SAM 86
Ang sabawm ai nai chiu sa nainote Hebrai cha lu Davida i chiu sa nai.
1 Kai ly atho di iy, jeaungmang naimy awm bo; huna nai y aw Areng,
kai i hnei takeng nai tangai pi ly pathang pi kyh ba.
2 Kai ly nang i tlang tleaung y ka-ym awm nai deaungkho y, deira i nai kai ai atleu kyh ba;
kai ly nang ai ym nai miseaung ne nai deaungkho y, kai ai atleu kyh ba.
3 Nang ly kai i Tameuh ne; hunai deaungkho y kai ai pahen kyh ba;
kai ly nang teng y kani khengrei chiu kasa nai ne.
4 Aw Areng, kai ly nang teng y chiu kasa i,
nang i miseaung ai amo theu hai kyh ba.
5 Nang teng y ly kaichi i tlang tleaung y hawi naira hawi, kamngo palawi pi thai naira awm;
nang teng y chiu sa nai khumi bawibawichi tlang tleaung y tym nai,
khaw parai nai tamen naira ly kawi na bo.
6 Aw Areng, kai i chiu sa nai tangai pi kyh ba;
sabawm naira nga ai nai kai i aeu nai raawi thai pi kyh ba.
7 Nang ly kai i chiu sa nai tangai pi nai deaungkho y,
patang naira avum nai neng khala y, kai ly nang ai kang palau nai ne.
8 Aw Areng, nang kamta Tameuh ly by y;
nang i sa nai kamta mani tameuh py so vai y.
9 Nangmy sa nai khumi cheng cheaungkhangchi ly jeu iy,Ref 86.9: Amt 15.4
nang i mo y lu meung u ai;
nichi ly nang i nang parai nai sai palo u ai.
10 Nang ly sa thai naira phum-ang len parai i, lyh ai nairachi sa pi bo;
nang leaungrei naini Tameuh ne.
11 Aw Areng, nang i kangai sa ai nai kai ai leu pei ba;
kai ly ka-ym awm naimy tangai ai;
nang i kalop ai takhawi y pa-rei sa thai ai nai, kai ai patiu pi kyh ba.
12 Aw Areng, kai i Tameuh, kai ly nang ai paleung hawi verei kang palo ai;
kai ly nang i nang parai nai avawrei amthang hai ai.
13 Kai i tlang tleaung y nang i khaw parai nai tamen naira ly khri pa-rei len parai na ly!
Nang ly kai ai tavau kho i nai atleu bo.
14 Aw Tameuh, paleung len amlyh nai khumichi ly
kai ai padei ai nai atho sa u nai ne;
nichi ly nang ai tahm khai u y.
15 Na i py aw Areng, nang ly pahen nai hawi tamen reng nai Tameuh ne;
nang ly neaung hawi jojo nai ne; avawrei pahen naimy ka-ym awm bo.
16 Kai teng y jeu ly kai ai pahen kyh ba; kai ai atho haiho pei iy atleu kyh ba;
ati mana nai mo nabaly kai ly kai i amhm kamta, nang i miseaung kalop
sa pi nai deaungkho y kai ai atho haiho pei iy atleu kyh ba.
17 Aw Areng, nang ly kai i tlang tleaung y, nangmy hawihai nai sai pany hai kyh ba;
kai i tlang tleaung y nangmy awm hai nem nai hawi sabawm nai ly
kai ai niu ngai y nai khumichi niu nai khala y kangji nga u ai.