SAM 88
Sabawm naira nga ai nai aeu nainote Hebrai cha lu Korah nupaichi i thui nai Sam.
1 Kai ai atleu nai keung Areng Tameuh, kai ly kani thun y aeu iy,
vum y ly nang teng y ahihawi nai ne.
2 Kai i chiu sa nai ly tangai pi kyh ba;
sabawm naira nga ai nai kai i aeu nai raawi tangai pi kyh ba.
3 Kai ly patang naira avum ala nai deaungkho y,
kai ly dei vi na bo.
4 Kai ly dei enten nanai khumi ne;
atho py khei be veng bo.
5 Kai ly khumi kadei kamta ne; padei naira avum iy
tapreaung angawm theung y tym nai khumi kadei kamta ne.
Nangmy pipi pany y vui nai khumi,
nangmy sabawm ai avo y nai khumi kamta lawm bo.
6 Nang ly kai ai veng kehkeh nai, thiu kehkeh nai angawm napi nai
thiu parai nai tapreaung angawm theung y aphi su bo.
7 Nang i kado theu naira my ly kai ai ang ti cheng bo;
kai ly huni kado theu nai tui sampyh anui y anum bo.
8 Nang ly kai ai ahawichi my khai su hai bo;
nang ly kai ai nichi i mo y angji ngailai hai bo.
Kai ai ang paeung u cheng i, law tleaung pajau y bo.
9 Kai ly patang nai deaungkho y, mei phrawnja na bo.
Aw Areng, kai ly kani tleirei nang ai kang palau iy,
kiu pheu naimy nang teng y chiu kasa bo.
10 Nang ly khumi kadeichi i vui y rengrang ka-ma-rachi patei pi a?
nichi ly deira i nai ang thau iy, nang ai palo u a?
11 Nang i khaw parai nai tamen nai satang ai tapreaung angawm theu y py,
nang i ka-ym awm nai satang ai tama nai meingtymra y thui nai awm a?
12 Nang i rengrang ka-ma-rachi ai, huni veng naira meingtym y py,
nang i hawi naira ai tami veng nai meingtym y py, pany nai awm ai a?
13 Aw Areng, sabawmra nga ai nai
kai ly khawn tleirei nang teng y chiu sa bo.
14 Aw Areng, nang ly ati mana nai kai ai khai su lawh mo?
Ati mana nai y kai teng i nai meimai hi pi vui lawh mo?
15 Kai ly deaungdichy khala patang naira avum i, deivi deivi nanai ne;
nang i pajeng naira nawi parai nai deaungkho y, kai ly atho bai na bo.
16 Nang i khri pa-rei kado theu nai ly kai ai tama hai bo;
nang i ka-jei awm nai tiu naichi ly kai ai tama hai bo.
17 Hunichi ly tavo tiu my ang lem hai nai kamta, kani khengrei kai ai ang taki na bo;
tengpang sahawi mang dengdairei, kai teng y athui u bo.
18 Kai i ahawi hawi keh naichi ai malawn py, kai ai khai su hai bo;
kai i ahawi ka-dawi sa ai nai ly kaveng naini awm khyh bo.