SAM 84
Tameuh i yhm ai kadeaung nainote Hebrai cha lu Korah nupaichi i thui nai Sam.
1 Ati cheaungkhang sa thai nai keung Areng,
nang i Achura yhm y khri pa-rei ajeaung parai!
2 Huni meingtym y awm ai nai ngai parai!
Kai ly Areng i Achura yhm i lengseaung apai ai kadeaung nai ne.
Tameuh kangheng teng y, kai ly tlang phailo verei
amo theu naimy palo nai khulym thui ai.
3 Kai i samrang, kai i Tameuh ne nai,
ati cheaungkhang sa thai nai keung Areng,
noparyhchi hawi pheaungphaichi malawn py,
mychi i tabuchi ai nang i maicham sahawi y sa iy, chochi ai teu u bo.
4 Nang ai avawrei palo naimy Achura yhm y awm u naichi ly
khri pa-rei taham hawi nai ne.
5 Nang teng i dengdairei atho haiho nga nai khumichi ly taham hawi;
nichi ly Zion mawi mang y chei ai nai paleung apei u naichi ne.
6 Huni khumichi ly jengha nai Baka leaunghawi
tako prei nai thym khala y tui theu hai bo;
khuma kani nai angchei i, huni tui sampumchira y tui kawi hai bo.
7 Nichi ly tako nai tarawi y atho nga u ra nai ne;
Zion mawi salo y tameuhchi i Tameuh ai niu u ai.
8 Ati cheaungkhang sa thai nai keung Areng Tameuh,
kaichi i chiu sa nai tangai pi kyh ba;
Aw Jakob i Tameuh, tangai pi kyh ba!
9 Aw Tameuh, nangmy vawi takhra nai samrang,
kaichi i samrang ai amtheaung hai kyh ba.
10 Nang i Achura yhm y kanirei awm ai nga nai ly
meingtym takhra y kani sangrei awm nai tleaung y hawi keh.
Tameuh i yhm y katheu pa-kho typ ai nga nai ly
khumi aso y nai i yhm y awm nai tleaung y hawi keh nai ne.
11 Areng ly achi ai ama hai nai keung, phum-ang len nai samrang ne;
mymy ly achi ai pahen iy tahm pasang bo.
Mymy ly kateng sa nai khumichi ai
hawi naira pei ai nai akhi y leang.
12 Ati cheaungkhang sa thai nai keung Areng,
nang ai ym nai khumichi ly khri pa-rei taham hawi nai ne!