SAM 87
Jerusalem mary ai palo nainote Hebrai cha lu Korah nupaichi i thui nai Sam.
1 Areng ly chai parai nai mawi salo y, mymy i mary pui sa nai ne.
2 Mymy ly Jerusalem mary pui ai
Israela pri y awm nai takhra marychi bawibawi tleaung y khrei keh bo.
3 Aw Tameuh i mary pui, mymy ly nang i satang
lyh ai awm nai, vai ang thui pi nai ly tangai ba.
4 Mymy i leu pei nai ly “Kai i leu tangai nai prichi amyn la nai khala,
Aikupta pri hawi Babulon pri tabawi ai;
Philistin pri, Turu pri hawi Ethiopia pri i khumichi py,
Jerusalem mary i khumichi amyn la naira y tabawi ai.
5 Zion mawi ai ly khumi cheng cheaungkhangchi ai tapen nai amhm, nanai hawi,
ati cheaungkhang sa thai nai Tameuh ly
huni mawi ai khaw hai ai, nanai py khumichi my thui u ai.
6 Areng ly khumichi amyn tajiu ai; huni amynra y abawi nai
khumi bawibawichi ai, Jerusalem mary i amynra y tabawi rau ai.
7 Huni khumi bawibawichi ly lam naimy, “Zion mawi ly achi nga nai
amtheaungra bawibawi i sangum ne,” nanai khulym thui u nai ne.