nai leuchi ly ma y mo?
50 Nang i miseaung kai ly mana tanrei khumi aniu y naira avum na mo, nanai py,
Tameuh by y nai khumichi my kai ai pasawi naichi ai
mana tanrei kakham pi mo, nanai py, tami pi vui moh kyh ba.
51 Aw Areng, nangmy vawi takhra nai samrang ai,
nang i paleung ka-echi my khumi aniu y nai sa u lawh ly!
Nichi ly ni i chei naira tleirei y, khumi aniu y nai sa u bo.
52 Areng ai ly deungtasarei palo u!
Amen! Amen!