SAM 85
Pri nang chawn ai nai chiu sa nainote Hebrai cha lu Korah nupaichi i thui nai Sam.
1 Aw Areng, nang ly nangmy i pri ai pahen ba;
nang ly Israela chengchi ai nang chawn hai teang bo.
2 Nang ly nangmy i khumichi i kamngochi pahen pi bo i,
nichi i tamang naichi ai py pahen pi bo.
3 Nichi ai kado theu hai y leang bo i,
nang i khri pa-rei kado theu naira py rym vui bo.
4 Kaichi ai atleu nai keung aw Tameuh, kaichi ai ali hai teang kyh ba;
kaichi ai khrei y nai awm vui moh ba!
5 Nang ly kaichi ai avawrei kado theu hai ai a?
Nang i kado theu nai ly mana khala py rym y ai bo a?
6 Kaichi ai atho kangtha pei kyh ba;
hunaibaly nang i khumi lawm nai kaichi ly nang ai kang palo u ai.
7 Aw Areng, nang i khaw parai nai tamen naira ly
kaichi teng y amteng hai iy, kaichi ai atleu kyh ba.
8 Kai ly Areng Tameuh i leu pei nai ai tangai naimy awm bo;
achi ly amychi i hawi y nai lam ai khai su baly
mymy ly mymy i khumichi napi nai achi ai awmnem naira pei ai, nanai adeu pi bo.
9 Mymy ly mymy ai jei kaji naimy tahm khai nai khumichi ai
atleu takengkei ai nai ly angchi yb nai ne.
10 Tamen naira hawi ka-ym awm naira ly avum ai;
leu meitang adyh adawi naira hawi tlamsa naira ly atakawi hawi ai.
11 Khumichi i ka-ym awm nai ly khaileaung pri dengdairei theu iy,
Tameuh i leu meitang ly kani pri mang dengdairei khen kathiu ai.
12 Areng ly achi ai nang chawn hai ai;
achi i pri py amti amjang khri pa-rei thawn ai.
13 Leu meitang ly Areng i mo kamtheung ne i,
jeu ai nai lam sa pi rym ai.