SAM 72
Samrang i vui chiu sa nainote Hebrai cha lu Solomon i thui nai.
1 Aw Tameuh, nang i leu meitang hawi kamlau
tara chih pajau ai nai samrang ai patiu pi kyh ba.
2 Nang i khumichi ai leu meitang adyh adawi naimy peang pajau ai nai py,
khumi kamawnchi ai reita hawi kamlau peang pajau ai nai py,
nang i leu meitang adyh adawi nai kamta
tara chih pajau ai nai samrang ai pei pi ba.
3 Pri theung y tlamsa iy,
leu meitang adyh adawi naimy peang sy.
4 Samrang ly khumi kamawnchi ai adyh adawi naimy tara chih pi sy;
khumi kamawnchi ai sabawm pi sy;
ana pumpi nai khumichi ai pasum pi sy.
5 Kanito angvang iy, lo ly kangvang pei nai ryrei,
nang i khumichi ly nang ai deungtasarei jei kaji naimy, tahm khai u sy.
6 Samrang ly li, hlauchi salo y nai pi nai kanitui kamta py,
khaileaung salo y tla nai kani amaichi kamta py lawm sy.
7 Samrang i deung y leu meitang adyh adawi naimy peang hai sy;
lo my kangvang pei nai ryrei ly tlamsa naira awm sy.
8 Samrang ly pangli katem y tym pa-rei py,Ref 72.8: Zekh 9.10
Euphrat tavo dengdai khaileaung katem khrairei py peang ai.
9 Khutaha daichi ka-vymra i khumi bawibawichi ly samrang i mo y lu meung u sy;
samrang i paleung ka-echi ly my i kheu keung y angbeu u ai.
10 Spain pri hawi tlawnchira i samrangchi ly kahm pei u ai;
Arabia pri hawi Ethiopia pri i samrangchi ly langseaungchi syn u ai.
11 Samrang bawibawichi ly mymy i mo y ambeu u ai;
khumi cheng cheaungkhangchi py, samrang i miseaung lawn u ai.
12 Samrang ly my teng y aeu u nai khumi kamawnchi ai py,
patang palai iy jeaungmang nai khumichi ai py atleu bo.
13 Patang palai nai khumichi ai tamen iy,
nichi i tlang ai atleu bo.
14 Nichi i hengra ly samrang i mo y vang teng nai molam,
ana naira hawi khrukhra nairachi ra i nai, nichi ai atleu bo.
15 Samrang ly heng sau sy!
Arabia pri i mukuchi langseaung ngo sy;
khumichi ly samrang i vui y avawrei chiu so pi u sy;
Tameuh ly samrang ai amtheaung naira pei jojo sy.
16 Pri theung y teicha teinei awm ma mang sy;
Lebanon mawi y ly dengkeaung thengreungchi hawi,
vengkhiu naimy awm nai kamta, mawichi ly amti amjangchi hawi
kawi na naimy awm sy;
mary kalenchira y awm nai khumi vuikanai ly
adym angdengra y prau nai acha kamta peung sy.
17 Samrang i amyn ly awm jojo sy;
amyn amthang nai ly kanito kamta awm jojo sy.
Tameuh ly samrang ai amtheaung naira pei nai kamta,
khumi cheng cheaungkhangchi ly mychi ai py, amtheaung naira pei ai nai
18 Israela chengchi i Tameuh napi nai Areng ai ly palo u!
Mymy naini hina nai lyh ai hawi parai naichi sa nai ne.
19 Amyn nang parai nai ai avawrei palo u!
khaileaung pri verei y nang parai nai kawi hai sy.
20 Hini ly Jese i chapo Davida i chiu sa hnei takeng naichi ne i tem bo.