SAM 83
Israela chengchi i paleung ka-echi sum ai nai chiu sa nainote Hebrai cha lu Asaph i thui nai Sam.
1 Aw Tameuh, tyn teng y naimy awm pi vui moh ba;
awmnem pi vui moh ba, amkyn pi vui moh ba!
2 Nang i paleung ka-echi ly khrukhrala naimy awm u bo;
nang ai niu ngai y nai khumichi ly ang tiu bo.
3 Nichi ly nang i khumichi ai tiu ai nai dawn paviu u bo;
nangmy ama hai nai khumichi ai tiu ai nai, nichi arum u bo.
4 Nichi my, “Jeu u, Israela chengvui jeungrei, deungtasa tama vui ai nai,
nichi cheng theaung ai tamyh u pawn sina,” nanai thui u nai ne.
5 Nichi ly paleung adyh naimy arum u iy,
nang ai tiu u ai nai amsawi amnai asa u bo.
6 Huni amsawi amnai asa naira y Edom hawi Ismaela chengchi,
Moba hawi Kakara chengchi,
7 Kebala, Ammon, Amalek, Philistia chengchi hawi,
Turu mary i khumichi abawi u nai ne.
8 Asuria chengchi py. Lota i katu chanauchi ne nai
Ammon hawi Moba mang y amkawm u bo.
9 Endora meingtym y Midian chengchi hawi,Ref 83.9: Tara 4.6-22, 7.1-23
kishon tavo sahawi y, Sisera samrang hawi Jabin samrang nini py,
10 tavai sum u nai deaungkho y, nichi i veuchi ly tavai atiu nai meingtym y
veaung tlawn nai kamta, huni amsawi amnai asa nai kamkawm ai py,
huna nai khaileaung y veaung tlawn naira vum hai ba.
11 Oreb samrang hawi Zeeba samrang ni ai nangmy sa nai kamta, nichi i luchi ai so ba;Ref 83.11: Tara 7.25, 8.12
Zeeba samrang hawi Zalmuna samrang ni ai sa nai kamta,
nichi i samrang bawibawichi ai py sum hai ba.
12 Zeeba samrang hawi Zalmona samrang nini my,
“Ani ly Tameuh i peang nai pri lo veng sina,” nanai thui hawi nai ne.
13 Aw Tameuh, nichi ai ali lenglira abawi nai spryh kamta ahei hai pawn ly
ali aho naira abawi reng nai choh ali kamta lawm hai ba.
14 Dengkeaung thengreung ai kang hai nai mai kamta,
mawichi ai kang hai nai mai pui kangveaung kamta,
15 nangmy i ali kani hawi nichi ai kamlo mang y paryh pawn ba;
nangmy i ali kamchai hawi nichi ai jei hai ba.
16 Aw Areng, nichi ly nang i sa thai naira len parai, nanai
pany hai ai nai meimai y kangji ngo hai ba.
17 Nichi ly avawrei sum naimy jei hyn u sy;
nichi ly pipi tahm by y naimy dei u sy.
18 Nichi ly nang leaungrei naini Areng ne, nanai hawi,
khaileaung pri verei y samrangchi tleaung y samrang ne, nanai py pany u sy.